ವಿಧಾನಸೌಧದಲ್ಲಿ ಪರಮೇಶ್ವರ್‌ ವಾಸ್ತುಪೂಜೆ

Team Udayavani, Jun 4, 2018, 6:15 AM IST

ಬೆಂಗಳೂರು: ಉಪ ಮುಖ್ಯಮಂತ್ರಿ ಡಾ.ಜಿ.ಪರಮೇಶ್ವರ್‌ ಅವರು ವಿಧಾನಸೌಧದ ಕೊಠಡಿ ಸಂಖ್ಯೆ 327 ಹಾಗೂ 328ರಲ್ಲಿ ಭಾನುವಾರ ವಾಸ್ತುಪೂಜೆ ಮಾಡಿರುವುದುಕುತೂಹಲ ಮೂಡಿಸಿದೆ. ಪರಮೇಶ್ವರ್‌ ಹಾಗೂ ಪತ್ನಿ ಕನ್ನಿಕಾ ಅವರು ಅರ್ಚಕರ ಜತೆ ಆಗಮಿಸಿ, ಎರಡು ಗಂಟೆಗೂ ಹೆಚ್ಚು ಕಾಲ ಪೂಜೆ, ಹೋಮ, ಹವನ ನಡೆಸಿದರು.

ಈ ಸಂದರ್ಭದಲ್ಲಿ ಯಾರನ್ನೂ ಒಳಗೆ ಬಿಡದಂತೆ ಪೊಲೀಸರಿಗೆ ಸೂಚನೆ ನೀಡಲಾಗಿತ್ತು ಎಂದು ಹೇಳಲಾಗಿದೆ. ಉಪ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸುತ್ತಿದ್ದಂತೆ ಡಾ.ಜಿ.ಪರಮೇಶ್ವರ್‌ ಅವರು ಮೂರನೇ ಮಹಡಿಯಲ್ಲಿ ಮುಖ್ಯಮಂತ್ರಿ ಎಚ್‌.ಡಿ.ಕುಮಾರಸ್ವಾಮಿ ಕೊಠಡಿ ಸಮೀಪ ಸಚಿವರಿಗಾಗಿ ಮೀಸಲಿಟ್ಟಿರುವ ಕೊಠಡಿಗಳನ್ನು ಪರಿಶೀಲಿಸಿದ್ದರು. 

ವಿಶಾಲ ಹಾಗೂ ವಾಸ್ತು ಪ್ರಕಾರ ಇರುವುದನ್ನು ನೋಡಿ 327 ಹಾಗೂ 328ನೇ ಕೊಠಡಿಯನ್ನು ಆಯ್ಕೆ ಮಾಡಿಕೊಂಡಿದ್ದರು. ನಂತರ, ಕಳೆದ ಎರಡು ಮೂರು ದಿನಗಳಿಂದ ಮುಖ್ಯಮಂತ್ರಿ ಕುಮಾರಸ್ವಾಮಿ ನಡೆಸುತ್ತಿದ್ದ ಸಭೆಗಳಿಗೆ ಆಗಮಿಸಿದಾಗಲೂ ಅದೇ ಕೊಠಡಿಯಲ್ಲಿ ಇರುತ್ತಿದ್ದರು. ಇದೀಗ ಅಧಿಕೃತವಾಗಿ ಆ ಕೊಠಡಿಗಳನ್ನು ಪಡೆದು ಪೂಜೆ ನೆರವೇರಿಸಿದ್ದಾರೆ.