ಪೊಲೀಸರು ನೋಟಿಸ್‌ ನೀಡಬಹುದೇ?

Team Udayavani, Jun 26, 2018, 12:11 PM IST

ಬೆಂಗಳೂರು: ರಾಜಧಾನಿಯಲ್ಲಿ ಬಾರ್‌ ಆಂಡ್‌ ರೆಸ್ಟೊರೆಂಟ್‌ ಹಾಗೂ ಪಬ್‌ಗಳ ಕಾರ್ಯಚಟುವಟಿಕೆಗೆ ಸಂಬಂಧಿಸಿದಂತೆ ಅನುಮತಿ ನೀಡುವ ಹಾಗೂ ನಿರ್ಬಂಧಿಸಲು ನೋಟಿಸ್‌ ನೀಡಲು ಪೊಲೀಸರಿಗೆ ಇರುವ ಅಧಿಕಾರ ವಿಚಾರ ಇದೀಗ ಹೈಕೋರ್ಟ್‌ ಅಂಗಳ ತಲುಪಿದೆ.

ಪರಿಚಾರಕಿಯರು ಮದ್ಯ ಪೂರೈಸಲು ಅವಕಾಶವಿರುವ ಬಾರ್‌ ಆಂಡ್‌ ರೆಸ್ಟೋರೆಂಟ್‌ ಹಾಗೂ ಪಬ್‌ಗಳಿಗೆ ನಾನಾ ರೀತಿಯ ನಿರ್ಬಂಧ ವಿಧಿಸಲಾಗಿದೆ. ಕಟ್ಟಡ ಸ್ವಾಧೀನ ಪ್ರಮಾಣ ಪತ್ರ ಸೇರಿದಂತೆ ಹಲವು ನಿರಾಕ್ಷೇಪಣಾ ಪತ್ರ ಹೊಂದಿರುವ ವಿಚಾರದಲ್ಲಿ ಪೊಲೀಸ್‌ ಇಲಾಖೆಯಿಂದ ಅನಗತ್ಯ ಕಿರಕುಳ ನೀಡಲಾಗುತ್ತಿದೆ ಎಂದು ಪಬ್‌ ಹಾಗೂ ಬಾರ್‌ ಆಂಡ್‌ ರೆಸ್ಟೋರೆಂಟ್‌ ಮಾಲೀಕರು ನ್ಯಾಯಲಯದ ಮೊರೆ ಹೋಗಿದ್ದಾರೆ.

ಸಾರ್ವಜನಿಕ ಸ್ಥಳಗಳಲ್ಲಿ ಮನರಂಜನಾ ಕಾರ್ಯಕ್ರಮಗಳಿಗೆ ಅನುಮತಿ ನೀಡುವ ಹಾಗೂ ನಿಯಂತ್ರಿಸುವ ಸಂಬಂಧ 2005ರಲ್ಲಿ ಹೊರಡಿಸಿದ್ದ ಆದೇಶವನ್ನು ಸುಪ್ರೀಂಕೋರ್ಟ್‌ ಜನವರಿ ತಿಂಗಳಿನಲ್ಲಿ ಎತ್ತಿಹಿಡಿದಿತ್ತು. ಈ ಬೆನ್ನಲ್ಲೇ ನಿಯಮಗಳನ್ನು ಉಲ್ಲಂ ಸಲಾಗಿದೆ ಎಂಬ ಆಕ್ಷೇಪಣೆಯೊಂದಿಗೆ ಪೊಲೀಸರು ನೀಡಿದ್ದ ನೋಟಿಸ್‌ ಪ್ರಶ್ನಿಸಿ ನಗರದ ಹಲವು ಬಾರ್‌ ಆಂಡ್‌ ರೆಸ್ಟೋರೆಂಟ್‌ ಹಾಗೂ ಲೈವ್‌ಬ್ಯಾಂಡ್‌ ಮಾಲೀಕರು ಹೈಕೋರ್ಟ್‌ಗೆ ಅರ್ಜಿ ಸಲ್ಲಿಸಿದ್ದಾರೆ.

ನಿಯಮಾನುಸಾರ ಪರವಾನಿಗೆ ಹೊಂದಿಲ್ಲ ಹಾಗೂ ಕಟ್ಟಡ ಸ್ವಾಧೀನ ಪ್ರಮಾಣಪತ್ರ ಹೊಂದಿಲ್ಲ ಎಂಬ ಕಾರಣ ನೀಡಿ ಪೊಲೀಸರು ನೀಡಿದ್ದ ನೋಟಿಸ್‌ನ ಕಾನೂನು ಮಾನ್ಯತೆಯನ್ನು ಪ್ರಶ್ನಿಸಿ ಲವರ್ ನೈಟ್‌ ಪಬ್‌ ಸೇರಿ ಹಲವು ಪಬ್‌, ಬಾರ್‌ ರೆಸ್ಟೋರೆಂಟ್‌ ಮಾಲೀಕರು ಅರ್ಜಿ ಸಲ್ಲಿಸಿದ್ದಾರೆ. ಈ ಅರ್ಜಿಗಳ ವಿಚಾರಣೆಯನ್ನು ಕೆಲಕಾಲ ನಡೆಸಿದ  ನ್ಯಾಯಮೂರ್ತಿ ಅರವಿಂದಕುಮಾರ್‌ ಅವರಿದ್ದ ಏಕಸದಸ್ಯ ಪೀಠ, ಮಂಗಳವಾರಕ್ಕೆ ವಿಚಾರಣೆ ಮುಂದೂಡಿತು. 

ಏನಿದು ವಿವಾದ?: ಬೆಂಗಳೂರಿನಲ್ಲಿ  ಈ ಹಿಂದೆ ಪರಿಚಾರಕಿಯರು ಮದ್ಯ ಪೂರೈಸುವ ಬಾರ್‌ ಅಂಡ್‌ ರೆಸ್ಟೋರೆಂಟ್‌ಗಳು 174 ಇದ್ದವು. ಅಲ್ಲಿನ ನಿಯಮಾವಳಿ ಪಾಲಿಸುತ್ತಿಲ್ಲ ಎಂದು ಕೆಲ ಕಾಲ ಪೊಲೀಸರು ಬಂದ್‌ ಮಾಡಿಸಿದ್ದರು. ಆಗ ಕೆಲವರು ನ್ಯಾಯಾಲಯ ಮೊರೆ ಹೋಗಿದ್ದರಿಂದ ಸುಪ್ರೀಂಕೋರ್ಟ್‌ ಮಾರ್ಗಸೂಚಿ ಪ್ರಕಾರ ಕೆಲವೊಂದು ನಿಬಂಧನೆ ವಿಧಿಸಿ ಪರಿಚಾರಕಿಯರು ಮದ್ಯ ಪೂರೈಸಲು ಅವಕಾಶ ನೀಡಲಾಯಿತು.

ಪೊಲೀಸ್‌ ಇಲಾಖೆಯ ಮಾರ್ಗಸೂಚಿಯನ್ನು  19 ಬಾರ್‌ ಅಂಡ್‌ ರೆಸ್ಟೋರೆಂಟ್‌ ಹಾಗೂ ಪಬ್‌ಗಳು ಪಾಲಿಸಲು ಸಾಧ್ಯವಾದ ಕಾರಣ ಅಷ್ಟಕ್ಕೆ ಮಾತ್ರ ಅನುಮತಿ ದೊರೆತಿತ್ತು. ಉಳಿದಂತೆ 64 ಹೆಚ್ಚು ಬಾರ್‌ ಅಂಡ್‌ ರೆಸ್ಟೋರೆಂಟ್‌ ಹಾಗೂ ಪಬ್‌ಗಳಲ್ಲಿ ಆನುಮತಿ ಇಲ್ಲದಿದ್ದರೂ ಅನಧಿಕೃತವಾಗಿ ಪರಿಚಾರಕಿಯರು ಮದ್ಯ ಪೂರೈಕೆ ಮಾಡುತ್ತಿದ್ದಾರೆ ಎಂಬ ದೂರುಗಳು ಇವೆ.

ಇವುಗಳ ನಿಯಂತ್ರಣಕ್ಕೆ ಆಯಾ ಪೊಲೀಸ್‌ ಠಾಣೆ ಇನ್ಸ್‌ಪೆಕ್ಟರ್‌ಗಳಿಗೆ ನಗರ ಪೊಲೀಸ್‌ ಆಯುಕ್ತರು ಮೌಖೀಕ ಸೂಚನೆ ಸಹ ನೀಡಿದ್ದಾರೆ. ಆದರೆ, ಇತ್ತೀಚೆಗೆ ಪರಿಚಾರಕಿಯರು ಮದ್ಯ ಪೂರೈಸಲು ಅನುಮತಿ ಇರುವ ಬಾರ್‌ ಅಂಡ್‌ ರೆಸ್ಟೋರೆಂಟ್‌ ಹಾಗೂ ಪಬ್‌ಗಳಲ್ಲಿ ಕೆಲವೆಡೆ ನಿಯಮ ಉಲ್ಲಂ ಸಲಾಗಿದೆ ಎಂದು ನೋಟಿಸ್‌ ಜಾರಿ ಮಾಡಲಾಗಿತ್ತು.  ಇಂತಹ ಬಾರ್‌ ಅಂಡ್‌ ರೆಸ್ಟೋರೆಂಟ್‌ ಹಾಗೂ ಪಬ್‌ಗಳಲ್ಲಿ ಲಘು ಸಂಗೀತಕ್ಕೆ ಅವಕಾಶ ಇದೆಯಾ?

ಡಿಜೆ ಇರಬಹುದಾ? ದೊಡ್ಡ ಪರದೆ ಟಿವಿ ಅಳವಡಿಸಬಹುದಾ? ದೊಡ್ಡ ದೊಡ್ಡ ಧ್ವನಿವರ್ಧಕ ಅಳವಡಿಸಬಹುದಾ? ಎಂಬಿತ್ಯಾದಿ ಪ್ರಶ್ನೆಗಳು ಇದ್ದು, ಈ ವಿಚಾರದಲ್ಲಿ ಸ್ಪಷ್ಟತೆ ಇಲ್ಲ ಎಂದು ಹೇಳಲಾಗಿದೆ. ಆದರೆ, ನಾವು ನಿಯಮ ಪಾಲಿಸಿದರೂ ಅನಗತ್ಯ ಕಿರುಕುಳ ನೀಡಲಾಗುತ್ತಿದೆ ಎಂಬುದು ಬಾರ್‌ ಮತ್ತು ಪಬ್‌ ಮಾಲೀಕರ ಆರೋಪ.

ನಿಷೇಧ: ಈ ಹಿಂದೆ ಬೆಂಗಳೂರಿನಲ್ಲಿ ಲೈವ್‌ಬ್ಯಾಂಡ್‌ ಹಾಗೂ ಡ್ಯಾನ್ಸ್‌ಬಾರ್‌ಗಳಿಗೆ ಅವಕಾಶವಿತ್ತು. ಆದರೆ, ಅವುಗಳಿಂದ ಕಾನೂನು ಸುವ್ಯವಸ್ಥೆ ಪಾಲನೆ ಕಷ್ಟವಾಗುತ್ತಿದೆ ಎಂದು ನಗರ ಪೊಲೀಸ್‌ ಆಯುಕ್ತರು ಸುತ್ತೋಲೆ ಹೊರಡಿಸಿ ಬಂದ್‌ ಮಾಡಿಸಿದ್ದರು. ಸಾಕಷ್ಟು ಒತ್ತಡ ಇದ್ದರೂ ಆಗಿನ ಸರ್ಕಾರವೂ ಮಣಿದಿರಲಿಲ್ಲ.