ವೀನಸ್‌ ಪರಾಭವ; ಮೊದಲ ದಿನವೇ ಆಘಾತಕಾರಿ ಸುದ್ದಿ

Team Udayavani, May 28, 2018, 6:30 AM IST

ಪ್ಯಾರಿಸ್‌: 2018ನೇ ಸಾಲಿನ ಫ್ರೆಂಚ್‌ ಓಪನ್‌ ಗ್ರ್ಯಾನ್‌ಸ್ಲಾಮ್‌ ಪಂದ್ಯಾವಳಿ ಭಾನುವಾರ ಆರಂಭವಾಗಿದೆ. ಮೊದಲ ದಿನವೇ ಆಘಾತಕಾರಿ ಫ‌ಲಿತಾಂಶವೊಂದು ದಾಖಲಾಗಿದೆ. ಖ್ಯಾತ ಆಟಗಾರ್ತಿ ವೀನಸ್‌ ವಿಲಿಯಮ್ಸ್‌ ಅವರು ಚೀನಾದ ವಾಂಗ್‌ ಕಿಯಾಂಗ್‌ ವಿರುದ್ಧ 4-6, 5-7ರಿಂದ ಸೋತು ಹೋಗಿದ್ದಾರೆ. ಮತ್ತೂಂದು ಕಡೆ ರಷ್ಯಾದ ಎಕಟೆರಿನಾ ಮಕರೋವಾ ಗೆದ್ದು ಸಂಭ್ರಮಿಸಿದ್ದಾರೆ.  ಅವರು ಮಹಿಳಾ ಸಿಂಗಲ್ಸ್‌ ಪಂದ್ಯದಲ್ಲಿ ಅವರು ಚೀನಾದ ಜೆಂಗ್‌ ಸೈಸೈ ಅವರನ್ನು 6-4, 6-1 ಅಂತರದಿಂದ ಮಣಿಸಿದರು.

29ರ ಹರೆಯದ ಮಕರೋವಾ 2 ಸಲ ಗ್ರ್ಯಾನ್‌ಸ್ಲಾಮ್‌ ಸೆಮಿಫೈನಲ್‌ ತನಕ ಸಾಗಿದ್ದು, ಮುಂದಿನ ಸುತ್ತಿನಲ್ಲಿ ಕುರುಮಿ ನಾರಾ (ಜಪಾನ್‌)-ಬಾಬೊìರಾ ಸ್ಟ್ರೈಕೋವಾ (ಚೆಕ್‌ ಗಣರಾಜ್ಯ) ನಡುವಿನ ವಿಜೇತರನ್ನು ಎದುರಿಸಲಿದ್ದಾರೆ.

ಪುರುಷರ ಸಿಂಗಲ್ಸ್‌ನಲ್ಲಿ ಮೊದಲ ಗೆಲುವು ಬಲ್ಗೇರಿಯಾದ ಗ್ರಿಗರ್‌ ಡಿಮಿಟ್ರೋವ್‌ ಪಾಲಾಗಿದೆ. ಅವರು 6-1, 6-4, 7-6 (7-1) ಅಂತರದಿಂದ ಈಜಿಪ್ಟ್ನ ಮೊಹಮ್ಮದ್‌ ಸಫಾÌತ್‌ಗೆ ಸೋಲುಣಿಸಿದರು. ಈವರೆಗೆ ಫ್ರೆಂಚ್‌ ಓಪನ್‌ನಲ್ಲಿ 3ನೇ ಸುತ್ತು ದಾಟದ ಡಿಮಿಟ್ರೋವ್‌ ಮೊದಲ ಸುತ್ತಿನಲ್ಲಿ ವಿಕ್ಟರ್‌ ಟ್ರಾಯಿಕಿ ಅವರನ್ನು ಎದುರಿಸಬೇಕಿತ್ತು. ಆದರೆ ಕಡೇ ಗಳಿಗೆಯಲ್ಲಿ ಗಾಯಾಳಾಗಿ ಹಿಂದೆ ಸರಿದುದರಿಂದ ಈಜಿಪ್ಟ್ನ ಸಫಾÌತ್‌ ಆಡುವ ಅವಕಾಶ ಪಡೆದರು.

ಇದೇ ವೇಳೆ ಆವೆಯಂಗಳದ ನೆಚ್ಚಿನ ಆಟಗಾರ ರಫಾಯೆಲ್‌ ನಡಾಲ್‌ ಅವರ ಮೊದಲ ಸುತ್ತಿನ ಎದುರಾಳಿ ಕೂಡ ಬದಲಾಗಿದ್ದಾರೆ. ಅಲೆಕ್ಸಾಂಡರ್‌ ಡೊಲ್ಗೊಪೊಲೋವ್‌ ಮಣಿಗಂಟಿನ ನೋವಿನಿಂದಾಗಿ ಕೂಟದಿಂದ ಹಿಂದೆ ಸರಿದರು. ಹೀಗಾಗಿ ಸೋಮವಾರ ತನ್ನ ಮೊದಲ ಸುತ್ತಿನ ಪಂದ್ಯದಲ್ಲಿ ನಡಾಲ್‌ ಇಟೆಲಿಯ “ಲಕ್ಕಿ ಲಾಸರ್‌’ ಸಿಮೋನ್‌ ಬೊಲೆಲ್ಲಿ ಅವರನ್ನು ಎದುರಿಸುವರು. ಬೊಲೆಲಿ ಶನಿವಾರದ ಅರ್ಹತಾ ಸುತ್ತಿನ ಪಂದ್ಯದಲ್ಲಿ ಕೊಲಂಬಿಯಾದ ಸ್ಯಾಂಟಿಯಾಗೊ ಗಿರಾಲ್ಡೊ ವಿರುದ್ಧ ಸೋಲನುಭವಿಸಿದ್ದರು. ನಡಾಲ್‌ ವಿರುದ್ಧ ಆಡಿದ ಹಿಂದಿನ 5 ಪಂದ್ಯಗಳಲ್ಲಿ ಬೊಲೆಲ್ಲಿ ಜಯಿಸಿದ್ದು ಒಂದು ಸೆಟ್‌ ಮಾತ್ರ.