ಸೆರೆನಾ ಪಂದ್ಯಗಳನ್ನು ಬಹಿಷ್ಕರಿಸಲು ನಿರ್ಧಾರ

Team Udayavani, Sep 13, 2018, 6:50 AM IST

ನ್ಯೂಯಾರ್ಕ್‌: ಯುಎಸ್‌ ಓಪನ್‌ ಟೆನಿಸ್‌ ಟೂರ್ನಿಯ ಫೈನಲ್‌ನಲ್ಲಿ ಸೆರೆನಾ ವಿಲಿಯಮ್ಸ್‌ನ ವರ್ತನೆಯನ್ನು ಖಂಡಿಸಿರುವ ಟೆನಿಸ್‌ ಅಂಪಾಯರ್‌ಗಳು ಸೆರೆನಾ ಅವರ ಭವಿಷ್ಯದ ಪಂದ್ಯಗಳನ್ನು ಬಹಿಷ್ಕರಿಸಲು ನಿರ್ಧರಿಸಿದ್ದಾರೆ.

ನವೋಕಾ ಒಸಾಕಾ ವಿರುದ್ಧದ ಪೈನಲ್‌ ಪಂದ್ಯದ ವೇಳೆ ಸೆರೆನಾ ವಿಲಿಯಮ್ಸ್‌ ಪಂದ್ಯದ ಅಂಪಾಯರ್‌ ರಾಮೋಸ್‌ ಅವರನ್ನು “ಸುಳ್ಳುಗಾರ, ಕಳ್ಳ’ಎಂದು ಅನುಮೋದಿಸಿದ್ದರು. ಇದನ್ನು ಖಂಡಿಸಿರುವ ಅಂಪಾಯರ್‌ಗಳು ಸೆರೆನಾ ಕ್ಷಮೆ ಕೇಳುವವರೆಗೂ ಸೆರೆನಾ ಇರುವ ಪಂದ್ಯಗಳನ್ನು ಬಹಿಷ್ಕರಿಸುತ್ತೇವೆ ಎಂದು ತಿಳಿಸಿದ್ದಾರೆ.

ಆರು ಬಾರಿ ಯುಎಸ್‌ ಓಪನ್‌ ವಿಜೇತ ಸೆರೆನಾ ವಿಲಿಯಮ್ಸ್‌ ಫೈನಲ್ನಲ್ಲಿ ಕೋಚ್‌ನಿಂದ ಮಾರ್ಗದರ್ಶನ ಪಡೆಯುತ್ತಿ ದ್ದುದ್ದನ್ನು ಗಮನಿಸಿದ ಅಂಪಾಯರ್‌ ಪ್ರತಿ ಸ್ಪರ್ಧಿಗೆ ಹೆಚ್ಚುವರಿ ಅಂಕವನ್ನು ನೀಡಿದ್ದರು. ಇದರಿಂದ ಕೋಪಗೊಂಡ ಸೆರೆನಾ ಅಂಪಾಯರ್‌ ಅನ್ನು “ಸುಳ್ಳುಗಾರ, ಕಳ್ಳ, ಜನಾಂಗಿಯ ನಿಂದನೆ ಮಾಡಿದ್ದಾರೆ ಎಂದೆಲ್ಲ ಕೂಗಾಡಿದ್ದರು. ಈ ವರ್ತನೆಗೆ ಯುನೈಟೆಡ್‌ ಸ್ಟೇಟ್ಸ್‌ ಟೆನಿಸ್‌ ಅಸೋಸಿಯೇಶನ್‌ (ಯುಎಸ್‌ಟಿಎ)17 ಸಾವಿರ ಡಾಲರ್‌ ದಂಡ ವಿಧಿಸಿತ್ತು.

ಅಂಪಾಯರ್ಗಳ ತಂಡವೊಂದು ಇಂತಹ ಅನೇಕ ಸಂದರ್ಭಗಳಲ್ಲಿ ಯುಎಸ್ಟಿಎ ಅಂಪಾಯರ್‌ಗಳ ಬೆಂಬಲಕ್ಕೆ ಬಂದಿಲ್ಲ ಎಂದು ದೂರಿವೆ. ವಿಲಿಯಮ್ಸ್‌ ಪಂದ್ಯಗಳನ್ನು ಬಹಿಷ್ಕರಿ ಸುವ ಬಗ್ಗೆ ಅಂಪಾಯರ್‌ಗಳ ಗುಂಪು ಮಾತುಕತೆ ನಡೆಸುತ್ತಿದ್ದು, ಇಂತಹ ಸನ್ನಿವೇಶಗಳ ಮರುಕಳಿಸಬಾರದು ಎಂಬ ಕಾರಣಕ್ಕೆ ಅಂಪಾಯರ್‌ಗಳ ಯೂನಿಯನ್‌ ಆರಂಭಿಸುವ ಬಗ್ಗೆ ಚಿಂತನೆ ನಡೆಸುತ್ತಿದ್ದಾರೆ.