ಸಾಗುತ ದೂರ ಬಂದ ಅಪೇಕ್ಷಾ

Team Udayavani, Aug 8, 2018, 10:00 PM IST

ಟಿ.ಎನ್‌.ಸೀತಾರಾಮ್‌ ನಿರ್ದೇಶನದ “ಕಾಫಿತೋಟ’ ಚಿತ್ರದಲ್ಲಿ ನಟಿಸಿದ್ದ ಅಪೇಕ್ಷಾ ಪುರೋಹಿತ್‌, ಆ ಬಳಿಕ ಏನು ಮಾಡುತ್ತಿದ್ದಾರೆ ಎಂಬ ಬಗ್ಗೆ ಪ್ರಶ್ನೆ ಇತ್ತು. ಸ್ವಲ್ಪ ದಿನಗಳ ಬಳಿಕ ಸಿಕ್ಕ ಉತ್ತರ ನಿರ್ದೇಶಕ ಪವನ್‌ ಒಡೆಯರ್‌ ಜೊತೆ ನಿಶ್ಚಿತಾರ್ಥ. ಆ ಬಳಿಕ ಅಪೇಕ್ಷಾ ಪುರೋಹಿತ್‌ ಸದ್ದಿಲ್ಲದೆಯೇ ಒಂದು ಚಿತ್ರ ಮಾಡಿ ಮುಗಿಸಿದ್ದಾರೆ. ಹೌದು, ಆ ಚಿತ್ರಕ್ಕೆ “ಸಾಗುತ ದೂರ ದೂರ’ ಎಂದು ಹೆಸರಿಡಲಾಗಿದೆ. ವಿಶೇಷ ಅಂದರೆ, ಈ ಚಿತ್ರ ಪೂರ್ಣಗೊಂಡಿದ್ದು, ಇನ್ನೇನು ಬಿಡುಗಡೆಯ ತಯಾರಿ ಮಾಡಿಕೊಳ್ಳುತ್ತಿದೆ.

ಅಪೇಕ್ಷಾ ಪುರೋಹಿತ್‌ಗೆ “ಸಾಗುತ ದೂರ ದೂರ’ ಮೂರನೇ ಚಿತ್ರ. ಈ ಚಿತ್ರಕ್ಕೆ ರವಿತೇಜ ನಿರ್ದೇಶಕರು. ಈ ಹಿಂದೆ “ಜಾತ್ರೆ’ ಸಿನಿಮಾ ನಿರ್ದೇಶಿಸಿದ್ದ ರವಿತೇಜ ಈಗ ತಾಯಿ ಸೆಂಟಿಮೆಂಟ್‌ ಕುರಿತ “ಸಾಗುತ ದೂರ ದೂರ’ ಚಿತ್ರ ಮಾಡಿದ್ದಾರೆ. ಇನ್ನು, ಈ ಚಿತ್ರ “ಕೃಷಿ ಕನಸು’ ಬ್ಯಾನರ್‌ನಲ್ಲಿ ಅಮಿತ್‌ ಪೂಜಾರಿ ನಿರ್ಮಾಣ ಮಾಡಿದ್ದಾರೆ. ಅಪೇಕ್ಷಾ ಪುರೋಹಿತ್‌ ಅವರೊಂದಿಗೆ ಮಹೇಶ್‌ ಎಂಬ ಹೊಸ ಪ್ರತಿಭೆ ಕಾಣಿಸಿಕೊಂಡಿದೆ. ಅಪೇಕ್ಷಾ ಪುರೋಹಿತ್‌ ಅವರಿಗೆ ಇದೊಂದು ವಿಭಿನ್ನ ಚಿತ್ರವಂತೆ.

ಅದರಲ್ಲೂ ಅವರ ಪಾತ್ರವೇ ಹೈಲೆಟ್‌. ಇಲ್ಲಿ ಲವ್‌ ಇಲ್ಲ. ಮರಸುತ್ತುವ ಗೋಜಿಲ್ಲ. ಆದರೆ, ಅಮ್ಮನ ಸೆಂಟಿಮೆಂಟ್‌ ಕಥೆ ಇದೆ. ಇದೊಂದು ಜರ್ನಿ ಕಥೆಯಾಗಿದ್ದು, ಅಪೇಕ್ಷಾ ಮತ್ತು ಇನ್ನೊಬ್ಬ ಚಿಕ್ಕ ಹುಡುಗನ ನಡುವಿನ ಕಥೆ ಸಾಗುತ್ತದೆ. ಈ ಜರ್ನಿಯಲ್ಲಿ ಇಬ್ಬರೂ ತಮ್ಮ ತಾಯಿಯನ್ನು ಹುಡುಕಿ ಹೋಗುವ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಅದೊಂದು ಎಮೋಷನಲ್‌ ಆಗಿದ್ದು, ಪ್ರತಿಯೊಬ್ಬರಿಗೂ ನಾಟುವ ಕಥೆ ಎಂಬುದು ಅಪೇಕ್ಷಾ ಮಾತು.

ಚಿತ್ರದಲ್ಲಿ ಅಪೇಕ್ಷಾ ಪುರೋಹಿತ್‌ ಅವರಿಗೆ ಇಲ್ಲಿ ಎರಡು ಶೇಡ್‌ ಇರುವ ಪಾತ್ರವಿದೆ. “ಕಾಫಿ ತೋಟ’ದಲ್ಲಿ ಪಕ್ಕಾ ಪೊಲೀಸ್‌ ಅಧಿಕಾರಿಯಾಗಿ ಕಾಣಿಸಿಕೊಂಡಿದ್ದ ಅವರಿಲ್ಲಿ, ಸೆನ್ಸಿಟಿವ್‌ ಹುಡುಗಿಯಾಗಿ ಕಾಣಿಸಿಕೊಂಡಿದ್ದಾರೆ. ಇದು ಬಹುತೇಕ ಕುಂದಾಪುರ ಶೈಲಿಯ ಸಿನಿಮಾ. ಇಲ್ಲಿ ಕುಂದಾಪುರದ ಹುಡುಗಿಯಾಗಿ ನಟಿಸಿರುವ ಆಪೇಕ್ಷಾ ಸಂಭಾಷಣೆ ಕೂಡ ಕುಂದಾಪುರ ಶೈಲಿಯಲ್ಲೇ ಇರಲಿದೆಯಂತೆ. ಇದು ಕಮರ್ಷಿಯಲ್‌ ಚಿತ್ರವಲ್ಲ.

ಒಂದು ರೀತಿಯ ಹಾಫ್ಬೀಟ್‌ ಚಿತ್ರವಾಗಿದ್ದರೂ ಹೊಸತನ, ಹೊಸ ಪ್ರಯೋಗ ಇಲ್ಲಿ ಇನ್ನೊಂದು ವಿಶೇಷ ಎಂಬುದು ಅವರ ಮಾತು. ಅಪೇಕ್ಷಾ ಪುರೋಹಿತ್‌ ಅವರೊಂದಿಗೆ ಜಾಹ್ನವಿ ಕೂಡ ಕಾಣಿಸಿಕೊಂಡಿದ್ದಾರೆ. ಗಡ್ಡಪ್ಪ, ಹೊನ್ನವಳ್ಳಿ ಕೃಷ್ಣ ಇತರೆ ಕಲಾವಿದರೂ ಜರ್ನಿಯಲ್ಲಿ ಎದುರಾಗಲಿದ್ದಾರೆ. ಮೂಡಿಗೆರೆ, ಚಿಕ್ಕಮಗಳೂರು, ಮಂಗಳೂರು, ಬೆಂಗಳೂರು ಹಾಗೂ ಕುಂದಾಪುರ ಸುತ್ತಮುತ್ತ ಚಿತ್ರೀಕರಣವಾಗಿದೆ.

ಚಿತ್ರಕ್ಕೆ ಮಣಿಕಾಂತ್‌ ಕದ್ರಿ ಸಂಗೀತವಿದ್ದು, ಮೂರು ಹಾಡುಗಳಿವೆ. “ಕಥಾ ವಿಚಿತ್ರ’ ಚಿತ್ರಕ್ಕೆ ಛಾಯಾಗ್ರಹಣ ಮಾಡಿದ್ದ ಅಭಿಲಾಷ್‌ ಕಲತಿ ಚಿತ್ರಕ್ಕೆ ಛಾಯಾಗ್ರಾಹಕರು. ಸದ್ಯಕ್ಕೆ ಅಪೇಕ್ಷಾ ಈ ಚಿತ್ರವನ್ನು ಎದುರು ನೋಡುತ್ತಿದ್ದಾರೆ. ಇವರು ಅಭಿನಯಿಸಿರುವ “ಕಿನಾರೆ’ ಕೂಡ ಬಿಡುಗಡೆಯ ಹಾದಿಯಲ್ಲಿದೆ. ಎಲ್ಲಾ ಸರಿ, ಅಪೇಕ್ಷಾ ಪುರೋಹಿತ್‌ ಅವರ ಮದುವೆ ಯಾವಾಗ?

ಇದೇ ಆಗಸ್ಟ್‌ 28 ಎಂಬ ಉತ್ತರ ಕೊಡುತ್ತಾರೆ ಅಪೇಕ್ಷಾ. ಮದುವೆ ಬಳಿಕ ಪವನ್‌ ಒಡೆಯರ್‌ ಜೊತೆ ಕೆಲಸ ಮಾಡುವ ಆಸೆ ಇದೆ. ಆದರೆ, ಅವರು ನಿರ್ದೇಶಕರಾಗಿ, ನಾನು ನಾಯಕಿಯಾಗಿ ಅಲ್ಲ. ಬದಲಾಗಿ, ನನಗೆ ಪ್ರೊಡಕ್ಷನ್‌ನಲ್ಲಿ ಆಸಕ್ತಿ ಇದೆ. ಇಬ್ಬರೂ ಒಟ್ಟಿಗೆ ಕೆಲಸ ಮಾಡುವ ಕಾಲ ಸನಿಹದಲ್ಲಿದೆ ಎನ್ನುತ್ತಲೇ ಮಾತು ಮುಗಿಸುತ್ತಾರೆ ಅಪೇಕ್ಷಾ.