ಬೆಳ್ಮಣ್: ಟೋಲ್ ಗೇಟ್ ವಿರೋಧಿಸಿ ಬಿಜೆಪಿ ಪ್ರತಿಭಟನೆ

Team Udayavani, Oct 5, 2018, 12:29 PM IST

ಬೆಳ್ಮಣ್: ಕಾರ್ಕಳ-ಪಡುಬಿದ್ರಿ ರಸ್ತೆಯ ಬೆಳ್ಮಣ್ ನಲ್ಲಿ ನಿರ್ಮಿಸಲು ಉದ್ದೇಶಿಸಿರುವ ಟೋಲ್ ಗೇಟ್ ಅನ್ನು ವಿರೋಧಿಸಿ ಶುಕ್ರವಾರ ಬೆಳ್ಮಣ್ ಪೇಟೆಯಲ್ಲಿ ಬಿಜೆಪಿ ವತಿಯಿಂದ ಪ್ರತಿಭಟನೆ ನಡೆಯಿತು. ಈ ಸಂದರ್ಭದಲ್ಲಿ  ಸ್ಥಳಿಯ ಶಾಸಕ ಸುನೀಲ್ ಕುಮಾರ್, ಜಿಲ್ಲಾ ಪಂಚಾಯತ್ ಸದಸ್ಯರಾದ ರೇಷ್ಮಾ ಉದಯ್ ಶೆಟ್ಟಿ, ಉದಯ್ ಕೋಟ್ಯಾನ್, ಸುಮೀತ್ ಶೆಟ್ಟಿ ಬೈಲೂರು ಭಾಗವಹಿಸಿದ್ದರು. 

ಉದ್ದೇಶಿತ ಟೋಲ್ ಗೇಟ್ ನಿರ್ಮಾಣವಾಗುವ ಸ್ಥಳವಾದ ಬೆಳ್ಮಣ್ ಸರಕಾರಿ ಪದವಿ ಪೂರ್ವ ಶಾಲೆಯ ಎದುರಿನಿಂದ ಬೆಳ್ಮಣ್ ಬಸ್ ನಿಲ್ದಾಣವರೆಗೆ ಮೆರವಣಿಗೆ ನಡೆಸಿ ಪ್ರತಿಭಟನೆ ನಡೆಸಲಾಯಿತು. 

7ರಂದು ಬೃಹತ್ ಪ್ರತಿಭಟನೆ: 
ಸುಂಕ ಸಂಗ್ರಹದ ವಿರುದ್ದ ಬೆಳ್ಮಣ್ ನಲ್ಲಿ ಅ. 7 ಭಾನುವಾರ ಬೃಹತ್ ಸಾರ್ವಜನಿಕ ಪ್ರತಿಭಟನೆ ನಡೆಸಲು ಉದ್ದೇಶಿಸಲಾಗಿದೆ . ಸುಮಾರು 10 ಸಾವಿರ ಜನ ಸೇರುವ ನಿರೀಕ್ಷೆ ಇದೆ ಎನ್ನಲಾಗುತ್ತಿದೆ. ಕಾರ್ಕಳ, ಬೆಳ್ಮಣ್, ಸಚ್ಚೇರಿಪೇಟೆ ಭಾಗದ 50ಕ್ಕೂ ಹೆಚ್ಚು ಬಸ್ ಮಾಲಕರು ಹೋರಾಟಕ್ಕೆ ಬೆಂಬಲ ಸೂಚಿಸಿದ್ದಾರೆ. ಪ್ರತಿಭಟನೆಗೆ ಆಗಮಿಸುವವರಿಗೆ ಟಿಕೆಟ್ ರಹಿತ ಸೇವೆ ನೀಡಲಿದ್ದಾರೆ. ಲಾರಿ, ರಿಕ್ಷಾ, ಕಾರು ಮಾಲಕರು ಕೂಡಾ ಭಾನುವಾರ ನಡೆಯುವ ಪ್ರತಿಭಟನೆಗೆ ಬೆಂಬಲ ನೀಡಿದ್ದಾರೆ.