ಕರ್ತಾರ್ಪುರ ಗಡಿ ತೆರೆಯುವ ಪ್ರಸ್ತಾವವಿಲ್ಲ

Team Udayavani, Sep 18, 2018, 7:17 AM IST

ಹೊಸದಿಲ್ಲಿ: ಕಳೆದ ತಿಂಗಳು ಪಾಕಿಸ್ಥಾನ ಪ್ರಧಾನಿಯಾಗಿ ಇಮ್ರಾನ್‌ ಖಾನ್‌ ಪ್ರಮಾಣ ವಚನ ಸ್ವೀಕಾರ ಸಮಾರಂಭಕ್ಕೆ ತೆರಳಿದ್ದ ಪಂಜಾಬ್‌ ಸಚಿವ ನವ್‌ಜೋತ್‌ ಸಿಂಗ್‌ ಸಿಧು, ಸಿಕ್ಖರ ಪವಿತ್ರ ಸ್ಥಳಕ್ಕೆ ತೆರಳಲು ಪಾಕಿಸ್ಥಾನದ ಕರ್ತಾರ್ಪುರ ಗಡಿಯನ್ನು ತೆರೆಯಲು ಪಾಕ್‌ ಒಪ್ಪಿಕೊಂಡಿದೆ ಎಂದಿದ್ದರಾದರೂ, ಈ ಬಗ್ಗೆ ಪಾಕ್‌ನಿಂದ ಅಧಿಕೃತ ಪ್ರಸ್ತಾವನೆ ಬಂದಿಲ್ಲ ಎಂದು ವಿದೇಶಾಂಗ ವ್ಯವಹಾರಗಳ ಸಹಾಯಕ ಸಚಿವ ವಿ.ಕೆ.ಸಿಂಗ್‌ ಹೇಳಿದ್ದಾರೆ. 

ಪಾಕಿಸ್ಥಾನದಲ್ಲಿ ಚುನಾವಣೆ ನಡೆದು ಪ್ರಜಾಸತ್ತಾತ್ಮಕ ಸರಕಾರ ಜಾರಿಗೆ ಬಂದರೂ ಈಗಲೂ ಸೇನೆಯೇ ಸರಕಾರ ನಡೆಸುತ್ತಿದೆ ಎಂದು ವಿ.ಕೆ. ಸಿಂಗ್‌ ಹೇಳಿದ್ದಾರೆ. ಅಲ್ಲಿನ ಪ್ರಧಾನಿ ಬದಲಾವಣೆ ತರಲು ಸಾಧ್ಯವೇ ಎಂಬುದನ್ನು ಇನ್ನಷ್ಟೇ ಎದುರು ನೋಡಬೇಕಿದೆ. ನಾವು ಕಾದು ನೋಡುವ ತಂತ್ರ ಅನುಸರಿಸುತ್ತಿದ್ದೇವೆ ಎಂದಿದ್ದಾರೆ. ಸೇನೆಯೇ ಪ್ರಧಾನಿ ಅಭ್ಯರ್ಥಿಯನ್ನು ಪ್ರಸ್ತಾಪಿಸಿತ್ತು. ಈಗಲೂ ಸೇನೆಯೇ ಆಡಳಿತ ನಡೆಸುತ್ತಿದೆ. ಹೀಗಾಗಿ ವ್ಯಕ್ತಿ ಸೇನೆಯ ನಿಯಂತ್ರಣದಲ್ಲೇ ಇರುತ್ತಾನೆಯೇ, ಅದರಿಂದ  ಹೊರಬರುತ್ತಾನೆಯೇ ಎಂಬುದನ್ನು ಕಾದು ನೋಡಬೇಕು ಎಂದಿದ್ದಾರೆ.