ಭಾರತದ ವನಿತೆಯರಿಗೆ ಟಿ20 ಸರಣಿ

Team Udayavani, Sep 25, 2018, 12:45 PM IST

ಕೊಲಂಬೊ: ಅನುಜಾ ಪಾಟೀಲ್‌ ಅವರ ಆಲ್‌ರೌಂಡ್‌ ಪ್ರದರ್ಶನ ಹಾಗೂ ಜೆಮಿಮಾ ರೋಡ್ರಿಗಸ್‌ ಅವರ ಸತತ 2ನೇ ಅರ್ಧ ಶತಕದ ನೆರವಿನಿಂದ ಆತಿಥೇಯ ಶ್ರೀಲಂಕಾ ವಿರುದ್ಧ 4ನೇ ಟಿ20 ಪಂದ್ಯದಲ್ಲಿ 7 ವಿಕೆಟ್‌ಗಳ ಗೆಲುವು ದಾಖಲಿಸಿದ ಭಾರತ ಸರಣಿಯನ್ನು ವಶಪಡಿಸಿಕೊಂಡಿತು. 5 ಪಂದ್ಯಗಳ ಸರಣಿಯಲ್ಲಿ ಹರ್ಮನ್‌ಪ್ರೀತ್‌ ಕೌರ್‌ ಬಳಗ 3-0 ಮುನ್ನಡೆಯಲ್ಲಿದೆ.
 
ಸೋಮವಾರ ನಡೆದ 4ನೇ ಪಂದ್ಯ ಮಳೆಯ ಕಾರಣ 17 ಓವರ್‌ಗಳಿಗೆ ಕುಂಠಿತಗೊಂಡಿತು. ಟಾಸ್‌ ಸೋತು ಬ್ಯಾಟಿಂಗಿಗೆ ಇಳಿದ ಶ್ರೀಲಂಕಾ 5 ವಿಕೆಟಿಗೆ 134 ರನ್‌ ಕಲೆ ಹಾಕಿದರೆ, ಭಾರತ 15.4 ಓವರ್‌ಗಳಲ್ಲಿ  ಕೇವಲ 3 ವಿಕೆಟ್‌ ನಷ್ಟಕ್ಕೆ 137 ರನ್‌ ಬಾರಿಸಿತು.

ಚೇಸಿಂಗ್‌ ವೇಳೆ ಮಿಥಾಲಿ ರಾಜ್‌ (11), ಸ್ಮತಿ ಮಂಧನಾ (5), ತನ್ಯಾ ಭಾಟಿಯಾ (5) ಬಹಳ ಬೇಗ ಪೆವಿಲಿನಿಯನ್‌ ಸೇರಿದರು. ಈ ಮೂವರೂ ಒಶಾದಿ ರಣಸಿಂಘೆ ಬಲೆಗೆ ಬಿದ್ದರು. ಬಳಿಕ ಜೆಮಿಮಾ ಮತ್ತು ಅನುಜಾ ಪಾಟೀಲ್‌ ಅಜೇಯ ಜತೆಯಾಟ ನಡೆಸಿ ಭಾರತವನ್ನು ದಡ ತಲುಪಿಸಿದರು. ಇವರು ಮುರಿಯದ 4ನೇ ವಿಕೆಟಿಗೆ 70 ಎಸೆತಗಳಲ್ಲಿ 96 ರನ್‌ ಪೇರಿಸಿದರು. ಜೆಮಿಮಾ ಅಜೇಯ 52 ಹಾಗೂ ಅನುಜಾ ಅಜೇಯ 54 ರನ್‌ ಹೊಡೆದರು. ಇದು ಶ್ರೀಲಂಕಾ ವಿರುದ್ಧ ಜೆಮಿಮಾ ಬಾರಿಸಿದ ಸತತ 2ನೇ ಅರ್ಧ ಶತಕ. ರವಿವಾರದ 3ನೇ ಪಂದ್ಯದಲ್ಲಿ ಅವರು 57 ರನ್‌ ಹೊಡೆದು ಭಾರತಕ್ಕೆ ಗೆಲುವು ತಂದುಕೊಟ್ಟಿದ್ದರು. 

ಶ್ರೀಲಂಕಾ ಪರ ಶಶಿಕಲಾ ಸಿರಿವರ್ಧನೆ 40, ಚಾಮರಿ ಜಯಾಂಗನಿ 31, ಯಶೋದಾ ಮೆಂಡಿಸ್‌ 19 ರನ್‌ ಹೊಡೆದರು. ಅನುಜಾ ಪಾಟೀಲ್‌ 36 ರನ್‌ ನೀಡಿ 3 ವಿಕೆಟ್‌ ಕಬಳಿಸಿದರು. ಈಗಾಗಲೇ ಏಕದಿನ ಸರಣಿಯನ್ನು 2-1 ಅಂತರದಿಂದ ಜಯಿಸಿರುವ ಭಾರತ, ಟಿ20 ಸರಣಿಯನ್ನು ಕೂಡ ತನ್ನದಾಗಿಸಿಕೊಂಡಿತು. ಒಂದು ಟಿ20 ಪಂದ್ಯ ಮಳೆಯಿಂದ ರದ್ದಾಗಿದೆ. ಅಂತಿಮ ಪಂದ್ಯ ಮಂಗಳವಾರ ನಡೆಯಲಿದೆ. 

ಸಂಕ್ಷಿಪ್ತ ಸ್ಕೋರ್‌: ಶ್ರೀಲಂಕಾ-17 ಓವರ್‌ಗಳಲ್ಲಿ 8 ವಿಕೆಟಿಗೆ 134 (ಶಶಿಕಲಾ 40, ಜಯಾಂಗನಿ 31, ಅನುಜಾ ಪಾಟೀಲ್‌ 36ಕ್ಕೆ 3). ಭಾರತ-15.4 ಓವರ್‌ಗಳಲ್ಲಿ 3 ವಿಕೆಟಿಗೆ 137 (ಜೆಮಿಮಾ 52, ಅನುಜಾ 54, ಒಶಾದಿ 33ಕ್ಕೆ 3).