ವಿವಾದದ “ಕ್ಲಿಪ್‌ ’ನಲ್ಲಿ ಫ‌ಡ್ನವೀಸ್‌

Team Udayavani, May 27, 2018, 6:00 AM IST

ಮುಂಬಯಿ: ಮಹಾರಾಷ್ಟ್ರದಲ್ಲಿ ಶಿವ ಸೇನೆ ಹಾಗೂ ಬಿಜೆಪಿಯ ಸಂಬಂಧ ದಿನ ಕಳೆದಂತೆ ಹಳ ಸುತ್ತಿರುವ ನಡುವೆಯೇ ಎರಡೂ ಪಕ್ಷಗಳ ನಡುವೆ “ಆಡಿಯೋ ಕ್ಲಿಪ್‌’ ವಿವಾದವೊಂದು ಭುಗಿಲೆದ್ದಿದೆ. 

ಇದೇ ತಿಂಗಳ 28ರಂದು ನಡೆಯಲಿರುವ ಪಾಲ್ಗರ್‌ ಲೋಕ ಸಭಾ ಕ್ಷೇತ್ರದ ಉಪ ಚುನಾವಣೆ ಹಿನ್ನೆಲೆಯಲ್ಲಿ, ಶಿವಸೇನೆಯನ್ನು ಬಗ್ಗುಬಡಿಯಲು ಮಹಾರಾಷ್ಟ್ರ ಸಿಎಂ ದೇವೇಂದ್ರ ಫ‌ಡ್ನವೀಸ್‌ ಬಿಜೆಪಿ ನಾಯಕರಿಗೆ ಪ್ರಚೋದನೆ ನೀಡಿದ್ದಾರೆ ಎಂದು ಶಿವಸೇನೆ ಆರೋಪಿಸಿದೆ. ಫ‌ಡ್ನವೀಸ್‌ ಅವರ ಆಡಿಯೋ ಕ್ಲಿಪ್‌ ಒಂದನ್ನು ಬಿಡುಗಡೆ ಮಾಡಿದ್ದು, ಈ ಸಂಬಂಧ ಚುನಾವಣಾ ಆಯೋಗಕ್ಕೆ ದೂರು ನೀಡುವುದಾಗಿ ಘೋಷಿಸಿದೆ. ಪಾಲ್ಗರ್‌ ಕ್ಷೇತ್ರದಲ್ಲಿ ನಡೆದ ಶಿವ ಸೇನೆಯ ರ್ಯಾಲಿಯಲ್ಲಿ ಉದ್ಧವ್‌ ಠಾಕ್ರೆ ಈ ಆಡಿಯೋ ಬಿಡುಗಡೆ ಮಾಡಿದ್ದರು. 

ಆದರೆ, ಇದಕ್ಕೆ ಸ್ಪಷ್ಟನೆ ನೀಡಿರುವ ಫ‌ಡ್ನವೀಸ್‌, ಆಡಿಯೋ ಕ್ಲಿಪ್‌ ತಮ್ಮದೇ ಆದರೂ, ಇದರಲ್ಲಿನ ಮಾತುಗಳನ್ನು ತಿರುಚಲಾಗಿದೆ. ತಾವು ಬಿಜೆಪಿ ಕಾರ್ಯಕರ್ತರನ್ನುದ್ದೇಶಿಸಿ ಮಾತನಾಡಿರುವ ಆಡಿಯೋ ಕ್ಲಿಪ್‌ ಅನ್ನು ಬಿಡುಗಡೆಗೊಳಿಸಿ, ಇದೇ ನಿಜವಾದ ಆಡಿಯೋ, ಶಿವ ಸೇನೆ ಬಿಡುಗಡೆ ಮಾಡಿರುವುದು ನಕಲಿ ಎಂದು ಆರೋಪಿಸಿದ್ದಾರೆ.