ರೂಪಾಯಿ ಚೇತರಿಕೆ : ಮುಂಬಯಿ ಶೇರು 461 ಅಂಕಗಳ ಭರ್ಜರಿ ಜಿಗಿತ

Team Udayavani, Oct 10, 2018, 4:21 PM IST

ಮುಂಬಯಿ : ಡಾಲರ್‌ ಎದುರು ತಳ ಮಟ್ಟ ಕಂಡಿದ್ದ ರೂಪಾಯಿ ಚೇತರಿಸಿಕೊಂಡ ಹಿನ್ನೆಲೆಯಲ್ಲಿ ದೇಶೀಯ ಹೂಡಿಕೆ ಸಂಸ್ಥೆಗಳಿಂದ ಮುಂಚೂಣಿ ಶೇರುಗಳ ವ್ಯಾಪಕ ಖರೀದಿ ನಡೆದ ಕಾರಣ ಮುಂಬಯಿ ಶೇರು ಪೇಟೆಯ ಸೆನ್ಸೆಕ್ಸ್‌ ಇಂದು ಬುಧವಾರ Relief Rally ಕಂಡು 461.42 ಅಂಕಗಳ ಭರ್ಜರಿ ಏರಿಕೆಯೊಂದಿಗೆ ದಿನದ ವಹಿವಾಟನ್ನು 34,760.89 ಅಂಕಗಳ ಮಟ್ಟದಲ್ಲಿ ಕೊನೆಗೊಳಿಸಿತು.

ಇದೇ ರೀತಿ ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ 159.05 ಅಂಕಗಳ ಮುನ್ನಡೆಯನ್ನು ಕಂಡು ದಿನದ ವಹಿವಾಟನ್ನು 10,460.10 ಅಂಕಗಳ ಮಟ್ಟದಲ್ಲಿ ಕೊನೆಗೊಳಿಸಿತು. 

ಇಂದಿನ ವಹಿವಾಟಿನಲ್ಲಿ ಹಣಕಾಸು, ಆಟೋ, ಮೆಟಲ್‌ ರಂಗದ ಶೇರುಗಳು ಉತ್ತಮ ಖರೀದಿಯನ್ನು ಕಂಡವು. ಶೇರು ಪೇಟೆಯಲ್ಲಿಂದು ಒಟ್ಟು  2,800 ಕಂಪೆನಿಗಳ ಶೇರುಗಳು ವಹಿವಾಟಿಗೆ ಒಳಪಟ್ಟವು; 2,060 ಶೇರುಗಳು ಮುನ್ನಡೆ ಕಂಡವು; 606 ಶೇರುಗಳು ಹಿನ್ನಡೆಗೆ ಗುರಿಯಾದವು; 134 ಶೇರುಗಳು ಯಾವುದೇ ಬದಲಾವಣೆ ಕಾಣಲಿಲ್ಲ. 

ಡಾಲರ್‌ ಎದುರು ರೂಪಾಯಿ ಇಂದು 34 ಪೈಸೆಯ ಚೇತರಿಕೆಯನ್ನು ಕಂಡು 74.05 (ವಹಿವಾಟಿನ ನಡುವಿನ ದರ) ರೂ. ಮಟ್ಟಕ್ಕೆ ತಲುಪಿದುದು ಶೇರು ಮಾರುಕಟ್ಟೆಗೆ ಸಮಾಧಾನ ಉಂಟು ಮಾಡಿತು.