ಹೆಚ್ಚುತ್ತಿರುವ ಉದ್ವಿಗ್ನತೆ ನಡುವೆ ಅಮೆರಿಕ ರಕ್ಷಣಾ ಸಚಿವ ಚೀನಕ್ಕೆ

Team Udayavani, Jun 25, 2018, 11:54 AM IST

ವಾಷಿಂಗ್ಟನ್‌ : ಅಮೆರಿಕ – ಚೀನ ನಡುವಿನ ಹಲವಾರು ದ್ವಿಪಕ್ಷೀಯ ವಿಷಯಗಳಿಗೆ ಸಂಬಂಧಿಸಿ ಉಂಟಾಗಿರುವ ಭಿನ್ನಮತದ ನಡುವೆಯೇ ಅಮೆರಿಕದ ರಕ್ಷಣಾ ಸಚಿವ ಜೇಮ್ಸ್‌ ಮ್ಯಾಟಿಸ್‌ ಅವರು ಇದೇ ಜೂನ್‌ 26ರಿಂದ 28ರ ತನಕ ಚೀನಕ್ಕೆ ಭೇಟಿ ನೀಡಲಿದ್ದಾರೆ. 

ದಕ್ಷಿಣ ಚೀನ ಸಮುದ್ರ ಕುರಿತ ಚೀನ ನೀತಿ ಮತ್ತು ತೈವಾನ್‌ಗೆ ಶಸ್ತ್ರಾಸ್ತ್ರ ಮಾರಾಟ ಮಾಡುವ ಅಮೆರಿಕ ನೀತಿ ಗಳಿಂದಾಗಿ ಉಭಯ ದೇಶಗಳ ನಡುವಿನ ಬಿಕ್ಕಟ್ಟು ಪರಾಕಾಷ್ಠೆ ತಲುಪುತ್ತಿರುವ ನಡುವೆಯೇ ನಡೆಯುವ ಈ ಅಮೆರಿಕ ರಕ್ಷಣಾ ಸಚಿವರ ಈ ಭೇಟಿಯು ವಿಶೇಷವಾದ ಜಾಗತಿಕ ಮಹತ್ವವನ್ನು ಪಡೆದುಕೊಂಡಿದೆ.

ಅಂದ ಹಾಗೆ ಅಮೆರಿಕ ರಕ್ಷಣಾ ಸಚಿವರಾಗಿ ಮ್ಯಾಟಿಸ್‌ ಅವರು ಚೀನಕ್ಕೆ ನೀಡುತ್ತಿರುವ ಮೊದಲ ಭೇಟಿ ಇದಾಗಿದೆ. ನಾಲ್ಕು ದಿನಗಳ ಈ ಭೇಟಿಯಲ್ಲಿ ಮ್ಯಾಟಿಸ್‌ ಅವರು ದಕ್ಷಿಣ ಕೊರಿಯಕ್ಕೂ ಹೋಗಲಿದ್ದಾರೆ. ಅಲ್ಲಿ ಅವರು ದ.ಕೊರಿಯದ ರಾಷ್ಟ್ರೀಯ ರಕ್ಷಣಾ ಸಚಿವ ಸಾಂಗ್‌ ಯೂಂಗ್‌ ಮೂ ಅವರನ್ನು ಭೇಟಿಯಾಗಿ ಅನಂತರ ಜಪಾನಿಗೆ ತೆರಳಲಿದ್ದಾರೆ.ಅಲ್ಲಿ  ಅವರು ಜಪಾನ್‌ ರಕ್ಷಣಾ ಸಚಿವ ಇತ್ಸುನೋರಿ ಒನೊದೆರಾ ಅವರನ್ನು ಭೇಟಿಯಾಗಲಿದ್ದಾರೆ.