ರಂಗೇರಿದ ರಣಕಣ  

Team Udayavani, Aug 26, 2018, 4:27 PM IST

ಹಾವೇರಿ: ಸ್ಥಳೀಯ ನಗರಸಭೆ ಚುನಾವಣೆ ದಿನದಿಂದ ದಿನಕ್ಕೆ ರಂಗೇರುತ್ತಿದ್ದು, ನಾಮಪತ್ರ ವಾಪಸ್‌ ಪಡೆದ ಬಳಿಕ ನಗರದ ಎಲ್ಲ ವಾರ್ಡ್‌ನಲ್ಲಿ ಶೀತಲ ಸಮರ ಶುರುವಾಗಿದೆ. ಹಾವೇರಿ ನಗರಸಭೆ ಚುನಾವಣೆ ಕಣದಲ್ಲಿ ಬಿಜೆಪಿ ಹಾಗೂ ಕಾಂಗ್ರೆಸ್‌ನ ಅಭ್ಯರ್ಥಿಗಳು ಎಲ್ಲ 31 ವಾರ್ಡ್ ಗಳಲ್ಲಿ ಸ್ಪರ್ಧಿಸಿದ್ದಾರೆ. ಜೆಡಿಎಸ್‌ 16 ವಾರ್ಡ್‌ಗಳಲ್ಲಿ, ಬಿಎಸ್ಪಿ ಮೂರು ವಾರ್ಡ್‌ಗಳಲ್ಲಿ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿದೆ. ಒಟ್ಟು 64 ಪಕ್ಷೇತರರು ಸ್ಪರ್ಧಾ ಕಣದಲ್ಲಿದ್ದು ಒಟ್ಟು 145 ಅಭ್ಯರ್ಥಿಗಳು ಆಖಾಡದಲ್ಲಿದ್ದಾರೆ.

ಟಿಕೆಟ್‌ ಹಂಚಿಕೆ ಸಂಬಂಧ ಬಿಜೆಪಿಯಲ್ಲಿ ಸ್ಥಳೀಯ ಶಾಸಕ ನೆಹರೂ ಓಲೇಕಾರ, ಬಿಜೆಪಿ ಜಿಲ್ಲಾಧ್ಯಕ್ಷ  ಶಿವರಾಜ ಸಜ್ಜನರ ನಡುವೆ ಜಿದ್ದಾಜಿದ್ದಿ ನಡೆದಿತ್ತು. ಈ ಜಿದ್ದಾಜಿದ್ದಿ ಜಿಲ್ಲಾಧ್ಯಕ್ಷರ ರಾಜೀನಾಮೆವರೆಗೂ ತಾರಕಕ್ಕೇರಿದೆ. ಮುಖಂಡರ ಈ ಭಿನ್ನಾಭಿಪ್ರಾಯ ಈಗ ಎರಡು ಬಣಗಳನ್ನು ಸೃಷ್ಟಿಸಿದ್ದು ಇದರ ಪರಿಣಾಮ ನಗರದ 20ಕ್ಕೂ ಹೆಚ್ಚು ವಾರ್ಡ್‌ಗಳಲ್ಲಿ ಬಿಜೆಪಿ ಬಂಡಾಯ ಅಭ್ಯರ್ಥಿಗಳು ಕಣಕ್ಕಿಳಿದಿದ್ದಾರೆ. ಕಳೆದ ಚುನಾವಣೆಯಲ್ಲಿ ಕೆಜೆಪಿ-ಬಿಜೆಪಿ ಎಂದು ಬಡಿದಾಡಿದ್ದವರು ಈ ಬಾರಿ ಓಲೇಕಾರ- ಸಜ್ಜನರ ಬಣಗಳ ಹೆಸರಲ್ಲಿ ಪ್ರತ್ಯೇಕವಾಗಿ ಸಡ್ಡು ಹೊಡೆದು ನಿಂತಿದ್ದಾರೆ.

ಬಿಜೆಪಿ ಜಿಲ್ಲಾ, ತಾಲೂಕು ಘಟಕ, ವಿವಿಧ ಮೋರ್ಚಾಗಳಲ್ಲಿ ಪ್ರಮುಖ ಸ್ಥಾನಮಾನ ಹೊಂದಿದ್ದ ಪದಾಧಿಕಾರಿಗಳು, ಬಿಜೆಪಿ ನಗರಸಭೆ ಸದಸ್ಯರೇ ಈಗ ಪಕ್ಷೇತರರಾಗಿ ಸ್ಪರ್ಧಿಸಿ ಬಂಡೆದಿದ್ದಾರೆ. ಶಾಸಕರು ಎಲ್ಲ ಮುಖಂಡರನ್ನು ವಿಶ್ವಾಸಕ್ಕೆ ತೆಗೆದುಕೊಂಡಿಲ್ಲ, ಏಕಪಕ್ಷೀಯವಾಗಿ ನಿರ್ಧಾರ ತೆಗೆದುಕೊಂಡು ಟಿಕೆಟ್‌ ಹಂಚಿಕೆ ಮಾಡಿದ್ದಾರೆ. ಪಕ್ಷಕ್ಕೆ ದುಡಿದವರನ್ನು ಕಡೆಗಣಿಸಲಾಗಿದೆ. ಜಿಲ್ಲಾ ಕೇಂದ್ರದಲ್ಲಿ ಶ್ರಮ ವಹಿಸಿ ಪಕ್ಷ ಸಂಘಟಿಸಿದವರಿಗೆ ಹಿನ್ನಡೆಯಾಗಿದೆ ಎಂಬುದು ಬಂಡಾಯ ಬಾವುಟ ಹಾರಿಸಿದವರ ಆರೋಪ.

ಬಿಜೆಪಿಯೊಳಗಿನ ಆಂತರಿಕ ಒಡಕು ಸದುಪಯೋಗ ಪಡೆಯಲು ಕಾಂಗ್ರೆಸ್‌ ತುದಿಗಾಲಲ್ಲಿ ನಿಂತಿದೆಯಾದರೂ ಕಾಂಗ್ರೆಸ್‌ಗೂ ಕೆಲವು ಕಡೆಗಳಲ್ಲಿ ಬಂಡಾಯ, ಟಿಕೆಟ್‌ ವಂಚಿತರ ಅಸಮಾಧಾನ ಓಟಿನ ಬೇಟೆಗೆ ತೊಡಕಾಗಿದೆ. ಈ ಟಿಕೆಟ್‌ ಗೊಂದಲದ ಕಾರಣದಿಂದಾಗಿಯೇ ಕಾಂಗ್ರೆಸ್‌ನ ಜಿಲ್ಲಾ ಪ್ರಮುಖ ರಮೇಶ ಕಡಕೋಳ ಪಕ್ಷದ ಪ್ರಾಥಮಿಕ ಸದಸ್ಯತ್ವಕ್ಕೆ ರಾಜೀನಾಮೆ ನೀಡಿದ್ದು ಈ ರೀತಿ ಅಸಮಾಧಾನಿತರ ಸಂಖ್ಯೆ ಕಾಂಗ್ರೆಸ್‌ನಲ್ಲೂ ಅ ಧಿಕವಾಗಿದೆ.ಹೀಗಾಗಿ ಎರಡೂ ರಾಷ್ಟ್ರೀಯ ಪಕ್ಷಗಳು ಈಗ ಪ್ರತಿಸ್ಪರ್ಧಿಗಿಂತ ಆಂತರಿಕ ಬಿಕ್ಕಟ್ಟು ಎದುರಿಸುವುದೇ ದೊಡ್ಡ ಸವಾಲಾಗಿದೆ.

ಬಹಿರಂಗ ಬಂಡಾಯ: ಸಾಮಾಜಿಕ ಜಾಲತಾಣಗಳಲ್ಲಿ ಇಷ್ಟು ದಿನ ಪಕ್ಷದ ಪರವಾಗಿ ಪೋಸ್ಟ್‌ ಹಾಕುತ್ತಿದ್ದವರು ಈಗ ಬಂಡಾಯದ ಕುರಿತು ಪೋಸ್ಟ್‌ ಹಾಕುತ್ತಿದ್ದು, ಪಕ್ಷಕ್ಕಾಗಿ ದುಡಿದವರಿಗೆ ಅನ್ಯಾಯವಾಗಿದೆ. ನಮ್ಮನ್ನು ಬೆಂಬಲಿಸಿ ಎಂದು ಅನೇಕರು ಪೋಸ್ಟ್‌ ಹಾಕುತ್ತಿದ್ದಾರೆ. ಮೀಸಲಾತಿ ಬದಲಾಗಿರುವ ಹಿನ್ನೆಲೆಯಲ್ಲಿ ಕೆಲ ಮಾಜಿ ಸದಸ್ಯರು ತಮ್ಮ ಪತ್ನಿ, ಸಹೋದರಿ, ಸಹೋದರರಿಗೆ ಟಿಕೆಟ್‌ ಕೊಡಿಸಿ ಸ್ಪರ್ಧೆಗಿಳಿಸಿದ್ದು ಅವರ ಗೆಲುವಿಗಾಗಿ ತಂತ್ರಗಳನ್ನು ರೂಪಿಸುತ್ತಿದ್ದಾರೆ. ಒಟ್ಟಾರೆ ನಗರಸಭೆ ಚುನಾವಣೆ ಕಾವು ವಿಧಾನಸಭೆ ಚುನಾವಣೆಗಿಂತ ಹೆಚ್ಚಾಗಿದ್ದು ಪ್ರತಿವಾರ್ಡ್‌ನಲ್ಲಿ ಬಣ, ಪಕ್ಷ, ಬೆಂಬಲಿಗರಿಂದ ತುರುಸಿನ ತಂತ್ರಗಾರಿಕೆ ನಡೆದಿದೆ.

ನಾನು ಬಿಜೆಪಿ ಜಿಲ್ಲಾ ವಕ್ತಾರನಾಗಿ ಪಕ್ಷ ಸಂಘಟನೆಗಾಗಿ ಹಗಲಿರುಳು ಶ್ರಮಿಸಿದ್ದೇನೆ. ರೈತರಿಗೆ ಬೆಳೆವಿಮೆ ಕೊಡಿಸಲು ಪಕ್ಷದ ವತಿಯಿಂದ ಜಿಲ್ಲಾಡಳಿತ ಭವನದ ಎದುರು ಧರಣಿ, ಹೋರಾಟ ಮಾಡಿ ಜೈಲಿಗೂ ಹೋಗಿ ಬಂದಿದ್ದೇನೆ. ಪಕ್ಷದ ಮುಖಂಡರು ನಮ್ಮ ಹೋರಾಟ ಗಮನಿಸಿ ನಗರಸಭೆಯಲ್ಲಿ ಟಿಕೆಟ್‌ ಕೊಡುವ ಭರವಸೆ ಇತ್ತು. ಅದು ಹುಸಿಯಾಗಿದೆ. ಹೀಗಾಗಿ ಕೊನೆ ಕ್ಷಣದಲ್ಲಿ ಪಕ್ಷೇತರನಾಗಿ ಸ್ಪರ್ಧಿಸಿದ್ದೇನೆ.
.ಸುರೇಶ ಹೊಸಮನಿ, ಪಕ್ಷೇತರ ಅಭ್ಯರ್ಥಿ

ಕಾಂಗ್ರೆಸ್‌ನಲ್ಲಿ ಯಾವುದೇ ಭಿನ್ನಮತವಿಲ್ಲ. ಪಕ್ಷದ ಅಧಿಕೃತ ಅಭ್ಯರ್ಥಿಯನ್ನು ಗೆಲ್ಲಿಸುವಂತೆ ಎಲ್ಲರಿಗೂ ಮನವಿ ಮಾಡಲಾಗಿದೆ. ಈ ಸಲ ಪೂರ್ಣ ಬಹುಮತದೊಂದಿಗೆ ಕಾಂಗ್ರೆಸ್‌ ಅಧಿಕಾರ ಹಿಡಿಯುವ ವಿಶ್ವಾಸವಿದೆ.
.ಎಸ್‌ಎಫ್‌ಎನ್‌ ಗಾಜೀಗೌಡ್ರ,
ಮಾಜಿ ಜಿಲ್ಲಾಧ್ಯಕ್ಷರು, ಕಾಂಗ್ರೆಸ್‌

ಎಚ್‌.ಕೆ. ನಟರಾಜ