ಭಾರತದ ವಾಯುಗಡಿ ದಾಟಿದ ಪಾಕ್‌ ಹೆಲಿಕ್ಯಾಪ್ಟರ್‌;ಸೇನೆಯಿಂದ ಗುಂಡಿನ ಮಳೆ

Team Udayavani, Sep 30, 2018, 2:41 PM IST

ಶ್ರೀನಗರ : ಪಾಕಿಸ್ಥಾನದ ಸೇನಾ ಹೆಲಿಕ್ಯಾಪ್ಟರ್‌ ಭಾನುವಾರ ಭಾರತದ ವಾಯುಗಡಿಯನ್ನು ದಾಟಿ ಬಂದಿದ್ದು, ಪೂಂಚ್‌ ಪ್ರದೇಶದ ಗಡಿಯಲ್ಲಿ ಉದ್ವಿಗ್ನ ಸ್ಥಿತಿ ನಿರ್ಮಾಣವಾಗಿದೆ. 

ಮಧ್ಯಾಹ್ನ 12.13 ರ ವೇಳೆಗೆ ವಾಯುಗಡಿ ಉಲ್ಲಂಘನೆ ಮಾಡಿದ ಹೆಲಿಕ್ಯಾಪ್ಟರ್‌ ಕೆಲ ನಿಮಿಷಗಳ ಕಾಲ ಹಾರಾಟ ನಡೆಸಿದೆ. ಕೂಡಲೆ ಯೋಧರು ಹೆಲಿಕ್ಯಾಪ್ಟರ್‌ನತ್ತ ಗುಂಡಿನ ಮಳೆ ಸುರಿಸಿದ್ದಾರೆ. ಆ ಬಳಿಕ ಹೆಲಿಕ್ಯಾಪ್ಟರ್‌ ವಾಪಾಸಾಗಿದೆ ಎಂದು ತಿಳಿದು ಬಂದಿದೆ. 

ಪಾಕ್‌ ಜೊತೆಗಿನ ಮಾತುಕತೆಯನ್ನು ಭಾರತ ರದ್ದು ಪಡಿಸಿದ ಬೆನ್ನಲ್ಲೇ ಈ ಘಟನೆ ನಡೆದಿದ್ದು, ಗಡಿಯಲ್ಲಿ ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಗಿದ್ದು, ಸೇನೆ ವ್ಯಾಪಕ ಕಟ್ಟೆಚ್ಚರ ವಹಿಸಿದೆ. ಪಾಕ್‌ ಉದ್ಧಟತನದ ಬಗ್ಗೆ  ಭಾರತ ತೀವ್ರ ವಿರೋಧ ವ್ಯಕ್ತ ಪಡಿಸಿದೆ. ಈಗಾಗಲೆ ಅಂತರಾಷ್ಟ್ರೀಯ ಮಟ್ಟದಲ್ಲಿ ನಡೆಯಬೇಕಾಗಿದ್ದ ಮಾತುಕತೆಯನ್ನು ರದ್ದು ಪಡಿಸಿದೆ. 

ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್‌ ಅವರು ವಿಶ್ವಸಂಸ್ಥೆ ಯಲ್ಲಿ  ಪಾಕ್‌ ವಿರುದ್ಧ ಧ್ವನಿ ಎತ್ತಿ ಉಗ್ರವಾದಿತ್ವ ಮತ್ತು ಮಾತುಕತೆ ಒಟ್ಟಿಗೆ ನಡೆಯಲು ಸಾಧ್ಯವಿಲ್ಲ ಎಂದಿದ್ದರು.