ಬೈದರೂ ಬೇಸರವಿಲ್ಲ, ಬಂದು ಪಂದ್ಯ ನೋಡಿ!

Team Udayavani, Jun 4, 2018, 8:43 AM IST

ಮುಂಬಯಿ: ನೀವು ನಮಗೆ ಬೈಯಿರಿ, ಉಗಿಯಿರಿ ಚಿಂತೆಯಿಲ್ಲ. ಆದರೆ ಮೈದಾನಕ್ಕೆ ಬಂದು ದಯವಿಟ್ಟು  ನಾವಾಡುವ ಪಂದ್ಯಗಳನ್ನು ನೋಡಿ… ಹೀಗೆಂದು ಅಭಿಮಾನಿಗಳಲ್ಲಿ ಮನವಿ ಮಾಡಿದ್ದು ಭಾರತ ಫ‌ುಟ್‌ಬಾಲ್‌ ತಂಡದ ನಾಯಕ ಸುನೀಲ್‌ ಚೆಟ್ರಿ. ಅವರು ಸಾಮಾಜಿಕ ಜಾಲತಾಣ ಫೇಸ್‌ಬುಕ್‌ನಲ್ಲಿ ಹೀಗೆಂದು ವೇದನೆಯಿಂದಲೇ ಕೇಳಿಕೊಂಡಿದ್ದಾರೆ. 

ಭಾರತ ಫ‌ುಟ್‌ಬಾಲ್‌ ಇಷ್ಟು ವರ್ಷವಾದರೂ ವಿಶ್ವ ಮಟ್ಟದಲ್ಲಿ ಮಹತ್ವದ ಸಾಧನೆ ಮಾಡಿಲ್ಲ. ಆದ್ದರಿಂದ ಭಾರತದ ಪಂದ್ಯಗಳಿಗೆ ಅಭಿಮಾನಿಗಳ ಕೊರತೆ ಕಾಡುತ್ತಿದೆ. ಬದಲಿಗೆ ಯೂರೋಪಿಯನ್‌ ಕ್ಲಬ್‌ಗಳ ಪಂದ್ಯಕ್ಕೆ ಈ ಅಭಿಮಾನಿಗಳು ಮುಗಿಬೀಳುತ್ತಾರೆ. ಇತ್ತೀಚೆಗೆ ಭಾರತ ತಂಡ ಚೈನೀಸ್‌ ತೈಪೆಯನ್ನು 5-0 ಗೋಲುಗಳಿಂದ ಉರುಳಿಸಿತ್ತು. ಮುಂಬಯಿಯಲ್ಲಿ ನಡೆದ ಈ ಪಂದ್ಯಕ್ಕೆ ಆಗಮಿಸಿದ್ದ ಅಭಿಮಾನಿಗಳ ಸಂಖ್ಯೆ ಬರೀ 2,500. ಅದೂ ಅಭಿಮಾನಿಗಳ ತಂಡವೊಂದು ಬಂದು ಕುಳಿತ್ತಿದ್ದರಿಂದ ಇದು ಸಾಧ್ಯವಾಗಿತ್ತು. 

ಇದರಿಂದ ಬೇಸತ್ತು ಸುನೀಲ್‌ ಚೆಟ್ರಿ ಮೇಲಿನ ಮಾತನ್ನು ಹೇಳಿದ್ದಾರೆ. ಚೆಟ್ರಿ ಮನವಿಗೆ ಭಾರತ ಕ್ರಿಕೆಟ್‌ ತಂಡದ ನಾಯಕ ವಿರಾಟ್‌ ಕೊಹ್ಲಿ ಕೂಡ ದನಿಗೂಡಿಸಿದ್ದಾರೆ.