ಮಂಕಿ ಮೆಹಮ್‌ಗೆ ಸಮಗ್ರ ಪ್ರಶಸ್ತಿ

Team Udayavani, Jun 2, 2018, 6:00 AM IST

ಮಂಗಳೂರು: ಜಮ್ಮು ಕಾಶ್ಮೀರದಲ್ಲಿ ಇತ್ತೀಚೆಗೆ ನಡೆದ ಎಂಐಎನ್‌ಎಫ್‌ ಸೀನಿಯರ್‌ ನ್ಯಾಶನಲ್‌ ಫೆಡರೇಶನ್‌ ಕಪ್‌ ಕ್ರೀಡಾಕೂಟದಲ್ಲಿ ಮಂಕಿ ಮೆಹಮ್‌ನ 11 ವಿದ್ಯಾರ್ಥಿಗಳು ಬೇರೆ ಬೇರೆ ವಿಭಾಗದಲ್ಲಿ 7 ಚಿನ್ನ, 1 ಬೆಳ್ಳಿ ಹಾಗೂ 4 ಕಂಚಿನ ಪದಕದೊಂದಿಗೆ ಸಮಗ್ರ ಪ್ರಶಸ್ತಿ ಪಡೆದುಕೊಂಡಿದ್ದಾರೆ.

ಈ ಬಗ್ಗೆ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದ ರಾಜ್ಯ ಮೂಯಿ ಥಾಯಿ ಅಸೋಸಿಯೇಶನ್‌ ಅಧ್ಯಕ್ಷ ರಾಜಗೋಪಾಲ್‌ ರೈ, ಈ ಕ್ರೀಡಾಕೂಟದಲ್ಲಿ ರಾಜ್ಯದ ಸುಮಾರು 30 ವಿದ್ಯಾರ್ಥಿಗಳು ಭಾಗವಹಿಸಿದ್ದರು. ಮಂಕಿ ಮೆಹಮ್‌ ಸಂಸ್ಥೆಯಿಂದ ಭಾಗವಹಿಸಿದ 13 ವಿದ್ಯಾರ್ಥಿಗಳಲ್ಲಿ 11 ವಿದ್ಯಾರ್ಥಿಗಳು ಪದಕ ಪಡೆಯುವುದರೊಂದಿಗೆ ಸಮಗ್ರ ಪ್ರಶಸ್ತಿ, ಇಬ್ಬರು ಮಹಿಳಾ ಕ್ರೀಡಾಳುಗಳು ಗ್ರೌಂಡ್‌ ಚಾಂಪಿಯನ್‌ ಮತ್ತು ಬೆಸ್ಟ್‌ ಫೈಟರ್‌ ಪ್ರಶಸ್ತಿ ಪಡೆದುಕೊಂಡಿದ್ದಾರೆ. ಕಳೆದ ಬಾರಿ ಜೈಪುರದಲ್ಲಿ ನಡೆದ ರಾಷ್ಟ್ರೀಯ ಚಾಂಪಿಯನ್‌ಶಿಪ್‌ನಲ್ಲಿ ಮಂಕಿ ಮೆಹಮ್‌ ಸಂಸ್ಥೆಯ ವಿದ್ಯಾರ್ಥಿಗಳು ದೇಶದಲ್ಲೇ ಪ್ರಥಮ ಸ್ಥಾನ ಗಳಿಸಿದ್ದರು ಎಂದರು.

ಕ್ರೀಡಾಕೂಟದ ಪುರುಷರ ವಿಭಾಗದಲ್ಲಿ ಅಂಕುಶ್‌ ಭಂಡಾರಿ, ಉವೈಝಲಿಹಾಲ್‌, ನಿತೇಶ್‌ ಕುಮಾರ್‌, ಸುಕೀರ್ತನ್‌ ಕೆ., ಫರ್ಜಿನ್‌ ಅಹಮ್ಮದ್‌ ಅವರು ವಿವಿಧ ವಿಭಾಗದಲ್ಲಿ ಚಿನ್ನ, ಲಿಯಾಂಡರ್‌ ಡಿ’ಸೋಜಾ ಬೆಳ್ಳಿ, ಶೋಧನ್‌ ಶೆಟ್ಟಿ ಕಂಚಿನ ಪದಕ ಪಡೆದಿದ್ದಾರೆ. ಮಹಿಳಾ ವಿಭಾಗದಲ್ಲಿ ಅನ್ವಿತಾ ಜೆ. ಆಳ್ವ, ಅನಿಶಾ ಆರ್‌. ಶೆಟ್ಟಿ ಚಿನ್ನ, ಚೆಲ್ಸಿಯಾ ಕೌರ್‌, ಶರೋನ್‌ ಮಾಥ್ಯೂ ಕಂಚು ಗೆದ್ದಿದ್ದಾರೆ.

ಮಹಾ ಕಾರ್ಯದರ್ಶಿ ನಿತೇಶ್‌ ಚಂದ್ರಕುಮಾರ್‌, ಕಾನೂನು ಸಲಹೆಗಾರ ರಾಘವೇಂದ್ರ ರಾವ್‌, ಉಪಾಧ್ಯಕ್ಷ ಮಹೇಶ್‌ ಕುಮಾರ್‌ ಡಿ. ಪಾಂಡ್ಯ, ಜತೆ ಕಾರ್ಯದರ್ಶಿ ಸಚಿನ್‌ ರಾಜ್‌ ರೈ ಉಪಸ್ಥಿತರಿದ್ದರು.