ಜಲ ವಿದ್ಯುತ್‌ ಯೋಜನೆಗೆ ವಿರೋಧ

Team Udayavani, Jun 4, 2018, 4:19 PM IST

ಶಿವಮೊಗ್ಗ: ಶರಾವತಿ ಕಣಿವೆಯಲ್ಲಿ ಬೃಹತ್‌ ಭೂಗತ ಜಲವಿದ್ಯುತ್‌ ಯೋಜನೆ ಸರ್ವೇ ಕಾಮಗಾರಿಗೆ ಅರಣ್ಯ ಇಲಾಖೆ ಅನುಮತಿ ನೀಡಬಾರದೆಂಬುದು ಸೇರಿದಂತೆ ವಿವಿಧ ಬೇಡಿಕೆ ಈಡೇರಿಕೆಗೆ ಆಗ್ರಹಿಸಿ ವೃಕ್ಷಲಕ್ಷ ಆಂದೋಲನ ಕರ್ನಾಟಕ ವತಿಯಿಂದ ಶನಿವಾರ ಜಿಲ್ಲಾಡಳಿತಕ್ಕೆ ಮನವಿ ಸಲ್ಲಿಸಲಾಯಿತು.

ಶಿವಮೊಗ್ಗ ಹಾಗೂ ಉತ್ತರ ಕನ್ನಡ ಜಿಲ್ಲೆ ವ್ಯಾಪ್ತಿಯಲ್ಲಿ ಶರಾವತಿ ಕಣಿವೆಯಲ್ಲಿ ಕರ್ನಾಟಕ ಪವರ್‌ ಕಾರ್ಪೋರೇಷನ್‌ ನಿರ್ಮಿಸಲು ಉದ್ದೇಶಿರುವ ಭೂಗತ ಜಲವಿದ್ಯುತ್‌ ಯೋಜನೆಯ ಸಮೀಕ್ಷಾ ಕಾಮಗಾರಿ ಆರಂಭಿಸಲು ತಯಾರಿ ನಡೆದಿದೆ. ಯೋಜನೆ ಜಾರಿಯಾದರೆ ವನ್ಯ ಜೀವಿ, ಪರಿಸರ, ಜನಜೀವನದ ಮೇಲೆ ದುಷ್ಪರಿಣಾಮ ಬೀರಲಿದೆ ಎಂದು ಆತಂಕ ವ್ಯಕ್ತಪಡಿಸಿದರು. 

ಯೋಜನೆಗೆ ಅವಕಾಶ ನೀಡಿದಲ್ಲಿ ಶರಾವತಿ ಕಣಿವೆಯ ವನ್ಯಜೀವಿ ಹಾಗೂ ಅರಣ್ಯದ ಮೇಲೆ ನೇರವಾಗಿ ದುಷ್ಪರಿಣಾಮ ಬೀರಲಿದೆ. ಆದ್ದರಿಂದ ಭೂಗತ ಜಲವಿದ್ಯುತ್‌ ಯೋಜನೆಯ ಸಮೀಕ್ಷಾ ಕಾಮಗಾರಿಗಾಗಲೀ ಅಥವಾ ಡ್ರಿಲ್ಲಿಂಗ್‌ ಕಾಮಗಾರಿಗಾಗಲೀ ಅವಕಾಶ ಅಥವಾ ಒಪ್ಪಿಗೆ
ನೀಡಬಾರದು ಎಂದು ಒತ್ತಾಯಿಸಿದರು.

ಜೋಗ ಜಲಪಾತದ ಬಳಿ ಪರಿಸರ ವನ್ಯಜೀವಿ ಅರಣ್ಯ ಕಾಯ್ದೆ ಪರವಾನಗಿ ಇಲ್ಲದೇ ಅಣೆಕಟ್ಟು ನಿರ್ಮಾಣ ಮಾಡಬಾರದು. ಸರ್ವಋತು ಜೋಗ ಜಲಪಾತ ಯೋಜನೆ ಕುರಿತಂತೆ ಜನತೆಗೆ ಸರಿಯಾದ ಮಾಹಿತಿ ನೀಡಿಲ್ಲ. ಪ್ರವಾಸೋದ್ಯಮ ಇಲಾಖೆ ಯೋಜನೆ ರೂಪಿಸುವಾಗ ಸ್ಥಳೀಯ ಗ್ರಾಪಂನೊಂದಿಗೆ ಮಾತುಕತೆ ನಡೆಸಿಲ್ಲ.

ಯೋಜನೆ ಉದ್ದೇಶಿತ ಸ್ಥಳದ ಪಕ್ಕದಲ್ಲಿ ಶರಾವತಿ ಅಭಯಾರಣ್ಯವಿದೆ. ನದಿಯ ಎರಡೂ ದಂಡೆಗಳಲ್ಲಿ ಅರಣ್ಯ ಭೂಮಿ ಇದೆ. ಅರಣ್ಯ ಹಾಗೂ ಪರಿಸರ ಪರವಾನಗಿ ಇಲ್ಲದೇ ಯೋಜನೆ ಜಾರಿ ಮಾಡಿದರೆ ಅದು ಅಕ್ರಮವಾಗಿ ನಿರ್ಮಾಣಗೊಳ್ಳುವ ಯೋಜನೆಯಾಗುತ್ತದೆ. ಅಲ್ಲದೆ, ಪರಿಸರಕ್ಕೆ, ವನ್ಯಜೀವಿಗಳಿಗೆ, ಸುತ್ತಮುತ್ತಲಿನ ಜನರಿಗೆ ದುಷ್ಪರಿಣಾಮ ಬೀರಲಿದೆ. ಹೀಗಾಗಿ ಯೋಜನೆ ಜಾರಿಗೆ ಯಾವುದೇ ಕಾರಣಕ್ಕೂ ಅವಕಾಶ ನೀಡಬಾರದು ಎಂದು ಒತ್ತಾಯಿಸಿದರು. ಪಶ್ಚಿಮಘಟ್ಟ ಕಾರ್ಯಪಡೆ ನಿಕಟಪೂರ್ವ
ಅಧ್ಯಕ್ಷ ಹಾಗೂ ವೃಕ್ಷಲಕ್ಷ ಆಂದೋಲನ ಅಧ್ಯಕ್ಷ ಅನಂತ ಹೆಗಡೆ ಆಶೀಸರ, ಪರಿಸರ ಚಿಂತಕ ಪ್ರೊ| ಬಿ.ಎಂ. ಕುಮಾರಸ್ವಾಮಿ ಮತ್ತಿತರರಿದ್ದರು. 

ಡೀಮ್ಡ್ ಅರಣ್ಯ ರಕ್ಷಣೆಗೆ ಒತ್ತಾಯ ಜಿಲ್ಲೆಯ ಕಾನು ಅರಣ್ಯ, ಡೀಮ್ಡ್ ಅರಣ್ಯ, ರೆವೆನ್ಯೂ ಅರಣ್ಯ ರಕ್ಷಣೆಗೆ ಅಗತ್ಯ ಕ್ರಮ ಕೈಗೊಳ್ಳಬೇಕು. ರೆವೆನ್ಯೂ ಹಾಗೂ ಅರಣ್ಯ ಅಧಿಕಾರಿಗಳ ಸಭೆ ಏರ್ಪಡಿಸಬೇಕು ಎಂದು ವೃಕ್ಷಲಕ್ಷ ಆಂದೋಲನ ಅಧ್ಯಕ್ಷ ಅನಂತ ಹೆಗಡೆ ಆಶೀಸರ ಒತ್ತಾಯಿಸಿದರು. ಕಾನುಗಳ ಹೊಸ
ಅತಿಕ್ರಮಣ ತಡೆಯುವುದು, ಅತಿಕ್ರಮಣ ಆಗದೇ ಉಳಿದಿರುವ ಡೀಮ್ಡ್ ಅರಣ ರಕ್ಷಣೆಗೆ ನಾಮಫಲಕ, ಕಂದಕ ನಿರ್ಮಾಣ, ವನೀಕರಣ ಯೋಜನೆ ಜಾರಿಗೊಳಿಸಿದಲ್ಲಿ ಜಿಲ್ಲೆಯ ಒಂದು ಲಕ್ಷ ಎಕರೆ ಡೀಮ್ಡ್ ಅರಣ್ಯ ಉಳಿಸಲು ಸಾಧ್ಯವಾಗುತ್ತದೆ ಎಂದರು. ಜಾಗತಿಕ ಪರಿಸರ ದಿನವಾದ ಜೂ. 5 ರಂದು ಜಿಲ್ಲೆಯ ಕಾನು ಇತ್ಯಾದಿ ಡೀಮ್ಡ್ ಅರಣ್ಯ ರಕ್ಷಿಸುವ ವಿಶೇಷ ಅಭಿಯಾನವನ್ನು ಜಿಲ್ಲಾಡಳಿತ ಆರಂಭಿಸಬೇಕು ಎಂದು ಮನವಿ ಮಾಡಿದರು.

ಪರಿಸರ ದಿನಾಚರಣೆ ಅಂಗವಾಗಿ ಕಾನು ಉಳಿಸಿ ಹೋರಾಟ ಸಮಿತಿ ವತಿಯಿಂದ ಜೂ.5 ರಂದು ಸಾಗರ ತಾಲ್ಲೂಕು ನಾರಗೊಡು ಗ್ರಾಮದ ಕೊಪ್ಪದ ಕಾನುವಿನಲ್ಲಿ ವೃಕ್ಷಾರೋಪಣಾ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ. ಅನಂತ ಹೆಗಡೆ ಆಶೀಸರ