ಪ್ರೌಢಿಮೆ ಅನಾವರಣಗೊಳಿಸಿದ ಸಂಗೀತ ಕಛೇರಿ

Team Udayavani, Jun 15, 2018, 6:00 AM IST

ವಿಟ್ಲ ಸನಿಹದ ಅಳಿಕೆಯ ಶ್ರೀ ಆದಿ ಧನ್ವಂತರಿ ಕ್ಷೇತ್ರ ಪದ್ಮಗಿರಿ, ಜೆಡ್ಡು ಇಲ್ಲಿ ನೂತನವಾಗಿ ನಿರ್ಮಾಣಗೊಂಡ ಶಿಲಾಮಯ ಧನ್ವಂತರಿ ಕ್ಷೇತ್ರದ ಪ್ರತಿಷ್ಠಾಬಂಧ ಬ್ರಹ್ಮಕಲಶೋತ್ಸವದ ಸಂದರ್ಭದಲ್ಲಿ ಕೀರ್ತಿಶೇಷ ಚಕ್ರಕೋಡಿ ನಾರಾಯಣ ಶಾಸ್ತ್ರಿಗಳ ಶಿಷ್ಯೆ ಸಂಗೀತ ವಿದುಷಿ ಶಕುಂತಳಾ ಕೃಷ್ಣ ಭಟ್‌ ಕುಂಚಿನಡ್ಕ ಇವರಿಂದ ಕರ್ನಾಟಕ ಶಾಸ್ತ್ರೀಯ ಸಂಗೀತ ಕಛೇರಿ ನಡೆಯಿತು. 

 ಅಭೋಗಿ ರಾಗದ ವರ್ಣ “ಎವರಿಬೋದ’ದೊಂದಿಗೆ ಕಛೇರಿ ಆರಂಭವಾಯಿತು. ಮಲಹರಿ ರಾಗದ ಚಿಕ್ಕ ಆಲಾಪನೆಯ ನಂತರ “ಪಂಚ ಮಾತಂಗ’ ಕೃತಿ ಸ್ವರ ಪ್ರಸ್ತಾರದೊಂದಿಗೆ ಮನಸೆಳೆಯಿತು. ಅನಂತರ ಕಲ್ಯಾಣ ವಸಂತರಾಗದ ಆಲಾಪನೆಯೊಂದಿಗೆ ನಾರಾಯಣ ಶಾಸ್ತ್ರಿಗಳ ಕೃತಿ “ಭಜಮನಸಾ ಶ್ರೀ’ ಇಂಪಾಗಿ ಮೂಡಿ ಬಂತು. ಪ್ರತಿ ಮಾಧ್ಯಮ ರಾಗವಾದ ಪೂರ್ವಿ ಕಲ್ಯಾಣಿಯ “ಜ್ಞಾನಮು ನಗರಾದ’ ಕೃತಿ ಆಲಾಪನೆ, ನೆರವಲ್‌, ಸ್ವರ ಪ್ರಸ್ತಾರದೊಂದಿಗೆ ಮನಮುದಗೊಳಿಸಿತು.

ಈ ಧನ್ವಂತರಿ ಕ್ಷೇತ್ರದ ಕುರಿತು ತಾವೇ ರಚಿಸಿದ “ಪದ್ಮಗಿರಿ ವಾಸಶ್ರೀ ಧನ್ವಂತರಿ ಶಂಕ ಚಕ್ರ ಅಮೃತಧಾರಿ’ ಎಂಬ ರಾಗಂ ತಾನಂ ಪಲ್ಲವಿಯ ತೋಡಿ ರಾಗದಲ್ಲಿ ಆಲಾಪನೆ, ತಾನ, ನೆರವಲ್‌, ರಾಗ ಬೇಧದೊಡನೆ ಸ್ವರ ಪ್ರಸ್ತಾರದೊಂದಿಗೆ ಪ್ರೌಢ ರೀತಿಯಲ್ಲಿ ಮೂಡಿ ಬಂದು ಮಂತ್ರ ಮುಗ್ಧಗೊಳಿಸಿತು. ಪುರಂದರ ದಾಸರ ದೇವರ ನಾಮ “ಭಿನ್ನಹಕೆ ಬಾಯಿಲ್ಲವಯ್ಯ’ ರಾಗ ಮಾಲಿಕೆಯಲ್ಲಿ ತೇಲಿಬಂತು. ಭೈರವಿ ರಾಗದಲ್ಲಿ ಅಗ್ರೇಪಶ್ಯಾಮಿ ತೇಜೋ… ಶ್ಲೋಕದೊಂದಿಗೆ ಪುರಂದರದಾಸರಪದ ” ಓಡಿ ಬಾರೈಯ’ ಮನ ತಟ್ಟಿತು. ಸಿಂಧು ಭೈರವಿ ರಾಗದಲ್ಲಿ ಅಣುವಿಗೆ ಅಣುವಾಗಿ ಉಗಾಭೋಗದೊಂದಿಗೆ “ಯಾಕೆ ನೀನಿಲ್ಲಿ ಪವಡಿಸಿದೆ ಹರಿಯೆ’ ದೇವರನಾಮ ಈ ಕ್ಷೇತ್ರದಲ್ಲಿ ಅರ್ಥವತ್ತಾಗಿ ಮೂಡಿಬಂತು. ಕನಕದಾಸರ “ಹಸಿವರಿತು ತಾಯಿ ನನ್ನ’ ಉಗಾಬೋಗ ಮಧ್ಯಮಾವತಿ ರಾಗದಲ್ಲಿ ನಿರೂಪಿತವಾಯಿತು. 

ಸಾಂಪ್ರದಾಯಿಕ “ಪವಮಾನ’ ಮಂಗಳ ದೊಂದಿಗೆ ಸಂಗೀತ ಕಛೇರಿ ಕೊನೆಗೊಂಡಿತು. ಇದು ಹಿರಿಯ ತಲೆಮಾರಿನ ಶಕುಂತಲಾ ಕೃಷ್ಣ ಭಟ್‌ ತಮ್ಮ ಗಾಢ ಸಂಗೀತ ಜ್ಞಾನವನ್ನು ಪೂರ್ಣವಾಗಿ ಅನಾವರಣಗೊಳಿಸಿದ ಕಛೇರಿ ಎನಿಸಿತು. ಸುಮಾರು 2 ಗಂಟೆಗಳ ಕಾಲ ಮೂಡಿಬಂದ ಕಛೇರಿಗೆ ಪಕ್ಕವಾದ್ಯದಲ್ಲಿ ವಯಲಿನ್‌ ವಾದ್ಯದಲ್ಲಿನ ವಿ| ವೇಣುಗೋಪಾಲ ಶ್ಯಾನುಭಾಗ್‌, ಮೃದಂಗದಲ್ಲಿ ವಿ| ಬಾಲಕೃಷ್ಣ ಹೊಸಮನೆ, ಮೋರ್ಸಿಂಗ್‌ನಲ್ಲಿ ಅಮೃತ ನಾರಾಯಣ ಹೊಸಮನೆ ಸಹಕರಿಸಿದರು. 

ಗೀತಾ ಸಾರಡ್ಕ