ಫಾರ್ಮಾಲಿನ್‌ ಭೀತಿ, ಪೂರೈಕೆ ಕೊರತೆ: ಗೋವೆಯಲ್ಲಿ ಮೀನು ಬೆಲೆ ಗಗನಕ್ಕೆ

Team Udayavani, Jul 25, 2018, 12:07 PM IST

ಪಣಜಿ : ಗೋವೆಯಲ್ಲಿ ಮೀನಿನ ಬೆಲೆ ಗಗನಕೇರಿದೆ. ಇದಕ್ಕೆ ಮುಖ್ಯ ಕಾರಣ ಫಾರ್ಮಾಲಿನ್‌ ವಿಷಕಾರಿ ರಾಸಾಯನಿಕ ಲೇಪಿತ ಮೀನುಗಳ ಆಮದನ್ನು ನಿಷೇಧಿಸಲಾಗಿರುವುದು ಮತ್ತು ಸ್ಥಳೀಯ ಮೀನು ಪರ್ಯಾಪ್ತ ಪ್ರಮಾಣದಲ್ಲಿ ಪೂರೈಕೆಯಾಗದಿರುವುದು ಎಂದು ಹೇಳಲಾಗಿದೆ. ಹಾಗಾಗಿ ನೂರು ರೂ. ಬೆಲೆಯ ಮೀನು ಈಗ 600ರಿಂದ 800 ರೂ. ಬೆಲೆಗೆ ತಲುಪಿದೆ. 

ಈ ತಿಂಗಳ ಅಂತ್ಯದ ತನಕ ಮೀನು ಆಮದನ್ನು ರಾಜ್ಯ ಸರಕಾರ ನಿಷೇಧಿಸಿದೆ. ವಿಷಕಾರಿ ಫಾರ್ಮಾಲಿನ್‌ ಮೀನು ರಾಜ್ಯದ ಮಾರುಕಟ್ಟೆಯನ್ನು ಪ್ರವೇಶಿಸದಂತೆ ಮುನ್ನೆಚ್ಚರಿಕೆ ವಹಿಸಲು ಹೊರ ರಾಜ್ಯಗಳ ಮೀನು ಆಮದನ್ನು ಸರಕಾರ ನಿಷೇಧಿಸಿದೆ. 

ಮೀನು ಲಭ್ಯತೆಯ ಮಾರ್ಗೋವಾ, ಪಣಜಿ, ಮಾಪುಸಾ ಮತ್ತು ವಾಸ್ಕೋ ದಲ್ಲಿನ ಮಾರುಕಟ್ಟೆಗಳಲ್ಲಿ ಮೀನೇ ಇಲ್ಲದಿರುವ ಸನ್ನಿವೇಶ ಎದುರಾಗಿದೆ. ಅಲ್ಪಸ್ವಲ್ಪ ಪ್ರಮಾಣದಲ್ಲಿ ಪೂರೈಕೆಯಾಗುವ ಸ್ಥಳೀಯ ಮೀನು ತುಂಬ ದುಬಾರಿಯಾಗಿದೆ. 

ಮಳೆಗಾಲದ ಈ ದಿನಗಳಲ್ಲಿ ಸಮುದ್ರವು ಪ್ರಕ್ಷುಬ್ಧವಾಗಿರುವುದರಿಂದ ದೂರ ಮತ್ತು ಆಳ ಮೀನುಗಾರಿಕೆಗೆ ಈಗ ಅವಕಾಶ ಇರುವುದಿಲ್ಲ; ಹಾಗಾಗಿ ಸಾಂಪ್ರದಾಯಿಕ ಮೀನುಗಾರಿಕೆಯಿಂದ ಸಿಗುವ ಮೀನು ಅಲ್ಪ ಪ್ರಮಾಣದ್ದಾಗಿದ್ದು ಅದು ಗೋವೆಯ ಬೃಹತ್‌ ಮಾರುಕಟ್ಟೆಗೆ ಅಪರ್ಯಾಪ್ತವಾಗಿದೆ.