ಮಣಿಪಾಲ ವಿವಿ, ಕೆಎಲ್‌ಇಗೆ ಸ್ವಚ್ಛ ಕ್ಯಾಂಪಸ್‌ ಗರಿ

Team Udayavani, Oct 2, 2018, 6:00 AM IST

ನವದಹಲಿ: ಕೇಂದ್ರದ ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯ ಶಿಕ್ಷಣ ಸಂಸ್ಥೆಗಳಿಗೆ ನೀಡುವ “ಸ್ವಚ್ಛ ಕ್ಯಾಂಪಸ್‌ ರ್‍ಯಾಂಕಿಂಗ್‌’ನಲ್ಲಿ ಬೆಳಗಾವಿಯಲ್ಲಿರುವ ಕೆ.ಎಲ್‌.ಇ.ಅಕಾಡೆಮಿ ಆಫ್ ಹೈಯರ್‌ ಎಜುಕೇಶನ್‌ ಆ್ಯಂಡ್‌ ರಿಸರ್ಚ್‌ ಮತ್ತು ಜೈಪುರದಲ್ಲಿರುವ ಮಣಿಪಾಲ ಯುನಿವರ್ಸಿಟಿಗೆ ಕ್ರಮವಾಗಿ ಮೂರು ಮತ್ತು ನಾಲ್ಕನೇ ಸ್ಥಾನಗಳು ಸಿಕ್ಕಿವೆ. 

ಕೇಂದ್ರ ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವ ಪ್ರಕಾಶ್‌ ಜಾವಡೇಕರ್‌ ಸೋಮವಾರ ವಿವರಗಳನ್ನು ಬಿಡುಗಡೆ ಮಾಡಿದ್ದಾರೆ. ಸರ್ಕಾರಿ ಉನ್ನತ ಶಿಕ್ಷಣ ಸಂಸ್ಥೆಗಳ ಪೈಕಿ ಹರ್ಯಾಣದ ಮಹರ್ಷಿ ದಯಾನಂದ ಯುನಿವರ್ಸಿಟಿ ಅತ್ಯಂತ ಶುಚಿ ಕ್ಯಾಂಪಸ್‌ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಪಂಜಾಬ್‌ನ ಅಮೃತಸರದಲ್ಲಿ ರುವ ಗುರುನಾನಕ್‌ ದೇವ್‌ ವಿವಿಗೆ 2ನೇ ಸ್ಥಾನ ದೊರೆತಿದೆ. ದೆಹಲಿಯಲ್ಲಿರುವ ಇನ್‌ಸ್ಟಿಟ್ಯೂಟ್‌ ಆಫ್ ಲಿವರ್‌ ಆ್ಯಂಡ್‌ ಬಿಲಿಯರಿ ಸೈನ್ಸಸ್‌ 3ನೇ ಸ್ಥಾನ ಪಡೆದುಕೊಂಡಿದೆ. ಸರ್ಕಾರಿ ಉನ್ನತ ಶಿಕ್ಷಣ ಸಂಸ್ಥೆಗಳು, ಖಾಸಗಿ ಉನ್ನತ ಶಿಕ್ಷಣ ಸಂಸ್ಥೆಗಳು ಎಂಬ ವರ್ಗೀರಣ ಮಾಡಲಾಗಿದೆ. ಸರ್ಕಾರಿ ಶಿಕ್ಷಣ ಸಂಸ್ಥೆಗಳ ಪೈಕಿ ಕಾರೈಕುಡಿಯ ಅಳಗಪ್ಪಾ ವಿವಿ, ಗುಂಟೂರಿನ ಆಚಾರ್ಯ ನಾಗಾರ್ಜುನ ವಿವಿ ಸ್ಥಾನ ಪಡೆದುಕೊಂಡಿವೆ ಎಂದು ಸಚಿವ ಜಾವಡೇಕರ್‌ ಹೇಳಿದ್ದಾರೆ.