ಮಜ್ಜಿಗೆ ಹುಳಿ ಮುಗಿಸಿದ ರೂಪಿಕಾ

Team Udayavani, Oct 1, 2018, 11:49 AM IST

ರೂಪಿಕಾ ಸದ್ದಿಲ್ಲದೇ ಮಜ್ಜಿಗೆ ಹುಳಿ ಮುಗಿಸಿದ್ದಾರೆ! ಹೀಗೆಂದರೆ ನಿಮಗೆ ಆಶ್ಚರ್ಯವಾಗಬಹುದು. ಮಜ್ಜಿಗೆ ಹುಳಿ ಮುಗಿಸಿದ್ದನ್ನು ರೂಪಿಕಾ ಸುದ್ದಿ ಮಾಡಬೇಕಿತ್ತಾ ಎಂದು ನೀವು ಕೇಳಬಹುದು. ಇಲ್ಲಿ ನಾವು ಹೇಳುತ್ತಿರೋದು ಮಜ್ಜಿಗೆ ಹುಳಿ ಖಾದ್ಯದ ಬಗ್ಗೆಯಲ್ಲ, ಹೊಸ ಸಿನಿಮಾ ಬಗ್ಗೆ. ಹೌದು, “ಮಜ್ಜಿಗೆ ಹುಳಿ’ ಎಂಬ ಸಿನಿಮಾದಲ್ಲಿ ರೂಪಿಕಾ ನಾಯಕಿಯಾಗಿ ನಟಿಸಿದ್ದಾರೆ. ಈಗಾಗಲೇ ಚಿತ್ರೀಕರಣ ಕೂಡಾ ಮುಗಿದು ಹೋಗಿದೆ.

ಈ ಮೂಲಕ ರೂಪಿಕಾ ಕಾಮಿಡಿ ಜಾನರ್‌ ಪ್ರಯತ್ನಿಸಿದ್ದಾರೆ. ವೆಂಕಟ್‌ ಎನ್ನುವವರು ಈ ಚಿತ್ರದ ಹೀರೋ. “ಮಜ್ಜಿಗೆ ಹುಳಿ’ ಚಿತ್ರದ ಮೂಲಕ ರವಿ ಎನ್ನುವವರು ನಿರ್ದೇಶಕರಾಗುತ್ತಿದ್ದಾರೆ. ಮೊದಲ ಬಾರಿಗೆ ಔಟ್‌ ಅಂಡ್‌ ಔಟ್‌ ಕಾಮಿಡಿ ಸಿನಿಮಾದಲ್ಲಿ ನಟಿಸಿರುವುದರಿಂದ ರೂಪಿಕಾ ಖುಷಿಯಾಗಿದ್ದಾರೆ. “ಪೂರ್ಣ ಪ್ರಮಾಣದ ಕಾಮಿಡಿ ಸಿನಿಮಾವಾಗಿ “ಮಜ್ಜಿಗೆ ಹುಳಿ’ ನನಗೆ ಮೊದಲ ಸಿನಿಮಾ ಎನ್ನಬಹುದು.

ಈ ಹಿಂದೆ ಬೇರೆ ಬೇರೆ ಸಿನಿಮಾಗಳಲ್ಲಿ ಸಣ್ಣಪುಟ್ಟ ಕಾಮಿಡಿ ಮಾಡಿದ್ದೇನೆ. ಆದರೆ, ಈ ಚಿತ್ರ ಪ್ರೇಕ್ಷಕರನ್ನು ನಕ್ಕು ನಗಿಸುತ್ತದೆ ಎಂಬ ವಿಶ್ವಾಸವಿದೆ’ ಎನ್ನುತ್ತಾರೆ. ಇನ್ನು, ಬಹುತೇಕ ಸಿನಿಮಾ ಒಂದು ಕೋಣೆಯೊಳಗಡೆ ನಡೆಯುತ್ತದೆಯಂತೆ. ಇತ್ತೀಚೆಗೆ ಹಾಡುಗಳ ಚಿತ್ರೀಕರಣದೊಂದಿಗೆ “ಮಜ್ಜಿಗೆ ಹುಳಿ’ ಚಿತ್ರೀಕರಣ ಮುಕ್ತಾಯವಾಗಿದೆ. ಈ ಹಿಂದೆ “ಮಂಜರಿ’ ಎಂಬ ಹಾರರ್‌ ಚಿತ್ರದಲ್ಲಿ ರೂಪಿಕಾ ನಟಿಸಿದ್ದರು. ಈಗ ಕಾಮಿಡಿ.

ಸಿನಿಮಾದಿಂದ ಸಿನಿಮಾಕ್ಕೆ ಜಾನರ್‌ ಬದಲಿಸುತ್ತಾ ಸಾಗುವ ರೂಪಿಕಾಗೆ ಮುಂದೆಯೂ ವಿಭಿನ್ನ ಸಿನಿಮಾಗಳಲ್ಲಿ ನಟಿಸುವ ಆಸೆ ಇದೆ. “ನನಗೆ ಭಿನ್ನ ಪಾತ್ರಗಳನ್ನು ಮಾಡಬೇಕೆಂಬ ಆಸೆ. ಹಾಗಾಗಿ, ಆ ತರಹದ ಚಿತ್ರ, ಪಾತ್ರಗಳಿಗೆ ಮೊದಲ ಆದ್ಯತೆ ಕೊಡುತ್ತೇನೆ. ಈಗಾಗಲೇ ಬಿಡುಗಡೆಯ ಹಂತದಲ್ಲಿರುವ “ರುದ್ರಾಕ್ಷಿಪುರ’, “ಸರ್ಪ ಸಂಬಂಧ’ ಚಿತ್ರಗಳಲ್ಲೂ ನನ್ನ ಪಾತ್ರ ವಿಭಿನ್ನವಾಗಿದೆ. ಜೊತೆಗೆ ಹೊಸದಾಗಿ ಎರಡು ಸಿನಿಮಾಗಳನ್ನು ಒಪ್ಪಿಕೊಂಡಿದ್ದು, ಆ ಚಿತ್ರವೂ ನನಗೆ ಹೊಸ ಇಮೇಜ್‌ ಕೊಡುವ ನಿರೀಕ್ಷೆ ಇದೆ’ ಎನ್ನುವುದು ರೂಪಿಕಾ ಮಾತು.