ಕಾಲೇಜುಗಳಲ್ಲೂ ಇನ್ನು  ಜಂಕ್‌ ಫ‌ುಡ್‌ಗೆ ನಿಷೇಧ

Team Udayavani, Aug 23, 2018, 6:00 AM IST

ಹೊಸದಿಲ್ಲಿ: ಈ ತನಕ ಶಾಲೆಗಳಲ್ಲಷ್ಟೇ ಜಂಕ್‌ ಫ‌ುಡ್‌ಗಳಿಗೆ ನಿಷೇಧವಿತ್ತು. ಇನ್ನು ದೇಶಾದ್ಯಂತ ಎಲ್ಲ ಕಾಲೇಜುಗಳಲ್ಲೂ ಜಂಕ್‌ ಆಹಾರಗಳು ಬಂದ್‌ ಆಗಲಿವೆ. ವಿವಿಗಳು, ಉನ್ನತ ಶಿಕ್ಷಣ ಸಂಸ್ಥೆಗಳ ಕ್ಯಾಂಪಸ್‌ನಲ್ಲಿ ಜಂಕ್‌ ಆಹಾರದ ಮಾರಾಟ ನಿಷೇಧಿಸುವಂತೆ ವಿಶ್ವವಿದ್ಯಾಲಯ ಅನುದಾನ ಆಯೋಗ (ಯುಜಿಸಿ) ಆದೇಶ ಹೊರಡಿಸಿದೆ. ಕಾಲೇಜುಗಳಲ್ಲಿ ಜಂಕ್‌ ಆಹಾರಗಳನ್ನು ನಿಷೇಧಿಸುವುದರಿಂದ ಆರೋಗ್ಯಕರ ಆಹಾರಕ್ಕೆ ಹೊಸ ಮಾನದಂಡ ನಿಗದಿಯಾಗ ಲಿದೆ. ವಿದ್ಯಾರ್ಥಿಗಳಲ್ಲಿ ಬೊಜ್ಜಿನ ಮಟ್ಟ ತಗ್ಗಿ ಉತ್ತಮ ಜೀವನ ಸಾಗಿಸಲು ಸಾಧ್ಯ. ಜೀವನ ಶೈಲಿ ಕಾಯಿಲೆಗಳನ್ನು ಇದು ತಡೆಯ ಲಿದೆ ಎಂದು ಯುಜಿಸಿ ತನ್ನ ಸುತ್ತೋಲೆಯಲ್ಲಿ ಹೇಳಿದೆ. ಮಾನವ ಸಂಪನ್ಮೂಲ ಸಚಿವಾಲಯದ ಸೂಚನೆ ಮೇರೆಗೆ ಯುಜಿಸಿಯು ಜಂಕ್‌ ಫ‌ುಡ್‌ ನಿಷೇಧಿಸಿ ಆದೇಶ ಹೊರಡಿಸಿದೆ.

ಈ ಹಿಂದೆ ಸಿಬಿಎಸ್‌ಇ ಕೂಡ ಶಾಲೆಗಳ ಕ್ಯಾಂಟೀನ್‌ ಮೆನುವಿನಿಂದ ಜಂಕ್‌ ಆಹಾರ ಕಿತ್ತುಹಾಕುವಂತೆ ಸೂಚಿಸಿತ್ತು. ಜತೆಗೆ ಮಕ್ಕಳ ಊಟದ ಡಬ್ಬಿಯಲ್ಲೂ ಆರೋಗ್ಯಕರ ಆಹಾರವೇ ಇರುವಂತೆ ಶಾಲೆಗಳು ನೋಡಿಕೊಳ್ಳಬೇಕು ಎಂದೂ ನಿರ್ದೇಶಿಸಲಾಗಿತ್ತು.