ಕಿರಾತಕ -2 ಟೈಟಲ್‌ ಕೊಡಲ್ಲ: ಪ್ರದೀಪ್‌ ರಾಜ್‌

Team Udayavani, Aug 7, 2018, 11:04 AM IST

ಬಹುತೇಕ “ಕೆಜಿಎಫ್’ ಚಿತ್ರ ಮುಗಿಸಿರುವ ಯಶ್‌, ಮುಂದಿನ ಚಿತ್ರ “ಕಿರಾತಕ-2’ಗೆ ತಯಾರಾಗುತ್ತಿದ್ದಾರೆ ಎಂಬ ಸುದ್ದಿ ಹಲವು ದಿನಗಳಿಂದ ಕೇಳಿಬರುತ್ತಲೇ ಇದೆ. ಸಹಜವಾಗಿಯೇ ಅವರ ಅಭಿಮಾನಿಗಳು ಖುಷಿಯಾಗಿದ್ದರು. ಏಕೆಂದರೆ “ಕಿರಾತಕ’ ಚಿತ್ರ ಯಶ್‌ಗೆ ದೊಡ್ಡ ಮಟ್ಟದಲ್ಲಿ ಬ್ರೇಕ್‌ ಕೊಟ್ಟಿತ್ತು. ಈಗ ಅದೇ ಟೈಟಲ್‌ನಡಿ “ಕಿರಾತಕ-2′ ಬರುತ್ತಿರುವುದರಿಂದ ಸಿನಿಮಾ ಇನ್ನೂ ಮಜವಾಗಿರಬಹುದೆಂದು ಅಭಿಮಾನಿಗಳು ಕಾಯುತ್ತಿದ್ದರು.

ಆದರೆ, ಯಶ್‌ “ಕಿರಾತಕ-2′ ಟೈಟಲ್‌ನಡಿ ಸಿನಿಮಾ ಮಾಡುತ್ತಿಲ್ಲ ಎಂಬ ವಿಚಾರ ಅನೇಕರಿಗೆ ಗೊತ್ತಿರಲಿಕ್ಕಿಲ್ಲ. ಹೀಗೆಂದರೆ ನಿಮಗೆ ಆಶ್ಚರ್ಯವಾಗಬಹುದು. ಆದರೂ ಸತ್ಯ. ಈ ಹಿಂದೆ “ಕಿರಾತಕ’ ಚಿತ್ರವನ್ನು ಪ್ರದೀಪ್‌ರಾಜ್‌ ನಿರ್ದೇಶಿಸಿದ್ದರು. ಅದೇ ಸಮಯದಲ್ಲಿ ಅವರು “ಕಿರಾತಕ-2′ ಟೈಟಲ್‌ ಅನ್ನು ಕೂಡಾ ತಮ್ಮ “ಇಂದ್ರಜಾಲ್‌ ಅಡ್ವಟೈರ್ಸ್‌ ಸೊಲ್ಯುಶನ್ಸ್‌’ ಬ್ಯಾನರ್‌ನಡಿ ನೋಂದಾಯಿಸಿದ್ದರು.
 

ಪ್ರತಿ ವರ್ಷ ಆ ಶೀರ್ಷಿಕೆಯನ್ನು ನವೀಕರಿಸುತ್ತಾ ಬಂದಿದ್ದಾಂತೆ. ಯಶ್‌ ಜೊತೆಗೇ “ಕಿರಾತಕ-2′ ಮಾಡಬೇಕೆಂಬ ಆಸೆ ಪ್ರದೀಪ್‌ರಾಜ್‌ ಅವರಿಗಿತ್ತು. ಆದರೆ, ಕಾರಣಾಂತರಗಳಿಂದ ಅದು ಕೂಡಿ ಬಾರದ ಹಿನ್ನೆಲೆಯಲ್ಲಿ ಪ್ರದೀಪ್‌ರಾಜ್‌, ಹೊಸಬರನ್ನು ಹಾಕಿಕೊಂಡು “ಕಿರಾತಕ-2′ ಶುರುಮಾಡಿದ್ದಾರೆ. ಅವರೇ ಹೇಳುವಂತೆ, ಈಗಾಗಲೇ ನಾಲ್ಕು ದಿನಗಳ ಕಾಲ ಚಿತ್ರೀಕರಣ ಕೂಡಾ ಆಗಿದೆ.

ಆದರೆ, ಈಗ ಯಶ್‌ “ಕಿರಾತಕ-2′ ಟೈಟಲ್‌ನಡಿ ಸಿನಿಮಾ ಮಾಡುತ್ತಿದ್ದಾರೆಂಬ ಸುದ್ದಿ ಓಡಾಡುತ್ತಿರುವುದರಿಂದ ಪ್ರದೀಪ್‌ರಾಜ್‌ ಸಹಜವಾಗಿಯೇ ಟೆನ್ಷನ್‌ನಲ್ಲಿದ್ದಾರೆ.”ಕಿರಾತಕ-2′ ಟೈಟಲ್‌ ನಮ್ಮ ಬ್ಯಾನರ್‌ನಲ್ಲಿದೆ. ನಮ್ಮಲ್ಲಿ ಆ ಟೈಟಲ್‌ ಇರುವಾಗ ಮತ್ತೂಬ್ಬರು ಹೇಗೆ ಮಾಡಲು ಸಾಧ್ಯ’ ಎಂದು ಪ್ರಶ್ನಿಸುತ್ತಾರೆ ಪ್ರದೀಪ್‌ ರಾಜ್‌. ಈಗಾಗಲೇ ಪ್ರದೀಪ್‌ ರಾಜ್‌ ತಮ್ಮ ಟೈಟಲ್‌ ಅನ್ನು ಬೇರೆಯವರು ಬಳಕೆ ಮಾಡದಂತೆ ಹಾಗೂ ಗೊಂದಲ ಸೃಷ್ಟಿಸದಂತೆ ನೋಡಿಕೊಳ್ಳಬೇಕೆಂದು ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಗೆ ದೂರು ನೀಡಿದ್ದಾರೆ.

ಹಾಗಾದರೆ, ಪ್ರದೀಪ್‌ರಾಜ್‌ ಯಾವ ಕಾರಣಕ್ಕೂ “ಕಿರಾತಕ-2′ ಟೈಟಲ್‌ ಅನ್ನು ಬಿಟ್ಟುಕೊಡುವುದಿಲ್ಲವೇ ಎಂದು ನೀವು ಕೇಳಬಹುದು. ಆದರೆ, ಪ್ರದೀಪ್‌ರಾಜ್‌ ಮಾತ್ರ ಯಾವುದೇ ಕಾರಣಕ್ಕೂ ಟೈಟಲ್‌ ಬಿಟ್ಟುಕೊಡುವುದಿಲ್ಲ. ಅದೇ ಕಾರಣದಿಂದ ಆ ಟೈಟಲ್‌ನಡಿ ಸಿನಿಮಾ ಆರಂಭಿಸಿದ್ದೇನೆ ಎನ್ನುತ್ತಾರೆ. “ನಾನು ಯಶ್‌ ಅವರಲ್ಲೇ ಹೇಳಿದ್ದೇನೆ, “ಕಿರಾತಕ-2′ ಚಿತ್ರವನ್ನು ನೀವು-ನಾನು ಸೇರಿಕೊಂಡು ಮಾಡುವುದಾದರೆ ಕೊಡುತ್ತೇನೆ.

ಬೇರೆ ಯಾವ ನಿರ್ದೇಶಕರು ಮಾಡುವುದಾದರೂ ಕೊಡುವುದಿಲ್ಲ’ ಎಂದಿದ್ದೇನೆ. ಆ ಮಾತಿಗೆ ನಾನು ಬದ್ಧನಾಗಿದ್ದೇನೆ’ ಎನ್ನುತ್ತಾರೆ ಪ್ರದೀಪ್‌ ರಾಜ್‌. ಹಾಗಾದರೆ, ಯಶ್‌ ಅವರ “ಕಿರಾತಕ-2′ ಬದಲು ಬೇರ್ಯಾವ ಟೈಟಲ್‌ನಡಿ ಸಿನಿಮಾ ಮಾಡುತ್ತಾರೆಂಬ ಪ್ರಶ್ನೆ ನಿಮ್ಮನ್ನು ಕಾಡುತ್ತಿರಬಹುದು. ಸದ್ಯ ಬೇರೆ ಯಾವ ಶೀರ್ಷಿಕೆಯೂ ಅಂತಿಮವಾಗಿಲ್ಲ. ಮುಂದೇನಾಗುತ್ತೋ ಕಾದು ನೋಡಬೇಕು.