ಹೆಣ್ಣನ್ನು ಕೇವಲವಾಗಿ ಕಂಡಿಲ್ಲ: ಮೋಹನ್‌ ಬಗಾನ್‌ ಅಧ್ಯಕ್ಷರ ಸ್ಪಷ್ಟನೆ

Team Udayavani, Sep 15, 2018, 6:30 AM IST

ಕೋಲ್ಕತಾ: ಇಲ್ಲಿನ ಖ್ಯಾತ ಫ‌ುಟ್‌ಬಾಲ್‌ ಕ್ಲಬ್‌ ಮೋಹನ್‌ ಬಗಾನ್‌ ತಂಡ ಕಲ್ಕತಾ ಫ‌ುಟ್‌ಬಾಲ್‌ ಲೀಗ್‌ನಲ್ಲಿ (ಸಿಎಫ್ಎಲ್‌)ಚಾಂಪಿಯನ್‌ ಆದ ಬೆನ್ನಲ್ಲೇ ತಂಡದ ಅಧ್ಯಕ್ಷ ವಿವಾದಾತ್ಮಕ ಹೇಳಿಕೆ ನೀಡಿ ಟೀಕೆಗೆ ಗುರಿಯಾದ ಘಟನೆ ನಡೆದಿದೆ. 

ಗೆದ್ದ ಖುಷಿಯಲ್ಲಿ ಅಧ್ಯಕ್ಷ ಸ್ವಪನ್‌ ಸಾಧನ್‌ ಬೋಸ್‌ ಅವರು ಮಾಧ್ಯಮವೊಂದಕ್ಕೆ ಪ್ರತಿಕ್ರಿಯಿಸಿ “ನನಗೆ  ಈಗ ಎಷ್ಟು ಖುಷಿಯಾಗುತ್ತಿದೆ ಎಂದರೆ 7 ವರ್ಷ ಸತತವಾಗಿ ಹೆಣ್ಣು ಮಗು ಪಡೆದ ಬಳಿಕ ಹಠಾತ್‌ ಗಂಡು ಮಗು ಹುಟ್ಟಿದಷ್ಟು ಖುಷಿ ಆಗಿದೆ’ ಎಂದಿದ್ದರು.

ಈ ಹೇಳಿಕೆ ಪ್ರಕಟವಾದ ಬೆನ್ನಲ್ಲೇ ಬೋಸ್‌ ಹೆಣ್ಣಿನ ಬಗ್ಗೆ ಅಸಡ್ಡೆಯ ಹೇಳಿಕೆ ನೀಡಿದ್ದಾರೆ ಎಂದು ಟೀಕೆ ವ್ಯಕ್ತವಾಗಿತ್ತು. ಈ ಬಗ್ಗೆ ಸ್ಪಷ್ಟನೆ ನೀಡಿದ ಅವರು, “ನಾನು ಹೆಣ್ಣನ್ನು ಕೇವಲವಾಗಿ ಕಂಡಿಲ್ಲ. ನನ್ನ ಮನೆಯಲ್ಲೂ ಹೆಣ್ಣು ಮಕ್ಕಳಿದ್ದಾರೆ. ನನ್ನ ಹೇಳಿಕೆಯನ್ನು ತಿರುಚಲಾಗಿದೆ. ಇದರಿಂದ ಯಾರಿಗಾದರೂ ಮನಸ್ಸಿಗೆ ನೋವಾಗಿದ್ದರೆ ಕ್ಷಮಿಸಿ’ ಎಂದಿದ್ದಾರೆ.