ಸುಳ್ಯ: ತಾಲೂಕಿನೆಲ್ಲೆಡೆ ದಿನವಿಡೀ ಅಬ್ಬರದ ಮಳೆ 

Team Udayavani, Jun 28, 2018, 10:48 AM IST

ಸುಳ್ಯ : ತಾಲೂಕಿನ ನಾನಾ ಭಾಗಗಳಲ್ಲಿ ದಿನವಿಡಿ ಭಾರೀ ಮಳೆಯಾಗಿದೆ. ಸುಳ್ಯ ನಗರ, ಬೆಳ್ಳಾರೆ, ಸುಬ್ರಹ್ಮಣ್ಯ, ಗುತ್ತಿಗಾರು, ಜಾಲ್ಸೂರು, ಮಂಡೆಕೋಲು, ಐವರ್ನಾಡು ಮೊದಲಾದ ಕಡೆಗಳಲ್ಲಿ ಧಾರಾಕಾರ ಮಳೆಯಾಗಿದೆ. ಕೆರೆ, ಬಾವಿಗಳು ತುಂಬಿದ್ದು, ನದಿ, ಹೊಳೆ, ತೋಡುಗಳಲ್ಲಿ ನೀರಿನ ಹರಿವಿನ ಪ್ರಮಾಣ ಅಧಿಕವಾಗಿತ್ತು.

ಕಳೆದ ಒಂದು ವಾರಕ್ಕೆ ಹೋಲಿಸಿದರೆ ಬುಧವಾರ ಮಳೆ ಅಬ್ಬರ ಹೆಚ್ಚಾಗಿತ್ತು. ಗಾಳಿ, ಗುಡುಗು ಸಹಿತ ಮಳೆಯಾಗಿದೆ. ಸುಬ್ರಹ್ಮಣ್ಯ ಸಹಿತ ನಾನಾ ಭಾಗಗಳಲ್ಲಿ ವಿದ್ಯುತ್‌ ವ್ಯತ್ಯಯಗೊಂಡಿತ್ತು. ನಗರದ ಜಟ್ಟಿಪಳ್ಳದ ಬಳಿ ಚರಂಡಿ ಅವ್ಯವಸ್ಥೆಯಿಂದ ವಿಶ್ವ ಕಾಂಪ್ಲೆಕ್ಸ್‌ನ ನೆಲ ಮಾಳಿಗೆಯ ಕೊಠಡಿಗಳಿಗೆ ಮುಳುಗಡೆ ಭೀತಿ ಎದುರಾಯಿತು. ಹಳೆಗೇಟು ಬಳಿ ನೀರು ತುಂಬಿ ಕೆರೆಯಂತಾಗಿತ್ತು. ಪೈಚಾರು ಬಳಿ ಹೊಂಡ ತುಂಬಿ ಸಂಚಾರವೇ ದುಸ್ತರವೆನಿಸಿದೆ. ಪೆರಾಜೆ ಗ್ರಾಮದ ನಿಡ್ಯಮಲೆ ಸಂಪರ್ಕ ರಸ್ತೆಗೆ ಧರೆ ಕುಸಿದು ಸಂಪರ್ಕ ಕಡಿತಗೊಂಡಿತ್ತು.