ಬಿಲ್‌ ಗೇಟ್ಸ್‌ ಚಿತ್ರಕ್ಕೆ ಅದ್ಧೂರಿ ಹಾಡು

Team Udayavani, Aug 18, 2018, 12:22 PM IST

ಚಿತ್ರೀಕರಣ ಶುರುವಾದಾಗಿಂದಲೂ ಹಲವು ಕಾರಣಗಳಿಗೆ ಸುದ್ದಿಯಾಗುತ್ತಿರುವ “ಬಿಲ್‌ಗೇಟ್ಸ್‌’ ಚಿತ್ರ ಈಗ ಮತ್ತೂಂದು ಸುದ್ದಿ ಮಾಡಿದೆ. ಹೌದು, ಅದಕ್ಕೆ ಕಾರಣ, ಹಾಡೊಂದಕ್ಕೆ ಬರೋಬ್ಬರಿ 40 ಲಕ್ಷ ರುಪಾಯಿ ಖರ್ಚು ಮಾಡಿರೋದು. ಶ್ರೀ ಪಾಂಚಜನ್ಯ ಸಿನಿ ಕ್ರಿಯೇಷನ್ಸ್‌ನಡಿ ನಿರ್ಮಾಣವಾಗಿರವ ಈ ಚಿತ್ರವನ್ನು ಶ್ರೀನಿವಾಸ್‌ ನಿರ್ದೇಶನ ಮಾಡಿದ್ದಾರೆ.

ಇದೊಂದು ಮಕ್ಕಳ ಚಿತ್ರ ಎಂಬುದರ ಹೊರತಾಗಿಯೂ ತಾಂತ್ರಿಕವಾಗಿಯೂ ಅದ್ದೂರಿಯಾಗಿರಬೇಕೆಂಬ ಕಾರಣದಿಂದ ಚಿತ್ರ ತಂಡ ವಿಶೇಷವಾದೊಂದು ಹಾಡನ್ನು ರೂಪಿಸಿದೆ. ಈ ಹಾಡಿನಲ್ಲಿ ಬರೀ ಮಕ್ಕಳೇ ನಟಿಸಿದ್ದಾರಂತೆ. ಇದಕ್ಕೆ  ಒಟ್ಟಾರೆಯಾಗಿ ಖರ್ಚು ಮಾಡಿರೋ ಹಣ ನಲವತ್ತು ಲಕ್ಷ! ಸಾಮಾನ್ಯವಾಗಿ ಮಕ್ಕಳ ಚಿತ್ರಗಳೆಂದರೆ ಕೈ ಬಿಚ್ಚಿ ಖರ್ಚು ಮಾಡಲು ಹಿಂದೇಟು ಹಾಕಲಾಗುತ್ತದೆ.

ಆದರೆ ಔಟ್‌ಪುಟ್‌ ಚೆನ್ನಾಗಿರಬೇಕೆಂಬ ಕನಸಿನಿಂದ ಖರ್ಚು ಮಾಡಿ ಈ ಚಿತ್ರವನ್ನು ರೂಪಿಸಲಾಗಿದೆ. ಈ ಹಾಡನ್ನು ಮಂಡ್ಯ,  ಮಹದೇವಪುರ, ಸೀತಾಪುರ, ಕೊಳ್ಳೇಗಾಲ ಮುಂತಾದೆಡೆಗಳಲ್ಲಿ ಚಿತ್ರೀಕರಿಸಿಕೊಳ್ಳಲಾಗಿದೆ. ರಾಕೇಶ್‌ ಸಿ ತಿಲಕ್‌ ಅವರ ಛಾಯಾಗ್ರಹಣದಲ್ಲಿ ಮನಮೋಹಕವಾಗಿ ಈ ಹಾಡು ಮೂಡಿಬಂದಿದೆ. ಜೆ  ಮಲ್ಲಿಕಾರ್ಜುನ್‌ಅವರ ಸಂಭಾಷಣೆ, ನೋಬಿನ್‌ಪಾಲ್‌ ಅವರ ಸಂಗೀತ, ಮರಿಸ್ವಾಮಿ ಅವರ ಸಂಕಲನ, ರಾಕೇಶ್‌ ಸಿ ತಿಲಕ್‌  ಛಾಯಾಗ್ರಹಣ, ಕಲೈ ನೃತ್ಯ ನಿರ್ದೇಶನವಿದೆ.