ಪ್ರಥಮನ ಏಕಾದಶಿ: ವಿವಿಧೆಡೆ ಮುದ್ರಾಧಾರಣೆ

Team Udayavani, Jul 24, 2018, 9:42 AM IST

ಉಡುಪಿ/ಮಂಗಳೂರು: ಉಡುಪಿ ಶ್ರೀಕೃಷ್ಣ ಮಠವೂ ಸೇರಿದಂತೆ ನಾಡಿನ ವಿವಿಧೆಡೆ ವಿವಿಧ ಮಠಾಧೀಶರು ಸೋಮವಾರ ಪ್ರಥಮನ ಏಕಾದಶಿಯಂದು ಭಕ್ತರಿಗೆ ತಪ್ತಮುದ್ರಾಧಾರಣೆ ನಡೆಸಿದರು. ಶ್ರೀಕೃಷ್ಣ ಮಠದಲ್ಲಿ ಬೆಳಗ್ಗೆ ಬೇಗ ಮಹಾಪೂಜೆಯನ್ನು ಪೂರೈಸಿದ ಪರ್ಯಾಯ ಶ್ರೀ ಪಲಿಮಾರು ಮಠದ ಶ್ರೀ ವಿದ್ಯಾಧೀಶತೀರ್ಥ ಶ್ರೀಪಾದರು ಮತ್ತು ಶ್ರೀ ಅದಮಾರು ಮಠದ ಕಿರಿಯ ಶ್ರೀ ಈಶಪ್ರಿಯತೀರ್ಥ ಶ್ರೀಪಾದರು ಅಪರಾಹ್ನದ ವರೆಗೆ ಸಾವಿರಾರು ಭಕ್ತರಿಗೆ ಮುದ್ರಾಧಾರಣೆ ನಡೆಸಿದರು. ಮುದ್ರಾಧಾರಣೆಗಾಗಿ ಬಂದವರ ಸರತಿ ಸಾಲು ಬೆಳಗ್ಗಿನಿಂದ ಮಧ್ಯಾಹ್ನದವರೆಗೆ ಸರೋವರದ ಹಿಂಬದಿವರೆಗೂ ಇತ್ತು. ಬೆಳಗ್ಗೆ ಬಾರದವರಿಗೆ ಸಂಜೆ ಮತ್ತು ರಾತ್ರಿ ಪೂಜೆಯಾದ ಬಳಿಕವೂ ಮುದ್ರಾಧಾರಣೆ ನಡೆಸಲಾಯಿತು.

ಶ್ರೀ ಕೃಷ್ಣಾಪುರ ಮಠಾಧೀಶರು ಕೃಷ್ಣಾಪುರ ಮಠದಲ್ಲಿ, ಮಂಗಳೂರು, ಕಾರ್ಕಳ, ಪಾವಂಜೆ ಮೊದಲಾದೆಡೆ ಶ್ರೀ ಬಾಳೆಗಾರು ಮಠಾಧೀಶರು, ಉಜಿರೆ, ಸುಬ್ರಹ್ಮಣ್ಯ ಮೊದಲಾದೆಡೆ ಸುಬ್ರಹ್ಮಣ್ಯ ಮಠಾಧೀಶರು ಮುದ್ರಾಧಾರಣೆ ನಡೆಸಿದರು. ಮುದ್ರಾಧಾರಣೆ ಮಾಡುವ ಮುನ್ನ ವೈದಿಕರು ಸುದರ್ಶನ ಹೋಮ ನಡೆಸಿದರು. ಅದರಲ್ಲಿ ಬಿಸಿ ಮಾಡಿದ ಶಂಖ, ಚಕ್ರಗಳ ಚಿಹ್ನೆಗಳನ್ನು ಮಠಾಧೀಶರು ಭಕ್ತರ ತೋಳಿನಲ್ಲಿ ಮುದ್ರಿಸಿದರು. ಬೆಂಗಳೂರು, ಮೈಸೂರು, ಚೆನ್ನೈ ಮೊದಲಾದೆಡೆ ಮಠಾಧೀಶರು ವಿವಿಧೆಡೆ ಮುದ್ರಾಧಾರಣೆ ನಡೆಸಿದರು. ಹಲವು ದೇವಸ್ಥಾನಗಳಲ್ಲಿ ನಿರಂತರ ಭಜನೆ, ಪೂಜಾದಿಗಳು ನಡೆದವು.

ಗೃಹಸ್ಥರ ಮುದ್ರಾಧಾರಣೆ
ಉಪ್ಪಿನಂಗಡಿ ಸಮೀಪದ ಎರ್ಕಿಮಠದಲ್ಲಿ ವೆಂಕಟರಮಣ ಉಪಾಧ್ಯಾಯರು ಮುದ್ರಾಧಾರಣೆ ನಡೆಸಿದರು. ಗೃಹಸ್ಥರು ಮುದ್ರಾಧಾರಣೆ ನಡೆಸುವ ಏಕೈಕ ಸ್ಥಳ ಇದಾಗಿದೆ. ಮಧ್ವಾಚಾರ್ಯರು ಕೊಟ್ಟ ಮುದ್ರಾಧಾರಣೆಯ ಉಪಕರಣ ಶಿಥಿಲವಾದ ಕಾರಣ ಕಳೆದ ವರ್ಷ ಪೇಜಾವರ ಶ್ರೀಗಳ ಪರ್ಯಾಯದಲ್ಲಿ ಹೊಸ ಮುದ್ರೆಗಳನ್ನು ಪಡೆದುಕೊಂಡಿದ್ದರು.