ಮೆಕೆನ್ರೊ ದಾಖಲೆ ಮುರಿದ ನಡಾಲ್‌

Team Udayavani, May 12, 2018, 6:00 AM IST

ಮ್ಯಾಡ್ರಿಡ್‌: ಮ್ಯಾಡ್ರಿಡ್‌ ಓಪನ್‌ ಟೆನಿಸ್‌ ಪಂದ್ಯಾವಳಿಯಲ್ಲಿ ಸತತ 50 ಸೆಟ್‌ಗಳನ್ನು ಗೆಲ್ಲುವ ಮೂಲಕ ವಿಶ್ವದ ನಂ.1 ಆಟಗಾರ ರಫೆಲ್‌ ನಡಾಲ್‌ ನೂತನ ಮೈಲುಗಲ್ಲು ನೆಟ್ಟಿದ್ದಾರೆ; ಜಾನ್‌ ಮೆಕೆನ್ರೊ 34 ವರ್ಷಗಳ ಹಿಂದೆ ಸ್ಥಾಪಿಸಿದ್ದ ದಾಖಲೆಯನ್ನು ಮುರಿದಿದ್ದಾರೆ.

ಗುರುವಾರ ರಾತ್ರಿ ಡೀಗೊ ಶ್ವಾಟ್ಸìಮನ್‌ ವಿರುದ್ಧ 6-3, 6-4 ಅಂತರದ ಗೆಲುವಿನ ವೇಳೆ ನಡಾಲ್‌ ಈ ದಾಖಲೆ ನಿರ್ಮಿಸಿದರು. 1984ರಲ್ಲಿ ಜಾನ್‌ ಮೆಕೆನ್ರೊ ಸತತ 49 ಸೆಟ್‌ಗಳನ್ನು ಗೆದ್ದದ್ದು ಈವರೆಗಿನ ದಾಖಲೆಯಾಗಿತ್ತು. ಆ ವರ್ಷ ಮೆಕೆನ್ರೊ ಮ್ಯಾಡ್ರಿಡ್‌ ಓಪನ್‌ ಪ್ರಶಸ್ತಿ ಜಯಿಸಿದ್ದರು. ಇದೇ ಹಾದಿಯಲ್ಲಿ ಮುನ್ನಡೆಯುವ ಸೂಚನೆಯಿತ್ತಿರುವ ನಡಾಲ್‌ ಕ್ವಾರ್ಟರ್‌ ಫೈನಲ್‌ನಲ್ಲಿ ಆಸ್ಟ್ರಿಯಾದ ಡೊಮಿನಿಕ್‌ ಥೀಮ್‌ ಅವರನ್ನು ಎದುರಿಸಲಿದ್ದಾರೆ.

ಇತ್ತ ರಫೆಲ್‌ ನಡಾಲ್‌ ಗೆಲುವಿನ ದಾಖಲೆ ನಿರ್ಮಿಸುತ್ತಿರುವಂತೆಯೇ ಅತ್ತ ಜುವಾನ್‌ ಮಾರ್ಟಿನ್‌ ಡೆಲ್‌ ಪೊಟ್ರೊ, ಮರಿಯಾ ಶರಪೋವಾ, ಸಿಮೋನಾ ಹಾಲೆಪ್‌ ಅವರೆಲ್ಲ ಸೋತು ಕೂಟದಿಂದ ಹೊರಬಿದ್ದರು. ಡೆಲ್‌ ಪೊಟ್ರೊ ಅವರನ್ನು ಸರ್ಬಿಯಾದ ಅರ್ಹತಾ ಆಟಗಾರ ದುಸಾನ್‌ ಲಾಜೊವಿಕ್‌ 3-6, 6-4, 7-6 (8-6) ಅಂತರದಿಂದ ಮಣಿಸಿದರು. ಜೊಕೋವಿಕ್‌ಗೆ ಆಘಾತವಿಕ್ಕಿದ ಕೈಲ್‌ ಎಡ್ಮಂಡ್‌ ತಮ್ಮ ಓಟವನ್ನು ಮುಂದುವರಿಸಿದ್ದು, 8ನೇ ಶ್ರೇಯಾಂಕದ ಡೇವಿಡ್‌ ಗೊಫಿನ್‌ ವಿರುದ್ಧ 6-3, 6-3ರಿಂದ ಗೆದ್ದರು. 

ಹಾಲೆಪ್‌ ನಿರ್ಗಮನ
ವನಿತಾ ಸಿಂಗಲ್ಸ್‌ನಲ್ಲಿ ಮರಿಯಾ ಶರಪೋವಾ ಕೂಡ 3 ಸೆಟ್‌ಗಳ ಹೋರಾಟದ ಬಳಿಕ ಹಾಲೆಂಡಿನ ಕಿಕಿ ಬರ್ಟೆನ್ಸ್‌ ಕೈಯಲ್ಲಿ 4-6, 6-2, 6-3 ಅಂತರದ ಸೋಲುಂಡರು. ಕಳೆದೆರಡು ವರ್ಷಗಳ ಚಾಂಪಿಯನ್‌ ಸಿಮೋನಾ ಹಾಲೆಪ್‌ ಅವರನ್ನು ಕ್ಯಾರೋಲಿನಾ ಪ್ಲಿಸ್ಕೋವಾ 6-4, 6-3ರಿಂದ ಮಣಿಸಿದರು. ಇದರಿಂದ ಹಾಲೆಪ್‌ಗೆ ಪ್ರಶಸ್ತಿಯ ಹ್ಯಾಟ್ರಿಕ್‌ ತಪ್ಪಿತು. ಕಿಕಿ ಬರ್ಟೆನ್ಸ್‌ ಅವರ ಮುಂದಿನ ಸುತ್ತಿನ ಎದುರಾಳಿ ಫ್ರಾನ್ಸ್‌ನ ಕ್ಯಾರೋಲಿನ್‌ ಗಾರ್ಸಿಯಾ. ಅವರು ಕಾರ್ಲಾ ಸೂರೆಜ್‌ ನವಾರೊ ವಿರುದ್ಧ 6-2, 6-3 ಅಂತರದ ಜಯ ಸಾಧಿಸಿದರು.