18 ವರ್ಷಗಳಿಂದ ಡಾಮರು ಕಾಣದ ಪಾಂಡವರಕಲ್ಲು ರಸ್ತೆ

Team Udayavani, Jun 26, 2018, 2:45 AM IST

ಪುಂಜಾಲಕಟ್ಟೆ: ಬಂಟ್ವಾಳ- ಬೆಳ್ತಂಗಡಿ ತಾಲೂಕುಗಳ ಎರಡು ಗ್ರಾಮಗಳನ್ನು ಸಂಪರ್ಕಿಸುವ ಪಾಂಡವರಕಲ್ಲು- ಬೆರ್ಕಳ ಗ್ರಾಮೀಣ ಸಂಪರ್ಕ ರಸ್ತೆ ಸಂಪೂರ್ಣ ಹದಗೆಟ್ಟಿದೆ. ಬಂಟ್ವಾಳ ತಾಲೂಕಿನ ಬಡಗಕಜೆಕಾರು ಮತ್ತು ಬೆಳ್ತಂಗಡಿ ತಾಲೂಕಿನ ಕುಕ್ಕಳ ಗ್ರಾಮವನ್ನು ಸಂಪರ್ಕಿಸುವ ಈ ರಸ್ತೆ ಸುಮಾರು 4 ಕಿ.ಮೀ. ಉದ್ದವಿದ್ದು, ನೀರಾರಿಯಿಂದ ಬೆರ್ಕಳವನ್ನು ಸೇರುತ್ತದೆ. ಇದಕ್ಕೆ ಸಂಪೂರ್ಣ ಡಾಮರು ಕಾಮಗಾರಿಯಾಗಿ ಸುಮಾರು 18 ವರ್ಷಗಳು ಕಳೆದಿವೆ ಎಂದು ಸಾರ್ವಜನಿಕರು ಹೇಳುತ್ತಿದ್ದಾರೆ. ಈ ರಸ್ತೆ ಜನ ಹಾಗೂ ವಾಹನ ಸಂಚಾರಕ್ಕೆ ಅಯೋಗ್ಯವಾಗಿದ್ದು, ಪರಸ್ಪರ ಸಂಪರ್ಕ ಶೋಚನೀಯವಾಗಿದೆ.

ಕಾಂಕ್ರೀಟ್‌ ಸೂಕ್ತ
18 ವರ್ಷಗಳ ಹಿಂದೆ ಕೆ.ಎ. ಸತೀಶ್ಚಂದ್ರ ಬಂಟ್ವಾಳ ತಾಲೂಕು ಪಂಚಾಯತ್‌ ಅಧ್ಯಕ್ಷರಾಗಿದ್ದಾಗ ಈ ರಸ್ತೆ ಡಾಮರು ಕಂಡಿತ್ತು. ಕಳೆದ ಬಾರಿ ನೀರಾರಿಯಿಂದ ಮಿತ್ತೂಟ್ಟುವರೆಗೆ ಸ್ವಲ್ಪ ತೇಪೆ ಕಾರ್ಯ ನಡೆದಿತ್ತು. ನಾಲ್ಕು ವರ್ಷಗಳ ಹಿಂದೆ ಈ ರಸ್ತೆ ಅಭಿವೃದ್ಧಿಗಾಗಿ ವಿಸ್ತರಣೆ ಕಾಮಗಾರಿಗಾಗಿ ರಸ್ತೆ ಬದಿಯ ಮರಗಳನ್ನು ತೆಗೆಯಲಾಗಿತ್ತು. ಆದರೆ ರಸ್ತೆ ಅಭಿವೃದ್ಧಿಯಾಗಿಲ್ಲ, ಇದೀಗ ಕಲ್ಲಿನ ಕೋರೆಗಳ ಘನ ವಾಹನಗಳ ಸಂಚಾರ, ಮಳೆ ನೀರಿನ ಕಾರಣದಿಂದ ಡಾಮರು ಕಿತ್ತು ಹೋಗಿ ರಸ್ತೆ ಹೊಂಡ- ಗುಂಡಿಗಳಿಂದ ತುಂಬಿದೆ. ರಸ್ತೆಗೆ ಪೂರ್ಣವಾಗಿ ಕಾಂಕ್ರೀಟ್‌ ಅಳವಡಿಸಿದರೆ ಮಾತ್ರ ಮುಂದೆ ಸಂಚಾರಕ್ಕೆ ಅನುಕೂಲವಾಗಬಹುದು ಎನ್ನುವುದು ಸಾರ್ವಜನಿಕರ ಅಭಿಪ್ರಾಯ.

ಹತ್ತಿರದ ದಾರಿ
ಈ ರಸ್ತೆಯಲ್ಲಿ ದಿನ ನಿತ್ಯ ವಿದ್ಯಾರ್ಥಿಗಳು, ಸಾರ್ವಜನಿಕರು ಪ್ರಯಾಣಿಸುತ್ತಿದ್ದು, ಕೆಸರು, ಹೊಂಡಗಳಿಂದಾಗಿ ರಿಕ್ಷಾದವರೂ ಸಂಚರಿಸಲು ಹಿಂದೇಟು ಹಾಕುತ್ತಿದ್ದಾರೆ. ಕಟ್ಟದಪಡ್ಪು ಕಡೆಯಿಂದ ಮಡಂತ್ಯಾರಿಗೆ, ಕಕ್ಯಪದವಿಗೆ ಇದು ಹತ್ತಿರದ ದಾರಿಯಾಗಿದ್ದು, ಸರಿಪಡಿಸಿದಲ್ಲಿ ಬಹಳ ಅನುಕೂಲವಾಗುತ್ತದೆ ಎಂದು ಗ್ರಾಮಸ್ಥರು ಅಭಿಪ್ರಾಯಿಸಿದ್ದಾರೆ.