ತರಬೇತಿ ಶಿಬಿರಕ್ಕೆ  ಕ್ರಿಸ್ಟಿಯಾನೊ ರೊನಾಲ್ಡೊ

Team Udayavani, Jun 6, 2018, 6:00 AM IST

ಮಾಸ್ಕೊ: 2018ರ ವಿಶ್ವ ಕಪ್‌ ಫ‌ುಟ್ಬಾಲ್‌ ಕೂಟದ ಸಿದ್ಧತೆಗಾಗಿ ಖ್ಯಾತ ಆಟಗಾರ ಕ್ರಿಸ್ಟಿ ಯಾನೊ ರೊನಾಲ್ಡೊ ಪೋರ್ಚುಗಲ್‌ ತಂಡದ ತರಬೇತಿ ಶಿಬಿರಕ್ಕೆ ಸೇರ್ಪಡೆಯಾಗಿದ್ದಾರೆ. ಪೋರ್ಚುಗಲ್‌ ತಂಡವು ಸೋಚಿಯಲ್ಲಿ ಜೂ. 15ರಂದು ಸ್ಪೇನ್‌ ತಂಡವನ್ನು ಎದುರಿಸುವ ಮೂಲಕ ತನ್ನ ಅಭಿಯಾನ ಆರಂಭಿಸಲಿದೆ.

ಮೇ 26ರಂದು ನಡೆದ ಚಾಂಪಿಯನ್ಸ್‌ ಲೀಗ್‌ ಫೈನಲ್‌ ಕೂಟದ ಬಳಿಕ ರಿಯಲ್‌ ಮ್ಯಾಡ್ರಿಡ್‌ ತಂಡದ ತಾರೆ ಕೆಲವು ದಿನ ವಿಶ್ರಾಂತಿಯಲ್ಲಿದ್ದರು. ಚಾಂಪಿಯನ್ಸ್‌ ಲೀಗ್‌ ಫೈನಲ್‌ನಲ್ಲಿ ಲಿವರ್‌ಪೂಲ್‌ ವಿರುದ್ಧ ಬ್ಲ್ಯಾಂಕೋಸ್‌ ಗೆಲುವು ಸಾಧಿಸಿತ್ತು. ರೊನಾಲ್ಡೊ ಸೋಮವಾರ ತಂಡದ ತರಬೇತಿ ಸ್ಥಳಕ್ಕೆ ಆಗಮಿಸಿ ಶಿಬಿರದಲ್ಲಿ ಪಾಲ್ಗೊಂಡರು.

ವಿಶ್ವದ ಶ್ರೇಷ್ಠ ಫ‌ುಟ್ಬಾಲರ್‌ಗೆ ನೀಡಲಾಗುವ ಬಾಲನ್‌ ಡಿ’ಆರ್‌ ಪ್ರಶಸ್ತಿಯನ್ನು ಐದು ಬಾರಿ ಗೆದ್ದಿರುವ ರೊನಾಲ್ಡೊ ತಂಡದಲ್ಲಿದ್ದರೆ ಪೋರ್ಚು ಗಲ್‌ ಹೊಸ ಉತ್ಸಾಹದಿಂದ ಆಡಲಿದೆ. ಅವರ ಬಲದಿಂದಲೇ ಪೋರ್ಚುಗಲ್‌ ಹಲವು ಪಂದ್ಯಗಳಲ್ಲಿ ಜಯಭೇರಿ ಬಾರಿಸಿದ ಉದಾಹರಣೆಗಳಿವೆ. 
ಈಗ ನಮ್ಮದು ಪರಿಪೂರ್ಣ ತಂಡವಾಗಿದೆ. ಅವರು ನಮ್ಮ ಪಾಲಿಗೆ ಹೊಸ ಸ್ಫೂರ್ತಿ ನೀಡುವ ಆಟಗಾರ, ವಿಶ್ವಶ್ರೇಷ್ಠ ಆಟಗಾರ ನಮ್ಮ ಜತೆಗಿದ್ದಾರೆ ಮತ್ತು ಅವರ ಜತೆ ಆಡುವ ಮೂಲಕ ನಾವು ಸಾಕಷ್ಟು ವಿಷಯ ಕಲಿಯಲಿದ್ದೇವೆ ಎಂದು ಪೋರ್ಚುಗಲ್‌ ತಂಡದ ಸದಸ್ಯ ಜೊವೊ ಮಾಟಿನ್ಹೊ ಹೇಳಿದ್ದಾರೆ.

ಗುರುವಾರ ನಡೆಯುವ ಅಭ್ಯಾಸ ಪಂದ್ಯದಲ್ಲಿ ಪೋರ್ಚುಗಲ್‌ ತಂಡವು ಅಲ್ಜೀರಿಯ ತಂಡವನ್ನು ಎದುರಿಸಲಿದೆ. ಈ ಪಂದ್ಯದಲ್ಲಿ ರೊನಾಲ್ಡೊ ಆಡಲಿದ್ದಾರೆ. ಪೋರ್ಚು ಗಲ್‌ ಈ ಮೊದಲು ಆಡಿದ ಪಂದ್ಯದಲ್ಲಿ ಟ್ಯುನಿಶಿಯಾ ವಿರುದ್ಧ 2-2 ಗೋಲುಗಳಿಂದ ಡ್ರಾ ಸಾಧಿಸಿತ್ತು.