ಸಾಯುತ್ತಿದ್ದ 3 ಗಾಯಾಳುಗಳೊಂದಿಗೆ ರಾಜಸ್ಥಾನ ಯುವಕನ ಸೆಲ್ಫಿ, ವೈರಲ್

Team Udayavani, Jul 11, 2018, 3:20 PM IST

ಜೈಪುರ : ಯುವ ಜನರ ಸೆಲ್ಫಿ ಹುಚ್ಚು ಮನುಕುಲವೇ ನಾಚುವಂತೆ ಮಾಡುವ ಮಟ್ಟಕ್ಕೆ  ಮುಟ್ಟಿದೆ ಎನ್ನುವುದಕ್ಕೆ ಇಲ್ಲೊಂದು ತಾಜಾ ಉದಾಹರಣೆ ಇದೆ. 

ಅಪಘಾತದಲ್ಲಿ ತೀವ್ರವಾಗಿ ಗಾಯಗೊಂಡು ರಸ್ತೆಯಲ್ಲಿ ಒದ್ದಾಡುತ್ತಾ ಸಾಯುವ ಅಂತಿಮ ಸ್ಥಿತಿಯಲ್ಲಿದ್ದ ಮೂವರೊಂದಿಗೆ ರಾಜಸ್ಥಾನದ ಯುವಕನೋರ್ವ ಸೆಲ್ಫಿ ತೆಗೆದುಕೊಂಡ ಫೋಟೋಗಳು ಈಗ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್‌ ಆಗಿವೆ. ಈ ದೃಶ್ಯವನ್ನು ಕುತೂಹಲದಿಂದ ಎಂಬಂತೆ ನಿಶ್ಚಿಂತರಾಗಿ ನೋಡುತ್ತಿದ್ದವರ ಚಿತ್ರಗಳು ಕೂಡ ಸೆಲ್ಫಿಯಲ್ಲಿ ದಾಖಲಾಗಿದೆ.

ಇಷ್ಟು ಮಂದಿ ನಿಜಕ್ಕೂ ಮಾನವೀಯ ಕಳಕಳಿಯಲ್ಲಿ ಗಾಯಾಳುಗಳನ್ನು ಆಸ್ಪತ್ರೆಗೆ ಒಯ್ದಿದ್ದರೆ ಅವರು ಬದುಕುವುದು ಸಾಧ್ಯವಿತ್ತು ಎಂದು ಪೊಲೀಸರು ಹೇಳಿದ್ದಾರೆ. ಇಂದಿನ ಯುವ ಜನರಿಗೆ ಎಂತಹ ಪ್ರತಿಕೂಲ ಸ್ಥಿತಿಯಲ್ಲೂ, ಮಾನವೀಯ ಕಾಳಜಿಯನ್ನು ಮರೆತು ಸೆಲ್ಫಿ ಕ್ಲಿಕ್ಕಿಸಿಕೊಳ್ಳುವ ಹುಚ್ಚು ಇರುವುದು ಇಂದು ಅತಿರೇಕದ ಮಟ್ಟಕ್ಕೆ ತಲುಪಿರುವ ಪರಿಣಾಮವಾಗಿ ಅನೇಕ ಮಂದಿ ಸೆಲ್ಫಿಗೆ ಬಲಿಯಾಗುತ್ತಿದ್ದಾರೆ ಎಂದು ಪೊಲೀಸರು ಹೇಳಿದ್ದಾರೆ.

ಮನೋ ಶಾಸ್ತ್ರಜ್ಞರು ಹೇಳುವ ಪ್ರಕಾರ ಸೆಲ್ಫಿ ಹುಚ್ಚು ಒಂದು ಬಗೆಯ ಮನೋಸ್ಥಿತಿ. ಇದರ ಅತೀವ ಹುಚ್ಚಿನಿಂದ  ಹಲವರ ಸಾವಿಗೆ ಕಾರಣವಾಗಿದೆ.