ಚುನಾವಣೆ ಸಿದ್ಧತೆ ಪೂರ್ಣ: ದ.ಕ. ಜಿಲ್ಲಾಧಿಕಾರಿ ಶಶಿಕಾಂತ ಸೆಂಥಿಲ್‌

Team Udayavani, May 11, 2018, 7:35 AM IST

ಮಂಗಳೂರು: ದಕ್ಷಿಣ ಕನ್ನಡ ಜಿಲ್ಲೆಯ 8 ಕ್ಷೇತ್ರಗಳಲ್ಲಿರುವ ಒಟ್ಟು 1,858 ಮತಗಟ್ಟೆಗಳಲ್ಲಿ ಮೇ 12 ರಂದು ನಡೆಯುವ ಮತದಾನಕ್ಕೆ ಸಿದ್ಧತೆಗಳು ಪೂರ್ಣಗೊಂಡಿವೆ. ಮತದಾನದ ಅವಧಿ ಬೆಳಗ್ಗೆ 7 ಗಂಟೆಯಿಂದ ಸಂಜೆ 6ರವರೆಗೆ ಇರುತ್ತದೆ ಎಂದು ಡಿಸಿ ಶಶಿಕಾಂತ ಸೆಂಥಿಲ್‌ ತಿಳಿಸಿದರು. ಜಿಲ್ಲೆಯಲ್ಲಿ ಒಟ್ಟು 17,11,878 ಮತದಾರರಿದ್ದಾರೆ. ಅವರಲ್ಲಿ 8,41,073 ಪುರುಷರು ಹಾಗೂ 8,70,675 ಮಹಿಳೆಯರು. ಅಲ್ಲದೆ 100 ಮಂದಿ ಲೈಂಗಿಕ ಅಲ್ಪಸಂಖ್ಯಾಕ ಮತದಾರರಿದ್ದಾರೆ. 20 ಪಿಂಕ್‌ ಮತ್ತು 5 ಎತ್ನಿಕ್‌ ಮತದಾನ ಕೇಂದ್ರಗಳನ್ನು ಸ್ವೀಪ್‌ ಸಮಿತಿ ಗುರುತಿಸಿದೆ.

7,569 ಮತ ಯಂತ್ರ:1,858 ಮತಗಟ್ಟೆಗಳಿಗೆ 7,569 ಮತ ಯಂತ್ರ ಒದಗಿಸಲಾಗಿದೆ. ಶೇ.20ರಷ್ಟು ಮತ ಯಂತ್ರಗಳು ಮೀಸಲಿರಬೇಕೆಂಬ ನಿಯಮವಿದ್ದು, ಹೆಚ್ಚುವರಿ ಮತ ಯಂತ್ರಗಳನ್ನು ಪೂರೈಕೆ ಮಾಡಲಾಗಿದೆ.

ಚುನಾವಣಾಧಿಕಾರಿಗಳು: ಎಲ್ಲ 8 ಕ್ಷೇತ್ರಗಳಿಗೆ ಚುನಾವಣ ಅಧಿಕಾರಿ ನೇಮಕ ಮಾಡಲಾಗಿದೆ. ಬೆಳ್ತಂಗಡಿ- ಎಚ್‌.ಆರ್‌. ನಾಯ್ಕ (95914 17218), ಮೂಡಬಿದಿರೆ- ವಿ. ಪ್ರಸನ್ನ (9731192244), ಮಂಗಳೂರು ನಗರ ಉತ್ತರ – ಎಸ್‌.ಬಿ. ಪ್ರಶಾಂತ್‌ ಕುಮಾರ್‌ (7760432770), ಮಂಗಳೂರು ನಗರ ದಕ್ಷಿಣ – ಆ್ಯಂಟನಿ ಮರಿಯಾ ಇಮ್ಯಾನುವೆಲ್‌ (8277931060), ಮಂಗಳೂರು- ಮಹೇಶ್‌ ಕರ್ಜಗಿ (9448933653), ಬಂಟ್ವಾಳ- ರವಿ ಬಸರಿಹಳ್ಳಿ (9902967070), ಪುತ್ತೂರು- ಎಚ್‌.ಕೆ. ಕೃಷ್ಣ ಮೂರ್ತಿ (7760292048), ಸುಳ್ಯ- ಬಿ. ಟಿ. ಮಂಜುನಾಥನ್‌ (9448067681).

13,176 ಸಿಬಂದಿ: ಜಿಲ್ಲೆಯಲ್ಲಿ ಒಟ್ಟು 13,176 ಸಿಬಂದಿಯನ್ನು ನೇಮಕ ಮಾಡಲಾಗಿದೆ. ಪ್ರತಿ ಮತಗಟ್ಟೆಗೆ ಒಬ್ಬ ಅಧ್ಯಕ್ಷಾಧಿಕಾರಿ, 4 ಮತಗಟ್ಟೆ ಅಧಿಕಾರಿ ಮತ್ತು ಒಬ್ಬ ಗ್ರೂಪ್‌ ಡಿ ಸಿಬಂದಿಯನ್ನು ನಿಯೋಜಿಸಲಾಗಿದೆ. ಕ್ಲಿಷ್ಟ ಮತಗಟ್ಟೆಗೆ ಓರ್ವ ಮೈಕ್ರೋ ವೀಕ್ಷಕರನ್ನು ನೇಮಿಸಲಾಗಿದೆ.

648 ವಾಹನಗಳು: ಮತಗಟ್ಟೆ ಅಧಿಕಾರಿಗಳನ್ನು ಮತಗಟ್ಟೆಗಳಿಗೆ ತಲುಪಿಸಿ ಚುನಾವಣ ಕರ್ತವ್ಯ ಮುಕ್ತಾಯವಾದ ಬಳಿಕ ಡಿ – ಮಸ್ಟರಿಂಗ್‌ ಕೇಂದ್ರಕ್ಕೆ ಕರೆದೊಯ್ಯುವ ಬಗ್ಗೆ ಒಟ್ಟು 648 ವಾಹನಗಳ ವ್ಯವಸ್ಥೆ ಮಾಡಲಾಗಿದೆ.

ಪೋಲಿಂಗ್‌ ಏಜಂಟರ ನೇಮಕ: ಎಲ್ಲ ಮತಗಟ್ಟೆಗಳಲ್ಲಿ ಮತದಾನ ಆರಂಭವಾಗುವ ಮೊದಲು ಅಣಕು ಮತದಾನ ನಡೆಸಲಾಗುತ್ತಿದ್ದು, ಪೋಲಿಂಗ್‌ ಏಜಂಟರು ಬೆಳಗ್ಗೆ 5.45ಕ್ಕೆ ಮತಗಟ್ಟೆಗಳಲ್ಲಿ ಹಾಜರಿರಬೇಕು. ಪೊಲೀಂಗ್‌ ಏಜಂಟರನ್ನು ಮಧ್ಯಾಹ್ನ 3 ಗಂಟೆವರೆಗೆ ಮಾತ್ರ ಬದಲಾಯಿಸಲು ಅವಕಾಶವಿದೆ.

ಅಂಚೆ ಮತದಾನ: ಚುನಾವಣ ಕರ್ತವ್ಯ ನಿರ್ವಹಿಸುವವರಿಗೆ ಅಂಚೆ ಮತದಾನ ಮಾಡುವ ಅವಕಾಶವಿದ್ದು, ಈ ಬಗ್ಗೆ 12,837 ಮತಗಟ್ಟೆ ಅಧಿಕಾರಿಗಳಿಗೆ ಹಾಗೂ 1,295 ಪೊಲೀಸ್‌ ಅಧಿಕಾರಿ/ ಸಿಬಂದಿಗೆ ಮತ್ತು 43 ವಾಹನ ಚಾಲಕ/ ಕ್ಲೀನರ್‌ಗಳಿಗೆ ಮತ ಪತ್ರಗಳನ್ನು ವಿತರಿಸಲಾಗಿದ್ದು, ಈಗಾಗಲೇ ಹಲವಾರು ಮಂದಿ ಮತದಾನ ಮಾಡಿದ್ದಾರೆ. 

517 ಕ್ಲಿಷ್ಟ ಮತಗಟ್ಟೆಗಳು: ಒಟ್ಟು 517 ಕ್ಲಿಷ್ಟ ಮತಗಟ್ಟೆ ಗುರುತಿಸಲಾಗಿದೆ. ಈ ಪೈಕಿ 97ಮತಗಟ್ಟೆಗಳಲ್ಲಿ ವೆಬ್‌ ಕಾಸ್ಟಿಂಗ್‌, 221 ಮತಗಟ್ಟೆಗಳಲ್ಲಿ ಮೈಕ್ರೋ ವೀಕ್ಷಕರನ್ನು ನಿಯೋಜಿಸಲಾಗಿದೆ. ಉಳಿದ ಮತಗಟ್ಟೆಗಳಲ್ಲಿ ಕೇಂದ್ರೀಯ ಅರೆ ಸೈನಿಕ ಪಡೆ ಸಿಬಂದಿ/ವೀಡಿಯೋಗ್ರಾಫರ್‌ ನಿಯೋಜಿಸಲಾಗಿದೆ.

ಚುನಾವಣ ಪೂರ್ವ ಸಮೀಕ್ಷೆ ನಿಷೇಧ: ಮತದಾನ ದಿನ ಬೆಳಗ್ಗೆ 7 ರಿಂದ ಸಂಜೆ 6.30ರವರೆಗೆ ಚುನಾವಣಾ ಪೂರ್ವ ಸಮೀಕ್ಷೆ ನಡೆಸುವುದನ್ನು ಹಾಗೂ ಒಪೀನಿಯನ್‌ ಪೋಲ್‌ ನ್ನು ಮತದಾನದ ಕೊನೆಯ 48 ಗಂಟೆಗಳಲ್ಲಿ ನಡೆಸುವುದನ್ನು ನಿಷೇಧಿಸಲಾಗಿದೆ.

ಮತಗಟ್ಟೆ ಬಳಿ ಪ್ರಚಾರ ನಿಷೇಧ: ಮತಗಟ್ಟೆಯ ಬಳಿ 100 ಮೀ. ವ್ಯಾಪ್ತಿಯಲ್ಲಿ ಚುನಾವಣ ಪ್ರಚಾರ ನಿಷೇಧಿಸಲಾಗಿದೆ. ಅಭ್ಯರ್ಥಿಯ ಬೂತ್‌ ನಿರ್ಮಿಸಲು ಮತಗಟ್ಟೆಯಿಂದ 200 ಮೀ. ದೂರದಲ್ಲಿ ಮಾತ್ರ ಅವಕಾಶವಿದೆ. ಇದಕ್ಕೆ ಸ್ಥಳೀಯಾಡಳಿತದ ಅನುಮತಿ ಕಡ್ಡಾಯ.

ಅಪರ ಜಿಲ್ಲಾಧಿಕಾರಿ ವೈಶಾಲಿ, ಮಂಗಳೂರು ಪೊಲೀಸ್‌ ಆಯುಕ್ತ ವಿಪುಲ್‌ ಕುಮಾರ್‌ ಮತ್ತು ಜಿಲ್ಲಾ ಎಸ್‌ಪಿ ಡಾ| ರವಿಕಾಂತೇ ಗೌಡ, ಡಿಸಿಪಿ ಹನುಮಂತರಾಯ, ಜಿ. ಪಂ. ಸಿಇಒ ಡಾ| ಎಂ.ಆರ್‌. ರವಿ ಇದ್ದರು. 

ಕಂಟ್ರೋಲ್‌ ರೂಂ
ಮತದಾರಾರ ಹೆಸರು ಮತದಾರರ ಪಟ್ಟಿಗಳಲ್ಲಿ ನೊಂದಾಯಿಸಿರುವ ಬಗ್ಗೆ ಮಾಹಿತಿ ಪಡೆಯಲು ಹಾಗೂ ಚುನಾವಣೆಗೆ ಸಂಬಂಧಪಟ್ಟ ಸಲಹೆ ಸೂಚನೆ ಅಥವಾ ದೂರುಗಳನ್ನು ನೀಡಲು ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಕಂಟ್ರೋಲ್‌ ರೂಂ ಸ್ಥಾಪಿಸಲಾಗಿದೆ. ಆವಶ್ಯಕತೆ ಇರುವವರು ಇದರ ಪ್ರಯೋಜನ ಪಡೆಯಬಹುದು.

ದೂರವಾಣಿ ಸಂಖ್ಯೆ: 0824-2420002
ಶುಲ್ಕ ರಹಿತ (ಟೋಲ್‌ ಫ್ರೀ) ದೂರವಾಣಿ: 18004252099
ವಾಟ್ಸ್‌ಆ್ಯಪ್‌ ಸಂಖ್ಯೆ: 8277163522