ಅಂಗವಿಕಲರ ವಾಹನ ವಿತರಣೆಗೆ ಹಿಡಿದ ನಿಯಮ ಗ್ರಹಣ!

Team Udayavani, Jul 29, 2018, 4:19 PM IST

ಕೊಪ್ಪಳ: ತ್ರಿಚಕ್ರ ವಾಹನಗಳು ಬಂದಿದ್ದೂ ಆಗಿದೆ, ಅರ್ಹ ಫ‌ಲಾನುಭವಿಗಳನ್ನು ಆಯ್ಕೆ ಮಾಡಿದ್ದೂ ಆಗಿದೆ ಆದರೆ ಜಿಲ್ಲಾ ಉಸ್ತುವಾರಿ ಸಚಿವರಿಂದಲೇ ವಿತರಿಸಬೇಕೆಂಬ ಅಂಗವಿಕಲರ ಇಲಾಖೆಯ ‘ನಿಯಮ’ ವಿತರಣೆಗೆ ಅಡ್ಡಿಯಾಗಿದೆ. ಹೀಗಾಗಿ 2017-18ನೇ ಸಾಲಿನಡಿ ಶಾಸಕರ ಕ್ಷೇತ್ರಾಭಿವೃದ್ಧಿ ಅನುದಾನದಲ್ಲಿ ಅಂಗವಿಕಲರಿಗೆ ಮಂಜೂರಾದ 125 ತ್ರಿಚಕ್ರ ವಾಹನಗಳು ಕಳೆದ ಮೂರು ತಿಂಗಳಿಂದ ಜಿಲ್ಲಾಧಿಕಾರಿ ಕಚೇರಿ ಆವರಣದಲ್ಲಿಯೇ ನಿಂತಿದ್ದು ಧೂಳು ತಿನ್ನುತ್ತಿವೆ.

ರಾಜ್ಯ ಸರ್ಕಾರ ಎಲ್ಲ ಶಾಸಕರಿಗೆ ತಮ್ಮ ಕ್ಷೇತ್ರಾಭಿವೃದ್ಧಿಗಾಗಿ ಪ್ರತಿ ವರ್ಷವೂ 2 ಕೋಟಿ ಅನುದಾನ ನೀಡುತ್ತದೆ. ಈ ಅನುದಾನದಲ್ಲಿ ಆಯಾ ಶಾಸಕರು ಶೇ.3ರಷ್ಟು ಅನುದಾನವನ್ನು ಅಂಗವಿಕಲರ ಶ್ರೇಯೋಭಿವೃದ್ಧಿಗೆ ಖರ್ಚು ಮಾಡಬೇಕು. ಈ ಪೈಕಿ ಜಿಲ್ಲೆಯ ಐದೂ ಶಾಸಕರು 2017-18ನೇ ಸಾಲಿನಲ್ಲಿ ಅಂಗವಿಕಲರಿಗೆ ತ್ರಿಚಕ್ರ ವಾಹನಗಳ ಖರೀದಿಗೆ ಅನುದಾನ ಬಿಡುಗಡೆ ಮಾಡಿದ್ದಾರೆ. ಜಿಲ್ಲೆಯ ಐದೂ ಕ್ಷೇತ್ರಗಳಿಗೆ 125 ಅರ್ಹ ಫಲಾನುಭವಿಗಳ ಆಯ್ಕೆಗೆ ಗುರಿ ನಿಗದಿ ಮಾಡಿ ಅರ್ಹ ಫಲಾನುಭವಿಗಳನ್ನು ಆಯ್ಕೆಯನ್ನೂ ಮಾಡಲಾಗಿದೆ ಆದರೆ ಅಂಗವಿಕಲರಿಗೆ ಅವುಗಳನ್ನು ಪಡೆಯುವ ಭಾಗ್ಯ ಇನ್ನೂ ಇಲ್ಲವಾಗಿದೆ.

ಕಾಯುವುದೇ ಕೆಲಸ: ಸರ್ಕಾರ ತ್ರಿಚಕ್ರ ವಾಹನಗಳ ಪೂರೈಕೆಗೆ ರಾಜ್ಯಮಟ್ಟದಲ್ಲಿ ಟೆಂಡರ್‌ ಕರೆದು, ಏಜೆನ್ಸಿಗಳ ಮೂಲಕ ಆಯಾ ಜಿಲ್ಲೆಗಳಿಗೆ ನಿಗದಿಪಡಿಸಿದ ಗುರಿಯಂತೆ ವಾಹನಗಳನ್ನು ಪೂರೈಕೆ ಮಾಡಿದೆ. ಏಜೆನ್ಸಿಗಳು ತ್ರಿಚಕ್ರ ವಾಹನಗಳನ್ನು ಸಿದ್ಧಪಡಿಸಿ ಜಿಲ್ಲಾಧಿಕಾರಿ ಕಚೇರಿಯಲ್ಲಿ ನಿಲ್ಲಿಸಿದ್ದಾರೆ. ಆದರೆ ಅವುಗಳನ್ನು 3 ತಿಂಗಳಿಂದ ವಿತರಿಸಿಲ್ಲ. ಇಟ್ಟಲ್ಲೇ ಧೂಳು ತಿನ್ನುತ್ತಿವೆ. ಕಿಡಿಗೇಡಿಗಳು ವಾಹನಗಳಲ್ಲಿನ ಸಾಮಗ್ರಿಗಳನ್ನು ಮುರಿಯುವುದು. ಕಿತ್ತುವುದು ಮಾಡುತ್ತಿದ್ದಾರೆ. ಬಯಲಲ್ಲಿರುವ ವಾಹನಗಳನ್ನು ಕಾಯುವುದೇ ಅಂಗವಿಕಲರ ಕಲ್ಯಾಣ ಇಲಾಖೆಗೆ ಕೆಲಸವಾಗಿದೆ.

ವಿಳಂಬಕ್ಕೆ ಕಾರಣ: ಜಿಲ್ಲೆಯಲ್ಲಿ ಏಪ್ರಿಲ್‌ ಹಾಗೂ ಮೇ ತಿಂಗಳಲ್ಲಿ ವಿಧಾನಸಭಾ ಚುನಾವಣೆ ಘೋಷಣೆಯಾಗಿದ್ದರಿಂದ ವಾಹನ ವಿತರಣೆ ಪ್ರಕ್ರಿಯೆ ವಿಳಂಬವಾಗಿದೆ. ಅಲ್ಲದೇ ಈಗಾಗಲೇ ನೂತನ ಶಾಸಕರೂ ಆಯ್ಕೆಯಾಗಿದ್ದಾರೆ. ಜಿಲ್ಲೆಗೆ ಇನ್ನೂ ಉಸ್ತುವಾರಿ ಸಚಿವರನ್ನು ನೇಮಿಸಿಲ್ಲ. ಅಚ್ಚರಿಯೆಂದರೆ, ಅಂಗವಿಕಲಣರ ಕಲ್ಯಾಣ ಇಲಾಖೆ ನಿಯಮದ ಪ್ರಕಾರ, ಆಯಾ ಜಿಲ್ಲಾ ಉಸ್ತುವಾರಿ ಸಚಿವರ ಅಧ್ಯಕ್ಷತೆಯಲ್ಲೇ ಫಲಾನುಭವಿಗಳಿಗೆ ತ್ರಿಚಕ್ರ ವಾಹನಗಳನ್ನು ವಿತರಿಸಬೇಕೆಂದು ಸರ್ಕಾರದ ಆದೇಶ ಹೇಳುತ್ತಿದೆಯಂತೆ. ಇದು ಇಲಾಖೆಯ ಅಧಿಕಾರಿಗಳಿಗೂ ದೊಡ್ಡ ತಲೆ ನೋವಾಗಿದೆ. ಮೈತ್ರಿ ಸರ್ಕಾರದಲ್ಲಿ ಜಿಲ್ಲೆಗೆ ಇನ್ನೂ ಉಸ್ತುವಾರಿ ಸಚಿವರೇ ಬಂದಿಲ್ಲ. ಸಚಿವರು ಯಾವಾಗ ಬರುವರೋ ? ವಾಹನಗಳನ್ನು ಯಾವಾಗ ವಿತರಿಸುವರೋ ? ಎಂದು ಫಲಾನುಭವಿಗಳು ಕಾದು ಕುಳಿತಿದ್ದಾರೆ.

ಜಿಲ್ಲಾಧಿಕಾರಿಗಳು ಇತ್ತ ಗಮನ ಹರಿಸಿ ಅರ್ಹ ಫಲಾನುಭವಿಗಳಿಗೆ ತ್ರಿಚಕ್ರ ವಾಹನಗಳನ್ನು ವಿತರಿಸಲು ಪರ್ಯಾಯ ವ್ಯವಸ್ಥೆ ಮಾಡಿಕೊಳ್ಳಬೇಕಿದೆ. ಇಲ್ಲದಿದ್ದರೆ ವಾಹನಗಳು ಇಟ್ಟಲ್ಲೇ ತುಕ್ಕು ಹಿಡಿಯಲಿವೆ. ಜಿಲ್ಲೆಯಲ್ಲಿ 125 ತ್ರಿಚಕ್ರ ವಾಹನಗಳ ವಿತರಣೆಗೆ
ಅರ್ಹ ಫಲಾನುಭವಿಗಳನ್ನು ಆಯ್ಕೆ ಮಾಡಿದ್ದೇವೆ. ಚುನಾವಣೆ ಬಂದಿದ್ದರಿಂದ ವಿತರಿಸುವುದು ವಿಳಂಬವಾಗಿದೆ. ಅಲ್ಲದೇ, ಜಿಲ್ಲಾ ಉಸ್ತುವಾರಿ ಸಚಿವರ ಮೂಲಕವೇ ವಿತರಿಸಬೇಕೆಂದು ನಮಗೆ ಆದೇಶ ಮಾಡಲಾಗಿದೆ. ಆಗಸ್ಟ್‌ವರೆಗೂ ಕಾದು ನೋಡಿ, ಜಿಪಂ ಅಧ್ಯಕ್ಷರ ಗಮನಕ್ಕೆ ತಂದು ಮುಂದಿನ ಪರ್ಯಾಯ ವ್ಯವಸ್ಥೆಗೆ ಕ್ರಮ ಕೈಗೊಳ್ಳಲಿದ್ದೇವೆ.
 ಜಗದೀಶ, ಜಿಲ್ಲಾ ಅಂಗವಿಕಲ
ಕಲ್ಯಾಣಧಿಕಾರಿ.

ಮೂರು ತಿಂಗಳಿಂದ ತ್ರಿಚಕ್ರ ವಾಹನಗಳನ್ನು ವಿತರಿಸುತ್ತಿಲ್ಲ. ಜಿಲ್ಲಾ ಉಸ್ತುವಾರಿ ಸಚಿವರ ಮೂಲಕವೇ ವಾಹನಗಳನ್ನು ವಿತರಿಸುತ್ತೇವೆ ಎಂದು ಇಲಾಖೆ ಅಧಿಕಾರಿಗಳು ಹೇಳುತ್ತಿದ್ದಾರೆ. ಅವರು ಇಟ್ಟ ಸ್ಥಳದಲ್ಲೇ ಧೂಳು ತಿನ್ನುತ್ತಿವೆ. ವಿಳಂಬ ಮಾಡಿದರೆ ವಾಹನಗಳು ತುಕ್ಕು ಹಿಡಿಯಲಿವೆ. ಮುಂದೆ ನಾವೇ ಸಾವಿರಾರು ರೂ. ಕೊಟ್ಟು ದುರಸ್ತಿ ಮಾಡಿಸಿಕೊಳ್ಳಬೇಕಾಗುತ್ತದೆ. ಹಾಗಾಗಿ ನಮಗೆ ವಾಹನ ಕೊಡಿ ಎಂದು ಕೇಳುತ್ತಿದ್ದೇವೆ.
 ಚಂದ್ರಶೇಖರ ಮುದೇನೂರು,
ಅರ್ಹ ಫಲಾನುಭವಿ

ದತ್ತು ಕಮ್ಮಾರ