ನಗರ ಸೌಂದರ್ಯ ಹೆಚ್ಚಿಸುವ ಹಸುರು ಕಟ್ಟಡ

Team Udayavani, Jul 22, 2018, 3:24 PM IST

ನಗರವೆಂದರೆ ಕೇವಲ ಕಾಂಕ್ರೀಟ್‌ ಕಟ್ಟಡಗಳು ಎಂಬಂತಾಗಿದೆ. ಅಲ್ಲೋ, ಇಲ್ಲೊಂದು ಮರಗಳನ್ನು ಬಿಟ್ಟರೆ ಬೇರೆಲ್ಲೂ ಮರ ನೆಡಲು ಸಾಧ್ಯವಿಲ್ಲ ಎನ್ನುವ ಪರಿಸ್ಥಿತಿ ಇದೆ. ಜಾಗ ಇರುವವರು ಟೇರೆಸ್‌ ಗಾರ್ಡನ್‌, ಸಣ್ಣ ಕೈ ತೋಟ ಮಾಡಿ ಯಶಸ್ವಿಯಾಗಿದ್ದಾರೆ. ಆದರೆ ಜಾಗವೇ ಇಲ್ಲವೆಂದು ಕೊಂಡವರು ಈ ಬಗ್ಗೆ ಹೆಚ್ಚು ಚಿಂತಿಸಬೇಕಿಲ್ಲ. ತಾವಿರುವ ಕಟ್ಟಡವನ್ನೇ ಹಸುರು ಕಟ್ಟಡವನ್ನಾಗಿ ಮಾಡಬಹುದು. 

ಹಸುರು ಎಂದಾಕ್ಷಣ ಕೇವಲ ಕಾಡು, ಉದ್ಯಾನವನಕ್ಕೆ ಸೀಮಿತವಾಗಿರಿಸದೆ ಪ್ರಕೃತಿಯೊಂದಿಗೆ ಜೀವಿಸುವ ಹೊಸ ವಾಸ್ತುಶಿಲ್ಪ ಈಗಾಗಲೇ ಹಲವು ದೇಶಗಳಲ್ಲಿ ಜನಾಕರ್ಷಣೆಗೆ ಪಾತ್ರವಾಗಿದೆ. ಜತೆಗೆ ಪ್ರಕೃತಿಯನ್ನು ಬೆಳೆಸಿದಂತೆಯೂ ಆಗುತ್ತದೆ. 

ಬಹು ಮಹಡಿ ಕಟ್ಟಡಗಳನ್ನು ನಿರ್ಮಿಸುವಾಗ ನಾನಾ ರೀತಿಯ ವಿನ್ಯಾಸಗಳನ್ನು ಮಾಡುವುದು ಸಹಜ. ಆದರೆ ಈ ಕಟ್ಟಡಗಳಿಂದ ಮಾನವನಿಗೆ ಪ್ರಕೃತಿಯ ಜತೆಗಿನ ಸಂಬಂಧ ಇಲ್ಲದಂತಾಗುತ್ತದೆ. ಅದ ಕ್ಕಾಗಿ ಬಹು ಮಹಡಿ ಕಟ್ಟಡಗಳ ಗೋಡೆಗಳಲ್ಲಿ ಹಾಗೂ ಮೇಲ್ಛಾವಣಿಗಳಲ್ಲಿ ಸಸಿಗಳನ್ನು ಬೆಳೆಸುವ ಹೊಸ ಉಪಕ್ರಮ ಈಗ ಬಹಳ ಖ್ಯಾತಿಯಾಗಿದೆ.

ಸುಸ್ಥಿರ ಅಭಿವೃದ್ಧಿ
ಸುಸ್ಥಿರ ಅಭಿವೃದ್ಧಿಯ ಉದ್ದೇಶದಿಂದ ಇಂತಹ ಹಲವಾರು ಉಪಕ್ರಮಗಳನ್ನು ಕಂಡುಹಿಡಿಯುವಲ್ಲಿ ಇಡೀ ವಿಶ್ವವೇ ಹೊರಟಿದೆ. ಹಾಗಾಗಿ ಕೆಲವೊಂದು ದೇಶಗಳು ಈಗಾಗಲೇ ಅದಕ್ಕೆ ಹುಲ್ಲಿನ ಛಾವಣಿಗಳನ್ನು ನಿರ್ಮಿಸಿ ಹಸುರನ್ನು ಬೆಳೆಸುವ ಕಾರ್ಯ ಮಾಡುತ್ತಿವೆ.

ಇತ್ತೀಚಿನ ದಿನಗಳಲ್ಲಿ ವಾಸ್ತುಶಿಲ್ಪಿಗಳು ಮತ್ತು ವಿನ್ಯಾಸಕಾರರು ಸಸ್ಯಗಳ ಏಕೀಕರಣಕ್ಕೆ ಕಟ್ಟಡದ ಹೊರಭಾಗವನ್ನು ಸಂಪೂರ್ಣವಾಗಿ ಬಳಸಿಕೊಳ್ಳಲು ಆರಂಭಿಸಿದ್ದಾರೆ. ಐಕಾನ್ಕಾ ಸ್ಟಿಕ್‌ ಆಸ್ಟ್ರಿಯಾದ ಕಲಾವಿದ ಮೊದಲಿಗೆ ಪ್ರಾರಂಭಿಸಿದ. ಈ ಹಸುರು ಗೋಡೆಗಳು ಮತ್ತು ಛಾವಣಿಗಳು ಕಟ್ಟಡಗಳ ಸೌಂದರ್ಯವನ್ನೂ ಹೆಚ್ಚಿಸುತ್ತಿವೆ. 

ಸೌಂದರ್ಯಶಾಸ್ತ್ರ ನಗರ ನಿರ್ಮಾಣದಲ್ಲಿ ಒಂದು ಅಂಶವಾಗಿದ್ದು, ಹಸುರು ವಿನ್ಯಾಸಗಳಿಂದ ಕಟ್ಟಡಗಳು ಉತ್ತಮ ಹೊರ ನೋಟವನ್ನು ನೀಡುತ್ತವೆ. ಕುಂಡಗಳ ಮುಖಾಂತರ ಇಂತಹ ಸಸಿಗಳನ್ನು ನೆಟ್ಟರೆ ವಾಸಿಸುವವರ ಆರೋಗ್ಯಕ್ಕೂ ಒಳಿತು. ನ್ಯೂಯಾರ್ಕ್‌, ಯುಎಸ್‌ಎ, ಚಿಕಾಗೊ, ಜರ್ಮನಿ ಹೀಗೆ ಹಲವು ದೇಶಗಳು ಇಂತಹ ಹಸುರು ಕಟ್ಟಡಗಳನ್ನು ನಿರ್ಮಿಸಿ ನಗರದ ಸೌಂದರ್ಯವನ್ನು ಮತ್ತಷ್ಟು ಹೆಚ್ಚಿಸಿವೆ.

ಇಂತಹ ಯೋಜನೆಯನ್ನು ಬೆಳೆಯುತ್ತಿರುವ ಮಂಗಳೂರಿನಲ್ಲಿ ಮಾಡಿದರೆ ಹಚ್ಚ ಹಸುರು ಕರಾವಳಿ ನಗರವನ್ನು ಮತ್ತಷ್ಟು ಶೃಂಗಾರಗೊಳಿಸಿದಂತೆ ತೋರಬಹುದು.
 
ಭರತ್‌ರಾಜ್‌ ಕರ್ತಡ್ಕ