ಮುಂಗುಸಿ ಬಾಯಿಂದ ನಾಗರಹಾವು ರಕ್ಷಣೆ!

Team Udayavani, Jul 2, 2018, 2:05 AM IST

ಸುಬ್ರಹ್ಮಣ್ಯ: ಮುಂಗುಸಿ ದಾಳಿಯಿಂದ ನಾಗರ ಹಾವೊಂದನ್ನು ಸ್ಥಳೀಯರು ರವಿವಾರ ಜಾಲ್ಸೂರಿನ ಬೊಳುಬೈಲು ಎಂಬಲ್ಲಿ ರಕ್ಷಿಸಿದ್ದಾರೆ. ಮಧ್ಯಾಹ್ನದ ವೇಳೆ ನಾಗರ ಹಾವನ್ನು ಮುಂಗುಸಿಯೊಂದು ಅಟ್ಟಿಸಿಕೊಂಡು ಬಂತು. ಇದನ್ನು ಗಮನಿಸಿದ ದಿನೇಶ್‌ ಮಠ ಹಾಗೂ ಕೇಶವ ಜಬಳೆ ಎಂಬುವರು ಮುಂಗುಸಿಯವನ್ನು ಓಡಿಸಿ, ಹಾವನ್ನು ಕಾಪಾಡಿದ್ದಾರೆ. ಹೆದ್ದಾರಿ ಮಧ್ಯೆ ಹಾವು ದಿಕ್ಕೆಟ್ಟಿರುವುದನ್ನು ಅರಿತ ಸ್ಥಳೀಯರು ವಾಹನಗಳ ಸಂಚಾರವನ್ನು ತಾತ್ಕಾಲಿಕವಾಗಿ ತಡೆ ಹಿಡಿದು ಹಾವು ಕಾಡಿಗೆ ಮರಳಲು ಅನುವು ಮಾಡಿಕೊಟ್ಟರು. ಕೆಲವರು ಹಾವಿಗೆ ಭಕ್ತಿಯಿಂದ ನಮಿಸಿದರು. ಅರ್ಧ ತಾಸು ಹೆಡೆ ಅರಳಿಸಿ ಸಿಂಬೆ ಸುತ್ತಿ ಕುಳಿತಿದ್ದ ಹಾವು, ಬಳಿಕ ಮೆಲ್ಲನೆ ಕಾಡಿನಲ್ಲಿ ಮರೆಯಾಯಿತು.

ಈ ಪರಿಸರದ ನಾಗನಕಟ್ಟೆ ಸಮೀಪ ಆಗಾಗ ಹಾವುಗಳು ಕಾಣಿಸಿಕೊಳ್ಳುತ್ತಿವೆ. ಮೂರು ವರ್ಷಗಳ ಹಿಂದೆ ಬೊಳುಬೈಲು ನಾಗನಕಟ್ಟೆ ಪ್ರತಿಷ್ಠೆ ಸಂದರ್ಭದಲ್ಲೇ ದರ್ಶನ ನೀಡಿತ್ತು. ಇಲ್ಲಿಂದ ಒಂದು ಕಿ.ಮೀ. ದೂರದ ಎಡ್ಕಾರು ಎಂಬಲ್ಲಿ ಪ್ರಸಿದ್ಧ ಶ್ರೀ ಸುಬ್ರಹ್ಮಣ್ಯ ಸ್ವಾಮಿ ದೇವಸ್ಥಾನವೂ ಇದೆ. ನಾಗಾರಾಧನೆ ಹಾಗೂ ನಾಗದೋಷ ನಿವಾರಣೆಗೂ ಈ ದೇಗುಲ ಪ್ರಸಿದ್ಧಿ ಪಡೆದಿದೆ.