ಪಿಎನ್‌ಬಿ ನಷ್ಟದ ಮೊತ್ತ 13 ಸಾವಿರ ಕೋಟಿ ರೂ

Team Udayavani, May 16, 2018, 6:10 AM IST

ನವದೆಹಲಿ: ಉದ್ಯಮಿಗಳಾದ ನೀರವ್‌ ಮೋದಿ, ಮೆಹುಲ್‌ ಚೋಸ್ಕಿ ಅವರಿಂದ ವಂಚನೆಗೆ ಒಳಗಾದ ಸರ್ಕಾರಿ ಸ್ವಾಮ್ಯದ ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌ ಗೆ 13, 417 ಕೋಟಿ ರೂ. ನಷ್ಟ ಉಂಟಾಗಿದೆ.

2017-18ನೇ ಸಾಲಿನ ವಿತ್ತೀಯ ವರ್ಷದ ಜನವರಿ-ಮಾರ್ಚ್‌ ವರೆಗಿನ ಅವಧಿಯ ನಾಲ್ಕನೇ ತ್ತೈಮಾಸಿಕ ಅವಧಿಯ ಬೆಳವಣಿಗೆ ಇದಾಗಿದೆ. ಈ ಅವಧಿಯಲ್ಲಿ ಸರ್ಕಾರಿ ಸ್ವಾಮ್ಯದ ಬ್ಯಾಂಕ್‌ಗೆ ಲಾಭದ ಮೊತ್ತ 261.90 ಕೋಟಿ ರೂ. ಮಾತ್ರ. ಈ ಅವಧಿಯಲ್ಲಿ ಬ್ಯಾಂಕ್‌ನ ಆದಾಯ 12, 945 ಕೋಟಿ ರೂ.ಗಳಿಗೆ ಇಳಿಕೆಯಾಗಿದೆ. ಕಳೆದ ಹಣಕಾಸು ವರ್ಷದ ಇದೇ ಅವಧಿಯಲ್ಲಿ ಬ್ಯಾಂಕ್‌ 14,989.33 ಕೋಟಿ ರೂ. ಲಾಭ ಗಳಿಸಿತ್ತು. ಇದರ ಜತೆಗೆ ಬ್ಯಾಂಕ್‌ನ ಅನುತ್ಪಾದಕ ಆಸ್ತಿಯ ಪ್ರಮಾಣ ಶೇ.12.53 ರಿಂದ ಶೇ.18.38ಕ್ಕೆ ಏರಿಕೆ ಯಾಗಿದೆ.

ನಗದು ಲೆಕ್ಕಾಚಾರದಲ್ಲಿ ಹೇಳುವುದಿದ್ದರೆ ಹಾಲಿ 55,370 ಕೋಟಿ ರೂ.ಗಳಿಂದ 86,620 ಕೋಟಿ ರೂ.ಗಳಿಗೆ ಏರಿಕೆಯಾಗಿದೆ. ದೇಶೀಯ ಬ್ಯಾಂಕಿಂಗ್‌ ವ್ಯವಸ್ಥೆಯಲ್ಲಿ ಈ ಪ್ರಮಾಣ ಹೆಚ್ಚು.

ಫಾರಿನ್‌ ಲೆಟರ್‌ ಆಫ್ ಕ್ರೆಡಿಟ್‌ , ಲೆಟರ್‌ ಆಫ್ ಕ್ರೆಡಿಟ್‌ (ಎಲ್‌ಒಸಿ)ಯಿಂದ ಇತರ ಬ್ಯಾಂಕ್‌ಗಳಿಗೆ ಪಾವತಿ ಮಾಡಬೇಕಾಗಿರುವ 6,586.11 ಕೋಟಿ ರೂ.ಗಳನ್ನು ಪಾವತಿ ಮಾಡಲಾಗಿದೆ ಎಂದು ಪಿಎನ್‌ಬಿ ಹೇಳಿಕೊಂಡಿದೆ.