ಶಿಕ್ಷಕರಿಗಾಗಿ ಹೊಸ ಕೋರ್ಸ್‌?

Team Udayavani, May 23, 2018, 6:00 AM IST

ನವ ದೆಹಲಿ: ರಾಷ್ಟ್ರಮಟ್ಟದಲ್ಲಿ ಪ್ರತಿಭಾನ್ವಿತ ಶಿಕ್ಷಕರನ್ನು ರೂಪಿಸಲು ಪದವಿ ಮಟ್ಟದಲ್ಲಿ ಬಿಎ.ಎಜುಕೇಷನ್‌ ಹಾಗೂ ಬಿಎಸ್‌ಸಿ. ಎಜುಕೇಷನ್‌ ಎಂಬ ನಾಲ್ಕು ವರ್ಷಗಳ ಅಂತರ್ಗತ ಕೋರ್ಸ್‌ಗಳನ್ನು ಸ್ಥಾಪಿಸಲು ಕೇಂದ್ರ ಸರ್ಕಾರದ ಸಮಿತಿ ಶಿಫಾರಸು ಮಾಡಿದೆ. ಈ ಪದವಿ ಕೋರ್ಸ್‌ಗಳ ಜವಾಬ್ದಾರಿಯನ್ನು ನೂತನವಾಗಿ ಸ್ಥಾಪಿಸಲಾಗುವ ರಾಷ್ಟ್ರೀಯ ಶಿಕ್ಷಕರ ಶಿಕ್ಷಣ ಸಂಸ್ಥೆ (ಎನ್‌ಐಟಿಇ) ವಹಿಸಿಕೊಳ್ಳಬೇಕೆಂದು ಸಮಿತಿ ಹೇಳಿದೆ.  

ಶಿಕ್ಷಕರಿಗಾಗಿಯೇ ಪ್ರತ್ಯೇಕ ವಿಶ್ವವಿದ್ಯಾಲಯವೊಂದನ್ನು ಸ್ಥಾಪಿಸಲು ಇಚ್ಛೆ ಪಟ್ಟಿದ್ದ ಕೇಂದ್ರ ಕಳೆದ ವರ್ಷ ತಜ್ಞರ ಸಮಿತಿ ನೇಮಿಸಿ, ಈ ಕುರಿತಂತೆ ಅಗತ್ಯ ಸಲಹೆಗಳನ್ನು ನೀಡುವಂತೆಯೂ, ವಿವಿಯಲ್ಲಿ ಆರಂಭಿಸಬಹುದಾದ ಕೋರ್ಸ್‌ಗಳ ಬಗ್ಗೆ ವರದಿ ಸಲ್ಲಿಸುವಂತೆಯೂ ಸೂಚಿಸಿತ್ತು. ಅದರಂತೆ, ವರದಿ ನೀಡಿರುವ ಸಮಿತಿ, ಪ್ರತ್ಯೇಕ ವಿವಿ  ಬದಲು ಎನ್‌ಐಟಿಇ ಸ್ಥಾಪನೆ, 4 ವರ್ಷಗಳ 2 ಅಂತರ್ಗತ ಕೋರ್ಸ್‌ಗಳ ಚಾಲನೆಗೆ ಶಿಫಾರಸು ಮಾಡಿದೆ. ಅವುಗಳು ಪ್ರಾಥಮಿಕ ಪೂರ್ವ ಮಟ್ಟದಿಂದ ಮಾಧ್ಯಮಿಕ, ಪ್ರೌಢ ಶಿಕ್ಷಣಗಳ ಅಗತ್ಯಕ್ಕೆ ತಕ್ಕಂತೆ ಶಿಕ್ಷಕರನ್ನು ರೂಪಿಸಲಿದೆ. ಕೋರ್ಸ್‌ಗಳ ಜತೆಗೆ, ಶಿಕ್ಷಕರಲ್ಲಿ ಬೋಧನಾ ಕೌಶಲ್ಯ ಹೆಚ್ಚಿಸಲು ತರಬೇತಿ ಶಿಬಿರಗಳನ್ನು ಎನ್‌ಐಇಟಿ ನಡೆಸಬೇಕೆಂದು ಸಮಿತಿ ಹೇಳದೆ.