ಅಭಿಮಾನಿಗಳ ಸಮ್ಮುಖದಲ್ಲಿ ಗಣೇಶ್‌ ಹುಟ್ಟುಹಬ್ಬ

Team Udayavani, Jul 3, 2018, 11:15 AM IST

ನಟ ಗಣೇಶ್‌ ಸೋಮವಾರ ಅಭಿಮಾನಿಗಳ ಸಮ್ಮುಖದಲ್ಲಿ ತಮ್ಮ 39 ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಂಡರು. ಸೋಮವಾರ ಮಧ್ಯರಾತ್ರಿಯಿಂದಲೇ ಅಭಿಮಾನಿಗಳು ಗಣೇಶ್‌ ಮನೆಗೆ ತೆರಳಿ ಶುಭಾಶಯ ಕೋರಿದ್ದು ವಿಶೇಷವಾಗಿತ್ತು. ಮುಂಜಾನೆಯಿಂದಲೇ ಅವರ ಮನೆ ಎದುರು ಸಾಲುಗಟ್ಟಿ ನಿಂತಿದ್ದ ಅಭಿಮಾನಿಗಳು, ಹೂವಿನ ಹಾರ ಹಿಡಿದು ತಮ್ಮ ನೆಚ್ಚಿನ ನಾಯಕನ ಕೊರಳಿಗೆ ಹಾಕುವ ಮೂಲಕ ಶುಭಾಶಯ ಕೋರಿದರು.

ಅಭಿಮಾನಿಗಳು ತಂದಿದ್ದ ವಿವಿಧ ಬಗೆಯ ಕೇಕ್‌ ಕತ್ತರಿಸಿದ ಗಣೇಶ್‌ ಅವರಿಗೆ ಕೇಕ್‌ ತಿನ್ನಿಸುವ ಮೂಲಕ ಅವರ ಜೊತೆ ಫೋಟೋಗೆ ಫೋಸ್‌ ಕೊಟ್ಟು ಇಡೀ ದಿನ ಅಭಿಮಾನಿಗಳ ಜೊತೆ ಕಳೆದರು. ಗಣೇಶ್‌ ಹುಟ್ಟುಹಬ್ಬದ ಹಿನ್ನೆಲೆಯಲ್ಲಿ ಗಣೇಶ್‌ ಅಭಿನಯದ ಹೊಸ ಚಿತ್ರ “ಗೀತಾ’ ಚಿತ್ರದ ಪೋಸ್ಟರ್‌ ಬಿಡುಗಡೆ ಮಾಡಲಾಯಿತು. ಅವರ ಮನೆಯ ಮುಂದೆ ‘ಗೀತಾ’ ಚಿತ್ರದ ಕಟೌಟ್‌ ಹಾಕಿದ್ದು ಈ ಹುಟ್ಟುಹಬ್ಬದ ವಿಶೇಷ.

ಇನ್ನು, ಗಣೇಶ್‌ ಬರ್ಥ್ಡೇ ಅಂಗವಾಗಿ ಪ್ರಶಾಂತ್‌ರಾಜ್‌ ನಿರ್ದೇಶನದ “ಆರೆಂಜ್‌’ ಚಿತ್ರದ ಟೀಸರ್‌ ಕೂಡ ಬಿಡುಗಡೆ ಮಾಡಲಾಯಿತು. ಈ ಸಂದರ್ಭದಲ್ಲಿ ಶಿಲ್ಪಾ ಗಣೇಶ್‌ ಕೂಡ ಗಣೇಶ್‌ ಅವರಿಗೆ ಕೇಕ್‌ ತಿನ್ನಿಸಿ ಶುಭಹಾರೈಸಿದರು. ನಿರ್ದೇಶಕ ಪ್ರಶಾಂತ್‌ರಾಜ್‌, ನಿರ್ಮಾಪಕ ನವೀನ್‌, ಸೈಯದ್‌ ಸಲಾಮ್‌ ಸೇರಿದಂತೆ ಚಿತ್ರರಂಗದ ಅನೇಕ ನಿರ್ಮಾಪಕರು, ನಿರ್ದೇಶಕರು, ಕಲಾವಿದರು ಆಗಮಿಸಿ, ಶುಭಾಶಯ ಕೋರಿದರು.