ಇಮ್ರಾನ್‌ಗೆ ಅಕ್ರಮ ಮಕ್ಕಳು!

Team Udayavani, Jul 14, 2018, 6:00 AM IST

ಲಾಹೋರ್‌: ಪಾಕಿಸ್ತಾನ-ತೆಹ್ರಿಕ್‌-ಇ- ಇನ್ಸಾಫ್ ನಾಯಕ ಇಮ್ರಾನ್‌ ಖಾನ್‌ಗೆ ಅಕ್ರಮ ಸಂಬಂಧದಿಂದ ಐವರು ಮಕ್ಕಳು ಹುಟ್ಟಿದ್ದಾರೆ ಎಂದು ಅವರ ಮಾಜಿ ಪತ್ನಿ ರೆಹಾಂ ಖಾನ್‌ ಆರೋಪಿಸಿದ್ದಾರೆ. ಈ ಪೈಕಿ ಭಾರತೀಯರೂ ಇದ್ದಾರೆ ಎಂಬ ಕುತೂಹಲಕಾರಿ ಮಾಹಿತಿಯನ್ನೂ ಬಹಿರಂಗಪಡಿಸಿದ್ದಾರೆ. “ರೆಹಾಂ ಖಾನ್‌’ ಎಂಬ ಪುಸ್ತಕದಲ್ಲಿ ಈ ಅಂಶಗಳಿವೆ. ಅದನ್ನು ಅವರೇ ಬರೆದಿದ್ದಾರೆ. ನನಗೆ ಐವರು ಮಕ್ಕಳಿದ್ದು, ಅವರಲ್ಲಿ ಕೆಲವರು ಭಾರತೀಯರು ಎಂದು ಸ್ವತಃ ಇಮ್ರಾನೇ ತಮ್ಮ ಬಳಿ ಹೇಳಿಕೊಂಡಿದ್ದರು ಎಂದು ರೆಹಾಂ ಬರೆದುಕೊಂಡಿದ್ದಾರೆ. 

ನಟಿ ಜತೆ ಸಂಬಂಧ?: ಮಾಜಿ ಕ್ರಿಕೆಟಿಗನ ರಸಿಕ ಜೀವನದ ಘಟನೆಗಳ ಬಗ್ಗೆ ಬರೆದಿರುವ ಅವರು, 1970ರ ದಶಕದಲ್ಲಿ ಜನಪ್ರಿಯ ಮತ್ತು ಅತ್ಯಂತ ಮಾದಕ ನಟಿ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದ್ದ ಹಿಂದಿ ಚಿತ್ರನಟಿಯ ಜತೆಗೂ ಇಮ್ರಾನ್‌ಗೆ ಸಂಬಂಧವಿತ್ತು ಎಂದು ಅವರು ಆರೋಪಿಸಿದ್ದಾರೆ. 

ಗರ್ಭಪಾತದ ಆರೋಪ: ಈ ಎಲ್ಲ ಮಾಹಿತಿಗಿಂತ ಗುರುತರವಾಗಿರುವ ಆರೋಪವನ್ನೂ ಮಾಡಿರುವ ರೆಹಾಂ, ಇಮ್ರಾನ್‌ ಖಾನ್‌ ಲಂಡನ್‌ನಲ್ಲಿ ಯುವತಿಗೆ ಬಲವಂತವಾಗಿ ಗರ್ಭಪಾತ ಮಾಡಿಸಿದ್ದರು ಎಂದು ಬರೆದುಕೊಂಡಿದ್ದಾರೆ. ಆದರೆ ಈ ಆರೋಪವನ್ನು ಖಾನ್‌ ಬಲವಾಗಿ ತಿರಸ್ಕರಿಸಿದ್ದಾರೆ. ಆದರೆ ಮೂರನೇ ಪತ್ನಿ ಬರೆದುಕೊಂಡ ಪ್ರಕಾರ, ಈ ವಿಚಾರವನ್ನು ಇಮ್ರಾನ್‌ ಒಪ್ಪಿಕೊಂಡಿದ್ದರು. ಜತೆಗೆ, ಖಾನ್‌ಗೆ ಮಾದಕ ದ್ರವ್ಯ ಸೇವನೆಯ ಚಟವಿತ್ತು ಎಂಬುದನ್ನೂ ಪುಸ್ತಕದಲ್ಲಿ ಬರೆದುಕೊಂಡಿದ್ದಾರೆ.