ಕ್ರೇಜಿ ಡೈಲಾಗ್ಸ್‌

Team Udayavani, May 20, 2018, 11:17 AM IST

ರವಿಚಂದ್ರನ್‌ ಅಭಿನಯದ “ಬಕಾಸುರ’ ಬಿಡುಗಡೆಯಾಗಿದೆ. ಇನ್ನು, ದರ್ಶನ್‌ ಅವರೊಂದಿಗೆ ನಟಿಸಿರುವ “ಕುರುಕ್ಷೇತ್ರ’ ಚಿತ್ರ ಇನ್ನಷ್ಟೇ ತೆರೆಗೆ ಬರಬೇಕಿದೆ. ಇದರೊಂದಿಗೆ ಅವರೇ ನಿರ್ಮಿಸಿ, ನಿರ್ದೇಶಿಸುತ್ತಿರುವ “ರಾಜೇಂದ್ರ ಪೊನ್ನಪ್ಪ’ ಚಿತ್ರ ಕೂಡ ಇದೀಗ ಸುದ್ದಿಯಲ್ಲಿದೆ. ಹೌದು, “ರಾಜೇಂದ್ರ ಪೊನ್ನಪ್ಪ’ ಚಿತ್ರದ ಚಿತ್ರೀಕರಣ ಇನ್ನೇನು ಮುಗಿಯುವ ಹಂತದಲ್ಲಿದೆ. ಈ ತಿಂಗಳು ರವಿಚಂದ್ರನ್‌ ಅವರ ಹುಟ್ಟುಹಬ್ಬವೂ ಇದೆ.

ಅಭಿಮಾನಿಗಳಿಗೆ ತಮ್ಮ ಹುಟ್ಟುಹಬ್ಬದ ಮುನ್ನವೇ ರವಿಚಂದ್ರನ್‌, ಗಿಫ್ಟ್ ಕೊಟ್ಟಿದ್ದಾರೆ. ಹೌದು, “ರಾಜೇಂದ್ರ ಪೊನ್ನಪ್ಪ’ ಚಿತ್ರದ ವಿಶೇಷ ಪೋಸ್ಟರ್‌ಗಳನ್ನು ಹರಿಬಿಟ್ಟಿದ್ದಾರೆ ರವಿಚಂದ್ರನ್‌. ರವಿಚಂದ್ರನ್‌ ಏನೇ ಮಾಡಿದರೂ ಅದು ದೊಡ್ಡ ಸುದ್ದಿ. ಈಗ ಅವರು ಬಿಡುಗಡೆ ಮಾಡಿರುವ ಪೋಸ್ಟರ್‌ಗಳು ಕೂಡ ಸುದ್ದಿ ಮಾಡಿವೆ. ಈ ಹಿಂದೆ “ಅಪೂರ್ವ’ ಚಿತ್ರ ಮಾಡಿದ್ದಾಗ, ರವಿಚಂದ್ರನ್‌, ಆ ಚಿತ್ರದ ಫ‌ಸ್ಟ್‌ಲುಕ್‌ ಬಿಡುಗಡೆ ಮಾಡಿದ್ದರು.

ಆಗ ಎಲ್ಲರಿಗೂ ಒಂದು ಅಚ್ಚರಿ ಕಾದಿತ್ತು. ಅದೇನೆಂದರೆ, “ಅಪೂರ್ವ’ ಚಿತ್ರದ ಪೋಸ್ಟರ್‌ ಮೇಲೆ ರವಿಚಂದ್ರನ್‌ ಅವರು, ವಿಶೇಷವಾದ ಡೈಲಾಗ್‌ಗಳನ್ನು ಹಾಕಿದ್ದರು. ಅದು ಎಲ್ಲರಿಗೂ ಇಷ್ಟವಾಗಿತ್ತು. ಅಷ್ಟೇ ಅಲ್ಲ, ಆ ಬಗ್ಗೆ ಎಲ್ಲೆಡೆ ಉತ್ತಮ ಪ್ರತಿಕ್ರಿಯೆ ಬಂದಿತ್ತು. ಈಗ “ರಾಜೇಂದ್ರ ಪೊನ್ನಪ್ಪ’ ಚಿತ್ರದ ಪೋಸ್ಟರ್‌ಗಳ ಮೇಲೂ ತರಹೇವಾರಿ ಡೈಲಾಗ್‌ ಹಾಕುವ ಮೂಲಕ ಅಭಿಮಾನಿಗಳಲ್ಲಿ ಇನ್ನಷ್ಟು ಕ್ರೇಜ್‌ ಹೆಚ್ಚಿಸಿದ್ದಾರೆ.

ಅವರು ಬಿಡುಗಡೆ ಮಾಡಿರುವ ಸುಮಾರು 11 ಫೋಟೋಗಳ ಮೇಲೆ ಬರೆದಿರುವ ಡೈಲಾಗ್‌ ಕುರಿತು ಹೇಳುವುದಾದರೆ… “ಕಾಸಿದ್ದೋನೇ ಇಲ್ಲಿ ಯಜಮಾನ, ತಲೆ ಇದ್ದೋನೆ ಇಲ್ಲಿ ಜವಾನ’, “ತಪ್‌ ಮಾಡ್ದೋನ್ಗೆ ಇಲ್ಲಿ ಸನ್ಮಾನ, ತೆಪ್ಗಿದ್ದೋನ್ಗೆ ಬರೀ ಅವಮಾನ’, “ಸಿಂಹ ಯಾವತ್ತಿದ್ರೂ ಬೇಟೆ ಆದ್ಮೇ ಘರ್ಜಿಸಲ್ಲ’, “ನಿನ್ನ ಮೌನದ ಅರ್ಥ ಮಾಡ್ಕೊಳ್ಳದೇ ಇರೋರು, ನಿನ್ನ ಮಾತೆಲ್ಲಿ ಅರ್ಥ ಮಾಡ್ಕೊತಾರೆ’,”ಈ ಆರ್‌ಪಿ ಡ್ನೂಯೆಲ್ ಪರ್ಸನಾಲಿಟಿ, ಅರ್ಥ ಮಾಡ್ಕೊಳ್ಳೋದ್‌ ಕಷ್ಟ.

ಹೀರೋನಾ.. ವಿಲ್ಲನ್ನಾ.. ನೀವೇ ಡಿಸೈಡ್‌ ಮಾಡ್ಕೊಳ್ಳಿ’ “ನಿನಗೆ ಸರಿ ಅನ್ಸಿದಕ್ಕೆ ನಿಂತ್ಕೊ, ಏಕಾಂಗಿ ಆದ್ರೂ ಸರಿ’,”ನಾನ್‌ ಯಾವತ್ತು ಸೋತಿಲ್ಲ, ಗೆದ್ದಿದ್ದೀನಿ ಅಥವಾ ಕಲ್ತಿದ್ದೀನಿ’, “ಪವರ್‌ನ ಮಿಸ್‌ ಯೂಸ್‌ ಮಾಡೋರ್‌ ಜೊತೆ ಆಟ ಆಡೋ ಮಜಾನೇ ಬೇರೆ’,”ನನ್ನ ಕಾಲ ಮೇಲೆ ನಿಂತು ಸಾಯ್ತಿನೇ ಹೊರತು, ಮಂಡಿಯೂರಿ ಸಾಯಲ್ಲ’,” ಏಕಾಂಗಿ ಈ ಸೈನಿಕ, ಹೋರಾಟವೇ ಕಾಯಕ’ ಮತ್ತು “ನನ್ನ ಒಂದು ಗೇಮ್ ತರಹ ಟ್ರೀಟ್‌ ಮಾಡು, ಆಟ ಆಡೋದ್‌ ಹೇಗೆ ಅಂತ ತೋರಿಸ್ತೀನಿ’…

ಇವು “ರಾಜೇಂದ್ರ ಪೊನ್ನಪ್ಪ’ ಚಿತ್ರದ ಪೋಸ್ಟರ್‌ ಮೇಲಿರುವ ಡೈಲಾಗ್‌ಗಳು. ಅಂದಹಾಗೆ, ಈ ಚಿತ್ರಕ್ಕೆ ರಾಧಿಕಾ ಕುಮಾರಸ್ವಾಮಿ ನಾಯಕಿ. ಸದ್ಯಕ್ಕೆ ಈ ಚಿತ್ರದ ಮೇಲೆ ನಿರೀಕ್ಷೆ ಹೆಚ್ಚಿದೆ. ಕಾರಣ, ಯಶಸ್ಸು ಪಡೆದ “ದೃಶ್ಯ’ ಚಿತ್ರದಲ್ಲಿ ರವಿಚಂದ್ರನ್‌ ರಾಜೇಂದ್ರ ಪೊನ್ನಪ್ಪ ಹೆಸರಿನ ಪಾತ್ರ ನಿರ್ವಹಿಸಿದ್ದರು. ಈಗ ಅದೇ ಶೀರ್ಷಿಕೆಯನ್ನು ಇಟ್ಟು ಚಿತ್ರ ಮಾಡುತ್ತಿದ್ದಾರೆ.