ವಿಶ್ವದಲ್ಲೇ ಪ್ರಥಮ: ಚೀನದಿಂದ ಸ್ಟಾರ್‌ ವಾರ್‌ ಗನ್‌, 1 ಕಿ.ಮೀ.ಗುರಿ

Team Udayavani, Jul 2, 2018, 4:23 PM IST

ಬೀಜಿಂಗ್‌:  ಮಿಲಿಟರಿ ದೈತ್ಯ ಶಕ್ತಿಯನ್ನು ಹೊಂದಿರುವ ಚೀನ ಇದೀಗ ವಿಶ್ವದಲ್ಲೇ ಸರ್ವ ಪ್ರಥಮವಾಗಿ ಲೇಸರ್‌ ಬೀಮ್‌ “ಸ್ಟಾರ್‌ ವಾರ್‌ ಗನ್‌” ಗಳನ್ನು ಅಭಿವೃದ್ಧಿ ಪಡಿಸಿದೆ. 

ಝಡ್‌ಕೆಝಡ್‌ಎಂ-500 ಎಂಬ ಸಂಕೇತ ನಾಮವನ್ನು ಹೊಂದಿರವ ಈ ಸ್ಟಾರ್‌ ವಾರ್‌ ಗನ್‌ ಒಂದು ಕಿ.ಮೀ. ವ್ಯಾಪ್ತಿಯಲ್ಲಿ ತನ್ನ ಗುರಿಯನ್ನು ಕ್ಷಣಾರ್ಧದಲ್ಲಿ ಭೇದಿಸಬಲ್ಲುದು. 

ಎನರ್ಜಿ ಬೀಮ್‌ ಬಳಸುವ ಈ ಗನ್‌ ಫೈರಿಂಗ್‌ ಗೆ ಗುರಿಯಗುವ ವ್ಯಕ್ತಿಯು ಕ್ಷಣಾರ್ಧದಲ್ಲಿ ಸುಟ್ಟು ಕರಕಲಾಗುತ್ತಾನೆ; ಆತನ ಚರ್ಮ, ಜೀವಕೋಶಗಳು ಭಸ್ಮವಾಗಿ ಹೋಗುತ್ತವೆ ಎಂದು ವರದಿಗಳು ತಿಳಿಸಿವೆ.

ಸೌತ್‌ ಚೈನಾ ಮಾರ್ನಿಂಗ್‌ ಪೋಸ್ಟ್‌’ ವರದಿಯ ಪ್ರಕಾರ ಈ ಸ್ಟಾರ್‌ ವಾರ್‌ ಗನ್‌ ಎನ್ನುವುದು ಲೇಸರ್‌ ಅಸಾಲ್ಟ್ ರೈಫ‌ಲ್‌ ಆಗಿದೆ.  ಸ್ಟಾರ್‌ ವಾರ್‌ ಸರಣಿ ಚಲನಚಿತ್ರಗಳಲ್ಲಿ ಈ ಬಗೆಯ ಲೇಸರ್‌ ಬೀಮ್‌ ಗನ್‌ಗಳನ್ನು ವೈಜ್ಞಾನಿಕ ಪರಿಕಲ್ಪನೆಯ ರೂಪದಲ್ಲಿ ತೋರಿಸಲಾಗಿತ್ತು. 

ಇದೀಗ ಚೀನ ಈ ಬಗೆಯ ಲೇಸರ್‌ ಬೀಮ್‌ ಗನ್‌ಗಳನ್ನು ತನ್ನ ಸಂಶೋಧನೆಯ ಮೂಲಕ ಸಾಕ್ಷಾತ್ಕರಿಸಿದೆ. ವಿಶ್ವದ ಸರ್ವಪ್ರಥಮ ಸ್ಟಾರ್‌ ವಾರ್‌ ಗನ್‌ ವಿನ್ಯಾಸಗೊಳಿಸಿ ಪರಿಚಯಿಸಿರುವ ಮೊದಲ ದೇಶ ಎಂಬ (ಅಪ) ಖ್ಯಾತಿಗೆ ಪಾತ್ರವಾಗಿದೆ. 

ಎಕೆ 47 ಗನ್‌ಗಳನ್ನು ಬಹುವಾಗಿ ಹೋಲುವ ಈ ಲೇಸರ್‌ ಬೀಮ್‌ ಗನ್‌ಗಳು ಸುಮಾರು ಮೂರು ಕಿಲೋ ತೂಗುತ್ತವೆ. ಆದರೆ ಪರಿಣಾಮದಲ್ಲಿ ಈ ಲೇಸರ್‌ ಬೀಮ್‌ ಗನ್‌ಗಳನ್ನು ಮೀರಿಸುವ ಗನ್‌ಗಳು ವಿಶ್ವದಲ್ಲಿ ಎಲ್ಲಿಯೂ, ಯಾವ ದೇಶದ ಬಳಿಯೂ ಈ ವರೆಗೆ ಇಲ್ಲ. 

ಈ ಲೇಸರ್‌ ಬೀಮ್‌ ಗನ್‌ ಮೂಲಕ ಫೈರಿಂಗ್‌ ಮಾಡಿದಾಗ ಸಾಮಾನ್ಯ ಕಣ್ಣಿಗೆ ಅದರಿಂದ ಹೊರಡುವ ಜ್ವಲನ ಶಕ್ತಿಯು ಕಾಣುವುದೇ ಇಲ್ಲ. 

ಒಂದು ಬಾರಿಗೆ ಎರಡು ಸೆಕೆಂಡುಗಳ ಕಾಲ ಫೈರಿಂಗ್‌ ಮಾಡಬಲ್ಲ ಈ ಲೇಸರ್‌ ಬೀಮ್‌ ಗನ್‌ನಿಂದ 1,000 ಸಲ ಫೈರಿಂಗ್‌ ಮಾಡಬಹುದಾಗಿದೆ. ಈ ಗನ್‌ಗಳನ್ನು ಕಾರು, ಬೋಟುಗಳು, ವಿಮಾನಗಳ ಮೇಲ್ಭಾಗಕ್ಕೆ ಜೋಡಿಸಿ ವೈವಿಧ್ಯಮಯ ಕಾರ್ಯಾಚರಣೆಗಳಲ್ಲಿ ಅತ್ಯಂತ ಪರಿಣಾಮಕಾರಿಯಾಗಿ ಬಳಸಬಹುದಾಗಿದೆ ಎಂದು ಮೂಲಗಳು ತಿಳಿಸಿವೆ.