2019ರ ಚುನಾವಣೆ ಬಿಜೆಪಿ-ವಿಪಕ್ಷ ಮೈತ್ರಿಕೂಟದ ಹೋರಾಟ: ರಾಹುಲ್‌

Team Udayavani, Aug 25, 2018, 12:19 PM IST

ಲಂಡನ್‌ : 2019ರ ಮಹಾ ಚುನಾವಣೆಯು ಇದೇ ಮೊದಲ ಬಾರಿಗೆ ಆಳುವ ಬಿಜೆಪಿ ಮತ್ತು  ವಿರೋಧ ಪಕ್ಷಗಳ ಮೈತ್ರಿ ಕೂಟದ ನಡುವಿನ ಕತ್ತುಕತ್ತಿನ ಹೋರಾಟವನ್ನು ಕಾಣಲಿದೆ ಎಂದು ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ಹೇಳಿದ್ದಾರೆ.

ದೇಶದ ಸಂವಿಧಾನವೂ ಸೇರಿದಂತೆ ಹಲವಾರು ಸಾಂವಿಧಾನಿಕ ಸಂಸ್ಥೆಗಳ ಮೇಲೆ ನಿರಂತರ ದಾಳಿ ನಡೆಸುತ್ತಿರುವ ಮತ್ತು ದೇಶದಲ್ಲಿನ ಪ್ರಜಾಸತ್ತೆಯನ್ನು ಬುಡಮೇಲು ಮಾಡುತ್ತಿರುವ ಬಿಜೆಪಿ ವಿರುದ್ಧ ವಿಪಕ್ಷಗಳ ಮೈತ್ರಿಕೂಟವು ವ್ಯವಸ್ಥಿತ ದಾಳಿಯನ್ನು ಮುಂಬರುವ ಸಂಸದೀಯ ಚುನಾವಣೆಯಲ್ಲಿ ಸಂಘಟಿಸಲಿದೆ ಎಂದು ರಾಹುಲ್‌ ಗಾಂಧಿ ಇಲ್ಲಿನ ಲಂಡನ್‌ ಸ್ಕೂಲ್‌ ಆಫ್ ಇಕಾನಮಿಕ್ಸ್‌ ನಲ್ಲಿನ ನ್ಯಾಶನಲ್‌ ಇಂಡಿಯನ್‌ ಸ್ಟೂಡೆಂಟ್ಸ್‌ ಆ್ಯಂಡ್‌ ಎಲುಮ್ನಿ ಯೂನಿಯನ್‌ (ಯುಕೆ) ಜತೆಗಿನ ಸಂವಾದಲ್ಲಿ ಹೇಳಿದರು. 

ಮುಂದಿನ ಲೋಕಸಭಾ ಚುನಾವಣೆಯು ಆಳುವ ಬಿಜೆಪಿ ವಿರುದ್ಧ ವಿಪಕ್ಷ ಮೈತ್ರಿಕೂಟ ನೇರ ಹಣಾಹಣಿಯನ್ನು ಕಾಣಲಿದೆ; ಇದು ದೇಶದಲ್ಲೇ ಪ್ರಪ್ರಥಮ ರೀತಿಯದ್ದಾಗಿರುತ್ತದೆ ಎಂದು ರಾಹುಲ್‌ ಹೇಳಿದರು. 

“ಬಹಳ ಮುಖ್ಯ ಸಂಗತಿ ಎಂದರೆ ನಾನು ಪ್ರಜಾಸತ್ತೆಯಲ್ಲಿ ಕಾರ್ಯಾಚರಿಸುತ್ತಿದ್ದೇನೆ; ನನ್ನ ಮೇಲೆ ದಾಳಿ ನಡೆದಿದೆ; ನಾನೀಗ ಕಲಿತುಕೊಂಡಿದ್ದೇನೆ; ಮುಂದಿನ ಚುನಾವಣೆಯ ಮೂಲಕ ನಾನೇನು ಸಾದರ ಪಡಿಸಲಿದ್ದೇನೆ ಎಂಬುದನ್ನು ನೀವು ಕಾಣುವಿರಿ” ಎಂದು ರಾಹುಲ್‌ ಮಾರ್ಮಿಕವಾಗಿ ವಿದ್ಯಾರ್ಥಿ ಸಮುದಾಯದೊಂದಿಗೆ ಮಾತನಾಡುತ್ತಾ ಹೇಳಿದರು.