ಮ್ಯಾಡ್ರಿಡ್‌ ಓಪನ್‌ ಟೆನಿಸ್‌ ಮೊದಲ ಸುತ್ತಿನಲ್ಲೇ ಎಡವಿದ ಒಸ್ಟಾಪೆಂಕೊ

Team Udayavani, May 7, 2018, 7:10 AM IST

ಮ್ಯಾಡ್ರಿಡ್‌: ಫ್ರೆಂಚ್‌ ಓಪನ್‌ ಚಾಂಪಿಯನ್‌ ಜೆಲೆನಾ ಒಸ್ಟಾಪೆಂಕೊ “ಮ್ಯಾಡ್ರಿಡ್‌ ಓಪನ್‌’ ಟೆನಿಸ್‌ ಪಂದ್ಯಾವಳಿಯ ಮೊದಲ ಸುತ್ತಿನ ಆಘಾತಕ್ಕೆ ಸಿಲುಕಿದ್ದಾರೆ. ಲಾತ್ವಿಯಾದ ಈ ಆಟಗಾರ್ತಿಯನ್ನು ರೊಮೇನಿಯಾದ ಐರಿನಾ ಕ್ಯಾಮೆಲಿಯಾ ಬೆಗು 6-3, 6-3 ನೇರ ಸೆಟ್‌ಗಳಲ್ಲಿ ಹಿಮ್ಮೆಟ್ಟಿಸಿದರು.

ಒಸ್ಟಾಪೆಂಕೊ ನಿರ್ಗಮನದ ಬೆನ್ನಲ್ಲೇ ಅಮೆರಿಕದ ಹಿರಿಯ ಆಟಗಾರ್ತಿ ವೀನಸ್‌ ವಿಲಿಯಮ್ಸ್‌ ಕೂಡ ಮನೆಯ ಹಾದಿ ಹಿಡಿದರು. 2010ರ ರನ್ನರ್‌-ಅಪ್‌ ಆಗಿದ್ದ ವೀನಸ್‌ ಅವರನ್ನು ಎಸ್ತೋನಿಯಾದ ಅನೆಟ್‌ ಕೊಂಟಾವೀಟ್‌ 3 ಸೆಟ್‌ಗಳ ಹೋರಾಟದ ಬಳಿಕ 3-6, 6-3, 6-2ರಿಂದ ಮಣಿಸಿದರು.

ವಿಶ್ವದ ನಂ.4 ಆಟಗಾರ್ತಿ ಎಲಿನಾ ಸ್ವಿಟೋಲಿನಾ, ಮಾಜಿ ನಂ.1 ಆಟಗಾರ್ತಿ ಕ್ಯಾರೋಲಿನಾ ಪ್ಲಿಸ್ಕೋವಾ ಗೆಲುವಿನ ಓಟ ಆರಂಭಿಸಿದ್ದಾರೆ. ಉಕ್ರೇನಿನ ಸ್ವಿಟೋಲಿನಾ ಫ್ರಾನ್ಸ್‌ನ ಅಲಿಜ್‌ ಕಾರ್ನೆಟ್‌ ಅವರನ್ನು 6-2, 6-2 ಅಂತರದಿಂದ ಮಣಿಸಿದರು. ಆದರೆ 23ರ ಹರೆಯದ ಸ್ವಿಟೋಲಿನಾ ಈವರೆಗೆ ಮ್ಯಾಡ್ರಿಡ್‌ನ‌ಲ್ಲಿ ದ್ವಿತೀಯ ಸುತ್ತು ದಾಟಿಲ್ಲ. ಜೆಕ್‌ ಗಣರಾಜ್ಯದ ಪ್ಲಿಸ್ಕೋವಾ 6-4, 6-2 ಅಂತರದಿಂದ ರಶ್ಯದ ಎಲೆನಾ ವೆಸ್ನಿನಾಗೆ ಸೋಲುಣಿಸಿದರು.

ಫ್ರಾನ್ಸ್‌ನ ಕ್ಯಾರೋಲಿನಾ ಗಾರ್ಸಿಯಾ, ಕ್ರಿಸ್ಟಿನಾ ಲಡೆನೋವಿಕ್‌, ರಶ್ಯದ ದರಿಯಾ ಕಸತ್ಕಿನಾ ಕೂಡ ಗೆಲುವು ಸಾಧಿಸಿದ್ದಾರೆ. ಲಡೆನೋವಿಕ್‌ ಅಮೆರಿಕದ ಕೊಕೊ ವಾಂಡೆವೇಗ್‌ ಅವರಿಗೆ ಆಘಾತವಿಕ್ಕಿದರು.