ಕಾನೂನಾತ್ಮಕ ಭಡ್ತಿ ಮೀಸಲಿಗೆ ಸಿಕ್ಕಿತು ಅಸ್ತು

Team Udayavani, Jun 6, 2018, 4:05 AM IST

ಹೊಸದಿಲ್ಲಿ: ಕಾನೂನು ಪ್ರಕಾರವಾಗಿ ನಡೆಸುವ ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ವರ್ಗದ ನೌಕರರ ಭಡ್ತಿ ಮೀಸಲಾತಿಗೆ ಸುಪ್ರೀಂ ಕೋರ್ಟ್‌ ಹಸಿರು ನಿಶಾನೆ ತೋರಿದೆ. ಸುಪ್ರೀಂ ಕೋರ್ಟ್‌ ಬುಧವಾರ ನೀಡಿರುವ ಈ ಮಹತ್ವದ ತೀರ್ಪಿನಿಂದ ಕೇಂದ್ರ ಸರಕಾರ ನಿಟ್ಟುಸಿರು ಬಿಟ್ಟಿದೆ. ಈಗಿನ ನಿಯಮಾವಳಿಯಂತೆ ಕಾನೂನು ಬದ್ಧವಾಗಿ ಭಡ್ತಿ ಮೀಸಲಾತಿ ಅವಕಾಶ ಮುಂದುವರಿಸಲು ಒಪ್ಪಿಗೆ ವ್ಯಕ್ತಪಡಿಸಿದೆ.

ಈ ಮೂಲಕ ಮೀಸಲಾತಿ ವಿಚಾರವಾಗಿ 2015ರಲ್ಲಿ ವಿವಿಧ ಹೈಕೋರ್ಟ್‌ಗಳು ಮತ್ತು ಸರ್ವೋಚ್ಚ ನ್ಯಾಯಾಲಯವೂ ನೀಡಿರುವ ತೀರ್ಪಿನಿಂದಾದ ಗೊಂದಲಕ್ಕೆ ತೆರೆ ಎಳೆದಿದೆ. ವಿವಿಧ ಪ್ರಕರಣಗಳಿಗೆ ಸಂಬಂಧಿಸಿದ ತೀರ್ಪುಗಳಿಂದಾಗಿ ಗೊಂದಲ ಸೃಷ್ಟಿಯಾಗಿದೆ. ಇದರಿಂದಾಗಿ ಕೇಂದ್ರ ನೌಕರರಿಗೆ ಭಡ್ತಿ ನೀಡುವ ವಿಚಾರ ದಲ್ಲಿಯೂ ಯಾವುದೇ ನಿರ್ಣಯ ತೆಗೆದುಕೊಳ್ಳಲು ಸಾಧ್ಯವಾಗುತ್ತಿಲ್ಲ ಎಂದು ಸರಕಾರ ಸುಪ್ರೀಂಗೆ ಅರ್ಜಿ ಸಲ್ಲಿಸಿತ್ತು. ಮಂಗಳವಾರ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಪೀಠ, ಭಡ್ತಿ ಮೀಸಲಾತಿಗೆ ಅವಕಾಶ ಕಲ್ಪಿಸುವಂತೆ ಸರಕಾರಕ್ಕೆ ಸೂಚಿಸಿತ್ತು.