ಮಾವೋ ನಂಟಿನ ಬಂಧಿತ ಮೂವರು ಗೃಹ ಬಂಧನಕ್ಕಾಗಿ ಮನೆಗೆ ರವಾನೆ

Team Udayavani, Aug 30, 2018, 12:10 PM IST

ಪುಣೆ/ಮುಂಬಯಿ : ಸುಪ್ರೀಂ ಕೋರ್ಟ್‌ ನಿರ್ದೇಶನದ ಪ್ರಕಾರ ಪುಣೆ ಪೊಲೀಸರು ಮಾವೋ ನಂಟು ಹೊಂದಿರುವ ಆರೋಪದ ಮೇಲೆ ನಿನ್ನೆ ತಾವು ಬಂಧಿಸಿದ್ದ ಮೂವರು ಎಡ ಪಂಥೀಯ ಮಾನವ ಹಕ್ಕು ಕಾರ್ಯಕರ್ತರನ್ನು ಇಂದು ಅವರವರ ಮನೆಗೆ ವಾಪಾಸ್‌ ಕಳುಹಿಸಿದರು. 

ನಿನ್ನೆ  ಬುಧವಾರ ರಾತ್ರಿಯೇ ಈ ಬಂಧಿತ ಕಾರ್ಯಕರ್ತರನ್ನು ಅವರ ಅನುಕ್ರಮ ನಗರಗಳಿಗೆ ವಾಪಸ್‌ ಕಳುಹಿಸಲಾಗಿದ್ದು ಅವರು ತಮ್ಮ ಮನೆ ತಲುಪಿದ್ದಾರೆ ಎಂದು ಪ್ರಕರಣದ ತನಿಖೆ ನಡೆಸುತ್ತಿರುವ ಪುಣೆಯ ಸಹಾಯಕ ಪೊಲೀಸ್‌ ಕಮಿಷನರ್‌ ಶಿವಾಜಿ ಪವಾರ್‌ ತಿಳಿಸಿದ್ದಾರೆ. 

ಮನೆಗೆ ಕಳುಹಿಸಲಾಗಿರುವ ಈ ಮೂವರು ಕಾರ್ಯಕರ್ತರನ್ನು ಗೃಹ ಬಂಧನದಲ್ಲಿ ಇರಿಸಲಾಗುವುದು ಎಂದವರು ತಿಳಿಸಿದರು. 

ಗೃಹ ಬಂಧನಕ್ಕಾಗಿ ಅವರವರ ಮನೆಗೆ ರವಾನಿಸಲ್ಪಟ್ಟಿರುವ ನಾಯಕರೆಂದರೆ ಹೈದರಾಬಾದಿನ ವರವರ ರಾವ್‌, ವರ್ನನ್‌ ಗೊನ್ಸಾಲ್ವಿಸ್‌ ಮತ್ತು ಅರುಣ್‌ ಫೆರೀರಾ.