ದೇಶದ ಘನತೆ ವೃದ್ಧಿಗೆ ಸಂಕಲ್ಪ ಅಗತ್ಯ: ಡಾ| ಹೆಗ್ಗಡೆ

Team Udayavani, Oct 3, 2018, 9:35 AM IST

ಬೆಳ್ತಂಗಡಿ: ಜಾಗತಿಕ ಮಟ್ಟದಲ್ಲಿ ದೇಶದ ಘನತೆಯನ್ನು ಎತ್ತಿ ಹಿಡಿಯುವ ಗುರಿಯೊಂದಿಗೆ ಮುನ್ನಡೆಯುವ ದೃಢ ಸಂಕಲ್ಪವನ್ನು ಯುವಸಮೂಹ ಕೈಗೊಳ್ಳಬೇಕು. ಗಾಂಧೀಜಿ ಆಶಯದಂತೆ ಹಳ್ಳಿಗಳನ್ನು ಬಲ ಪಡಿಸಿ ನವಭಾರತವನ್ನು ಕಟ್ಟಬೇಕು ಎಂದು ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ| ಡಿ. ವೀರೇಂದ್ರ ಹೆಗ್ಗಡೆ ಹೇಳಿದರು.

ಅವರು ಮಂಗಳವಾರ ಉಜಿರೆಯ ಡಿ. ರತ್ನವರ್ಮ ಕ್ರೀಡಾಂಗಣದಲ್ಲಿ ಎಸ್‌ಡಿಎಂ ಶಿಕ್ಷಣ ಸಂಸ್ಥೆಗಳ ವತಿಯಿಂದ ನಡೆದ ಮಹಾತ್ಮಾ ಗಾಂಧೀಜಿ 150ನೇ ಜಯಂತಿ ಆಚರಣೆಯಲ್ಲಿ 10 ಸಾವಿರಕ್ಕೂ ಅಧಿಕ ವಿದ್ಯಾರ್ಥಿಗಳಿಗೆ ಸ್ವತ್ಛತೆಯ ಪ್ರಮಾಣವಚನ ಬೋಧಿಸಿ, ಗಾಂಧಿ ಜಯಂತಿಯ ಸಂದೇಶ ನೀಡಿದರು.

ನವ ಭಾರತದ ಕನಸು
ಗಾಂಧಿಯವರು ನವ ಭಾರತದ ಕನಸು ಸಾಕಾರಗೊಳಿಸುವ ಗಂಭೀರ ಪ್ರಯತ್ನ ಮಾಡಿದ್ದರು. ಗ್ರಾಮೀಣ ವಿಕಾಸದ ಮೂಲಕ ಮಾತ್ರ ಸಮೃದ್ಧ ಭಾರತ ನಿರ್ಮಾಣ ಸಾಧ್ಯ ಎಂದು ನಂಬಿ, ಹಳ್ಳಿಗಳ ಉದ್ಧಾರದಲ್ಲಿ ಹೆಚ್ಚಿನ ಆಸಕ್ತಿ ತಾಳಿದ್ದರು. ಭವ್ಯಭಾರತ ಸಾಕಾರಗೊಂಡ ಕ್ಷಣಗಳಿಗೆ ಸಾಕ್ಷಿ ಆಗುವುದಕ್ಕೆ ತಾನು 125 ವರ್ಷ ಬದುಕಬೇಕೆಂಬ ಅಭಿಲಾಷೆ ಅವರಲ್ಲಿತ್ತು ಎಂದರು.

ಯುವಕರು ಸಾಧನೆಗೈದು ದೇಶವನ್ನು ಗಟ್ಟಿಗೊಳಿಸಬೇಕು. ಸಾಧನೆಗೆ ನೈತಿಕ ಮಾರ್ಗವನ್ನೇ ಅನುಸರಿಸಿ, ಅಲ್ಲಿನ ಎಡರು- ತೊಡರುಗಳಿಗೆ ಉತ್ತರ ಹುಡುಕುವ ಪ್ರಯತ್ನ ಮಾಡಬೇಕು. ದೇಶದ ಉನ್ನತಿಯ ಆಲೋಚನೆ ಯುವಶಕ್ತಿಯ ಮುಂದಿರಬೇಕು ಎಂದು ಸಂದೇಶ ನೀಡಿದರು.

ಧ್ಯೇಯವಾಕ್ಯ ಅನಾವರಣ
“ಸ್ವಸ್ಥ ಮನಸ್ಸು, ಸ್ವತ್ಛ ಪರಿಸರ, ಗಾಂಧಿ ಮಾರ್ಗ’ ಧ್ಯೇಯವಾಕ್ಯದ ಫಲಕವನ್ನು ಹೇಮಾವತಿ ವೀ. ಹೆಗ್ಗಡೆ ಅನಾವರಣಗೊಳಿಸಿದರು. ಎಸ್‌ಡಿಎಂ ಪತ್ರಿಕೋದ್ಯಮ ವಿಭಾಗದ ದೃಶ್ಯ- ಶ್ರಾವ್ಯ ವೆಬ್‌ ಸರಣಿಯ ಪ್ರೊಮೋವನ್ನು ಎಸ್‌ಡಿಎಂ ಶಿಕ್ಷಣ ಸಂಸ್ಥೆಗಳ ಕಾರ್ಯದರ್ಶಿ ಡಿ. ಹರ್ಷೇದ್ರ ಕುಮಾರ್‌ ಬಿಡುಗಡೆಗೊಳಿಸಿದರು. 150 ವಿದ್ಯಾರ್ಥಿಗಳು ಗಾಂಧಿ ಭಜನೆ ಹಾಡಿದರು. ಎಸ್‌ಡಿಎಂ ಶಿಕ್ಷಣ ಸಂಸ್ಥೆಗಳ ಉಪಾಧ್ಯಕ್ಷ ಪ್ರೊ| ಎಸ್‌. ಪ್ರಭಾಕರ್‌, ಸುಪ್ರಿಯಾ ಹಷೇìದ್ರ ಕುಮಾರ್‌, ಶ್ರದ್ಧಾ ಅಮಿತ್‌, ಎಸ್‌ಡಿಎಂ ಕಾಲೇಜು ಪ್ರಾಂಶುಪಾಲ ಪ್ರೊ| ಟಿ.ಎನ್‌. ಕೇಶವ ಉಪಸ್ಥಿತರಿದ್ದರು.
ಎಸ್‌ಡಿಎಂ ಶಿಕ್ಷಣ ಸಂಸ್ಥೆಗಳ ಕಾರ್ಯದರ್ಶಿ ಡಾ| ಬಿ. ಯಶೋವರ್ಮ ಸ್ವಾಗತಿಸಿದರು. ಪ್ರಾಧ್ಯಾಪಕ ಕುಮಾರ ಹೆಗ್ಡೆ ನಿರ್ವಹಿಸಿದರು.