ಎಲ್ಲ ವರ್ಗದವರ ಏಳಿಗೆಗೂ ಶ್ರಮ

Team Udayavani, May 8, 2018, 12:32 PM IST

ಬೆಂಗಳೂರು: ಸರ್‌ ಸಿ.ವಿ.ರಾಮನ್‌ನಗರ ವಿಧಾನಸಭಾ ಕ್ಷೇತ್ರದ ಭಾರತೀಯ ಜನತಾ ಪಕ್ಷದ ಅಭ್ಯರ್ಥಿ ಎಸ್‌. ರಘು ಅವರು ಸೋಮವಾರ ಕ್ಷೇತ್ರದ ಕೊನೇನಅಗ್ರಹಾರ, ಕೋಡಿಹಳ್ಳಿ ಹಾಗೂ ಸಂಜೆ ಸುದ್ದಗುಂಟೆ ಪಾಳ್ಯದಲ್ಲಿ ಭರ್ಜರಿ ಪ್ರಚಾರ ಕಾರ್ಯ ನಡೆಸಿದ ಹಮ್ಮಿಕೊಂಡಿದ್ದರು.

ಬೆಳಗ್ಗಿನಿಂದಲೇ ಪಾದಯಾತ್ರೆ ಮೂಲಕ ಆರಂಭಿಸಿದ ಮತಯಾಚನೆ ಕಾರ್ಯ ಎಡಬಿಡದೆ ಸಂಜೆವರೆಗೆ ನಡೆಯಿತು. ಕ್ಷೇತ್ರದ 113ನೇ ವಾರ್ಡ್‌ನ ಕೊನೇನ ಅಗ್ರಹಾರ, ಜೀವನಭೀಮಾನಗರ ವಾರ್ಡ್‌ನ ಕೋಡಿಹಳ್ಳಿ, ಸುದ್ದಗುಂಟೆ ಪಾಳ್ಯದ ನಾಗರಿಕರು ರಘು ಅವರಿಗೆ ಹಸ್ತಲಾಘವ ಮಾಡುತ್ತ ಸಂತಸದಿಂದ ಬರಮಾಡಿಕೊಂಡರು.

ಕಳೆದ ದಶಕದಿಂದ ಕ್ಷೇತ್ರದ ಜನತೆಯ ಸೇವೆ ಮಾಡುತ್ತಿದ್ದೇನೆ ಮತ್ತೂಮ್ಮೆ ಗೆಲ್ಲಿಸಿ ಹ್ಯಾಟ್ರಿಕ್‌ಗೆ ಅವಕಾಶ ಮಾಡಿಕೊಡಿ ಎಂದು ಶಾಸಕ ರಘು ಅವರು ಜನತೆಯಲ್ಲಿ ಮನವಿ ಮಾಡಿಕೊಂಡರು. ಸಿ.ವಿ.ರಾಮನ್‌ನಗರದ ಅಭಿವೃದ್ಧಿಗಾಗಿ ಶ್ರಮಿಸಿದ್ದೇನೆ. ಮುಂದಿನ ದಿನಗಳಲ್ಲಿ ಕ್ಷೇತ್ರದಲ್ಲಿ ಮತ್ತಷ್ಟು ಅಭಿವೃದ್ಧಿ ಕಾಣಲು ಪ್ರಯತ್ನಿಸುತ್ತೇನೆ. ಅ ಅವಕಾಶ ಕಲ್ಪಿಸಿ ಕೊಡಿ, ಮಾದರಿ ಕ್ಷೇತ್ರವನ್ನಾಗಿಸುವತ್ತ ದುಡಿಯುತ್ತೇನೆ ಎಂದು ನುಡಿದರು.

ಬಡವರ, ದೀನದಲಿತರ, ಹಿಂದುಳಿದ ವರ್ಗಗಳ, ಅಲ್ಪಸಂಖ್ಯಾತರ, ಹಿರಿಯ ನಾಗರಿಕರ ಹಾಗೂ ಮಹಿಳೆಯರು ಸೇರಿದಂತೆ ಎಲ್ಲ ವರ್ಗದ ಏಳಿಗೆಗಾಗಿ ಶ್ರಮಿಸಿದ್ದೇನೆ. ನಮ್ಮ ಕ್ಷೇತ್ರದಲ್ಲಿ ಉತ್ತಮ ರಸ್ತೆಗಳು, ಆಸ್ಪತ್ರೆ, ಮೆಟ್ರೋ ಮುಂತಾದವನ್ನು ತರಲು ಕಾರಣಕರ್ತನಾಗಿರುವುದನ್ನು ಗಮನಿಸಿರುವ ಜನತೆ ಈ ಬಾರಿ ಭಾರಿ ಬಹುಮತದಿಂದ ಗೆಲ್ಲಿಸಲಿದ್ದಾರೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಈ ಬಾರಿ ರಾಜ್ಯದಲ್ಲಿ ಬಿ.ಎಸ್‌. ಯಡಿಯೂರಪ್ಪ ಅವರ ಮುಂದಾಳತ್ವದಲ್ಲಿ ಬಿಜೆಪಿ ಸರ್ಕಾರ ರಚಿಸಲಿದೆ. ಆ ಮೂಲಕ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರಿಗೆ ಮತ್ತಷ್ಟು ಶಕ್ತಿ ತುಂಬಲಿದ್ದೇವೆ ಎಂದು ನುಡಿದರು. ಬಿಬಿಎಂಪಿ ಮಾಜಿ ಸದಸ್ಯ ಎಂ. ಕೃಷ್ಣ, ಕ್ಷೇತ್ರದ ಅಧ್ಯಕ್ಷ ರಾಜಾರೆಡ್ಡಿ, ಚಂದ್ರಶೇಖರ್‌, ನಾಗರಾಜ್‌, ರಾಮಕುಮಾರ್‌, ಏಕಾಂಬರರೆಡ್ಡಿ ಇತರ‌ ಮುಖಂಡರು ಹಾಗೂ ಕಾರ್ಯಕರ್ತರು ಪ್ರಚಾರದಲ್ಲಿ ಕಾರ್ಯದಲ್ಲಿ ಭಾಗಿಯಾಗಿದ್ದರು.