ಮುಂಬಯಿ:300 ಮಂದಿಗೆ ಜಲದಿಗ್ಬಂಧನ

Team Udayavani, Jul 10, 2018, 6:00 AM IST

ಮುಂಬಯಿ: ಮುಂಬಯಿ ಮತ್ತೆ ಭಾರಿ ಮಳೆಯ ಅನಾಹುತಕ್ಕೆ ತುತ್ತಾಗಿದೆ. ಸೋಮವಾರ ಮುಂಬಯಿಯ ಹಲವು ಭಾಗಗಳಲ್ಲಿ ಸುರಿದ ವಿಪರೀತ ಮಳೆ ಜನಜೀವನವನ್ನು ಅಸ್ತವ್ಯಸ್ಥಗೊಳಿಸಿದೆ. ರಸ್ತೆಗಳು, ರೈಲು ಮಾರ್ಗಗಳು ನೀರಿನಲ್ಲಿ ಮುಳುಗಿದ್ದು, ಜನರು ಹೊರಬರಲಾರದ ಸ್ಥಿತಿ ಉಂಟಾಗಿದೆ. ಪಾಲ್ಗಾರ್‌ ಜಿಲ್ಲೆಯ ವಸಾೖನಲ್ಲಿ ತಗ್ಗು ಪ್ರದೇಶದಲ್ಲಿ ವಾಸಿಸುತ್ತಿದ್ದ ಸುಮಾರು 300 ಜನರು ಮನೆಗಳಲ್ಲೇ ಬಂಧಿಗಳಾಗಿದ್ದು, ಹೊರಜಗತ್ತಿನ ಸಂಪರ್ಕ ಕಡಿದುಹೋಗಿದೆ.

ಈ ಮಳೆಗಾಲದಲ್ಲಿ ಈವರೆಗೆ ಸುರಿದ ಮಳೆಯ ಪೈಕಿ ಸೋಮವಾರವೇ ಅತಿ ಹೆಚ್ಚಾಗಿತ್ತು. ಕೊಲಾಬಾ ಅಬ್ಸರ್ವೇಟರಿ ದಾಖಲೆಯ ಪ್ರಕಾರ 24 ಗಂಟೆಗಳಲ್ಲಿ 170.6 ಮಿ.ಮೀ ಮಳೆ ಸುರಿದಿದೆ. ಮುಂಬಯಿನ ಬಹುತೇಕ ರಸ್ತೆಗಳಲ್ಲಿ ಮಳೆಯಿಂದಾಗಿ ವಾಹನ ಸಂಚಾರ ಅಸ್ತವ್ಯಸ್ತವಾಗಿದೆ. ರಸ್ತೆಗಳ ಗುಂಡಿಗಳೂ ವಾಹನ ಸಂಚಾರರಿಗೆ ಇನ್ನಷ್ಟು ಭೀತಿ ಮೂಡಿಸಿವೆ. ಸೋಮವಾರ ಮುಂಬಯಿಯ ಎಲ್ಲ ಶಾಲೆಗಳಿಗೆ ರಜೆ ನೀಡಲಾಗಿದ್ದು, ಪರೀಕ್ಷೆಗಳನ್ನೂ ಮುಂದೂಡಲಾಗಿದೆ.ಕುರ್ಲಾ, ಸಿಯೋನ ಮತ್ತು ದಾದರ್‌, ಮೀರಾ ರೋಡ್‌, ನಲ್ಲಸೋಪಾರಾ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ನೀರು ನಿಂತಿದೆ. ಮಂಗಳವಾರವೂ ಮಳೆ ಮುಂದುವರಿಯಬಹುದು ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.

ಕಲಾಪಕ್ಕೂ ಮಳೆ ಅಡ್ಡಿ: ನಾಗ್ಪುರದಲ್ಲಿ ನಡೆಯುತ್ತಿರುವ ಮಳೆಗಾಲದ ಅಧಿವೇಶನಕ್ಕೂ ಮಳೆ ಬಾಧಿಸಿತು. ಕಳೆದ ವಾರ ಭಾರಿ ಮಳೆಯಿಂದಾಗಿ ವಿಧಾನಸಭೆ ಕಟ್ಟಡದೊಳಕ್ಕೆ ನೀರು ನುಗ್ಗಿದ ಪ್ರಕರಣದ ತನಿಖೆ ನಡೆಸಲು ಆದೇಶಿಸಲಾಗಿದೆ. ಶುಕ್ರವಾರ ವಿದ್ಯುತ್‌ ಅಭಾವದಿಂದಾಗಿ ಕಲಾಪವೂ ಮುಂದೂಡಿಕೆಯಾಗಿತ್ತು.

ಬೈಕ್‌ನಿಂದ ಬಿದ್ದು ಸಾವನ್ನಪ್ಪಿದ ಮಹಿಳೆ‌:  ಹೊಂಡಗಳೇ ತುಂಬಿದ ರಸ್ತೆಯಲ್ಲಿ ಬೈಕ್‌ನ ಹಿಂಬದಿ ಕುಳಿತಿದ್ದ ಮಹಿಳೆ ಬಿದ್ದು, ಬಸ್‌ ಚಕ್ರಕ್ಕೆ ಸಿಲುಕಿ ಸಾವನ್ನಪ್ಪಿದ ಘಟನೆ ಭಾನುವಾರ ನಡೆದಿದೆ. ಈ ದೃಶ್ಯಾವಳಿ ಸಿಸಿಟಿವಿಯಲ್ಲಿ ದಾಖಲಾಗಿದ್ದು, ಸರಕಾರ ಹಾಗೂ ಪಾಲಿಕೆಯ ಮೇಲೆ ಜನರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಮುಂಬಯಿನ ಕಲ್ಯಾಣ್‌ ಪ್ರದೇಶದಲ್ಲಿ ಶಾಲೆಯಿಂದ ಮನೆಗೆ ಕುಟುಂಬ ಸದಸ್ಯರ ಬೈಕ್‌ನಲ್ಲಿ ಮನಿಶಾ ಭೋಯರ್‌ ತೆರಳುತ್ತಿದ್ದರು. ಮಳೆಯಿಂದ ರಕ್ಷಣೆಗೆ ಛತ್ರಿ ಹಿಡಿದುಕೊಂಡಿದ್ದರು. ರಸ್ತೆ ನೀರು ತುಂಬಿತ್ತು. ಹೊಂಡ ಕಾಣದ್ದರಿಂದ ಬೈಕ್‌ ಹೊಂಡಕ್ಕಿಳಿದಾಗ ಆಯ ತಪ್ಪಿ ಇಬ್ಬರೂ ಬಿದ್ದಿದ್ದರು. ಈ ವೇಳೆ ಮನಿಶಾ ಮೇಲೆ ಪಕ್ಕದಲ್ಲೇ ಸಂಚರಿಸುತ್ತಿದ್ದ ಬಸ್‌ ಹತ್ತಿದ್ದು, ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ. ಬೈಕ್‌ ಓಡಿಸುತ್ತಿದ್ದ ಸಂಬಂಧಿ ಹಾಗೂ ಸ್ಥಳೀಯರು ನೆರವಿಗೆ ಧಾವಿಸಿದರಾದರೂ ಪ್ರಯೋಜನವಾಗಲಿಲ್ಲ.

ರೈಲು, ಬಸ್‌ ನಿಲ್ದಾಣಗಳು ಭಣಭಣ
ಬೃಹನ್ಮುಂಬಯಿ ಸಾರಿಗೆ ಸಂಸ್ಥೆಯ ಬಸ್‌ಗಳು ವಿಪರೀತ ಮಳೆಯ ಮಧ್ಯೆಯೂ ಸಂಚರಿಸುತ್ತಿವೆ. ಆದರೆ ಯಾವ ಬಸ್‌ಗಳೂ ಸಮಯಕ್ಕೆ ಸರಿಯಾಗಿ ಸಾಗುತ್ತಿಲ್ಲ. ಇನ್ನೊಂದೆಡೆ ಸಬರ್ಬನ್‌ ರೈಲುಗಳೆಲ್ಲವೂ 15 ರಿಂದ 20 ನಿಮಿಷಗಳಷ್ಟು ವಿಳಂಬವಾಗಿ ಓಡಾಡುತ್ತಿವೆ.   ಗುಜರಾತ್‌ ಹಾಗೂ ಇತರೆಡೆಯಿಂದ ಆಗಮಿಸುವ ರೈಲುಗಳನ್ನು ಸ್ಥಗಿತಗೊಳಿಸಲಾಗಿದೆ. ದಾದರ್‌, ಮಾತುಂಗಾ ರಸ್ತೆ, ಗೋರೆಗಾಂವ್‌ ಹಾಗೂ ಇತರ ಸ್ಥಳಗಳಲ್ಲಿ ರೈಲು ಟ್ರ್ಯಾಕ್‌ಗಳಿಂದ ನೀರು ಹೊರಹಾಕಲು ಭಾರಿ ಪ್ರಮಾಣ ನೀರೆತ್ತುವ ಪಂಪ್‌ಗ್ಳನ್ನು ಬಳಸಲಾಗುತ್ತಿದೆ. ಇನ್ನು ವಿಮಾನ ನಿಲ್ದಾಣದಲ್ಲೂ ಪ್ರಯಾಣಿಕರ ಸಂಖ್ಯೆ ಕಡಿಮೆ ಇದೆ. ಆದರೆ ಎಲ್ಲ ವಿಮಾನಗಳೂ ಎಂದಿನಂತೆ ಹಾರಾಡುತ್ತಿವೆ.

ತುರ್ತು ಕಾರ್ಯಪಡೆ: ಮಳೆ ಪರಿಸ್ಥಿತಿಯನ್ನು ನಿಭಾಯಿಸಲು ಅಧಿಕಾರಿಗಳನ್ನು ನಿಯೋಜಿಸ ಲಾಗಿದ್ದು, ತಗ್ಗು ಪ್ರದೇಶದಲ್ಲಿ ರಕ್ಷಣಾ ಕಾರ್ಯಾಚರಣೆಯ ಉಸ್ತುವಾರಿಗೆ ಅಧಿಕಾರಿಗಳು ತೆರಳಿದ್ದಾರೆ.

ಇಂಟರ್‌ನೆಟ್‌ನಲ್ಲಿ ಜೋಕ್‌ಗಳು: ಕಳೆದ ವಾರಪೂರ್ತಿ ಮಳೆಯಿಂದ ಅನಾಹುತಗಳನ್ನೇ ಕೇಳಿದ ಜನರು ಶನಿವಾರದಿಂದ ಸುರಿಯುತ್ತಿರುವ ವಿಪರೀತ ಮಳೆಗೆ ಮನೆಯಲ್ಲೇ ಕುಳಿತು ಇಂಟರ್‌ನೆಟ್‌ನಲ್ಲಿ ಜೋಕ್‌ಗಳನ್ನು ಹರಿಬಿಡುತ್ತಿದ್ದಾರೆ. ಅದರಲ್ಲೂ ಟ್ವಿಟರ್‌ನಲ್ಲಂತೂ ಜೋಕ್‌ಗಳು ಸುರಿಮಳೆಯೇ ಹರಿದಿದೆ.