ಉಪ್ಪಿನಂಗಡಿ: ಆಧಾರ್‌ಗಾಗಿ ನಾಡಕಚೇರಿಯಲ್ಲಿ ನೂಕುನುಗ್ಗಲು

Team Udayavani, Oct 18, 2018, 2:56 PM IST

ಉಪ್ಪಿನಂಗಡಿ: ಸರಕಾರಿ ಸೌಲಭ್ಯಗಳಿಗೆ ಕಡ್ಡಾಯವಾಗಿರುವ ಆಧಾರ್‌ ಕಾರ್ಡ್‌ ತಿದ್ದುಪಡಿ ಹಾಗೂ ಹೊಸ ಆಧಾರ್‌ ಕಾರ್ಡ್‌ ಮಾಡಿಸುವ ಸಲುವಾಗಿ ಉಪ್ಪಿನಂಗಡಿಯ ನಾಡ ಕಚೇರಿಯಲ್ಲಿ ಬುಧವಾರ ನೂಕುನುಗ್ಗಲು ಉಂಟಾಗಿತ್ತು.

ಆಧಾರ್‌ ನೋಂದಣಿ ಹಾಗೂ ತಿದ್ದುಪಡಿ ಕಂದಾಯ ಇಲಾಖೆ ಕೇಂದ್ರಗಳು ಹಾಗೂ ಪುತ್ತೂರು ಪ್ರಧಾನ ಅಂಚೆ ಕಚೇರಿಯಲ್ಲಿ ಮಾತ್ರ ನಡೆಯುತ್ತಿವೆ. ಉಪ್ಪಿನಂಗಡಿ ಹೋಬಳಿ ಕೇಂದ್ರವಾಗಿದ್ದು, ಇಲ್ಲಿನ ನಾಡ ಕಚೇರಿಯಲ್ಲಿ ಒಬ್ಬರೇ ಸಿಬಂದಿ, ಅಂತರ್ಜಾಲದ ವ್ಯವಸ್ಥೆಯ ಅನುಕೂಲತೆಯನ್ನು ಆಧರಿಸಿ ದಿನಕ್ಕೆ 20 ಆಧಾರ್‌ ಕಾರ್ಡ್ ಗಳ ನೋಂದಣಿ ಅಥವಾ ತಿದ್ದುಪಡಿ ಮಾಡಬಹುದಷ್ಟೇ. ಅದಕ್ಕಾಗಿ ಜನರು ನಸುಕಿನ ಐದು ಗಂಟೆಯಿಂದಲೇ ನಾಡ ಕಚೇರಿಯ ಬಾಗಿಲಲ್ಲಿ ಸಾಲು ನಿಲ್ಲುತ್ತಾರೆ.

ಸೋಮವಾರ ಒಂದೇ ದಿನ ನಾಡಕಚೇರಿ ಬಾಗಿಲು ತೆರೆಯುವ ಹೊತ್ತಿಗೆ 80ಕ್ಕೂ ಹೆಚ್ಚು ಜನ ಕೈಯಲ್ಲಿ ದಾಖಲೆಗಳನ್ನು ಹಿಡಿದು ಆಧಾರ್‌ಗಾಗಿ ದುಂಬಾಲು ಬಿದ್ದಿದ್ದರು. ಸಿಬಂದಿ ಎಲ್ಲ ಅರ್ಜಿಗಳನ್ನು ಸ್ವೀಕರಿಸಿ, ದಿನದಲ್ಲಿ ಗರಿಷ್ಠ 20 ಆಧಾರ್‌ ಅರ್ಜಿ ವಿಲೇವಾರಿ ಮಾಡಬಹುದಷ್ಟೇ. ಇಂಟರ್‌ ನೆಟ್‌ ಸಮಸ್ಯೆ ಎದುರಾದರೆ ಅದೂ ಅಸಾಧ್ಯ ಎಂದು ಹೇಳಿದ್ದರಿಂದ, ಎಳೆಯ ಮಕ್ಕಳನ್ನು ಹಾಗೂ ವೃದ್ಧರನ್ನು ಕರೆತಂದವರು ನಿರಾಶೆಗೆ ಒಳಗಾಗಿದ್ದರು.

ಸಿಬಂದಿ ಕೊರತೆಯಿಂದಾಗಿ ಅಂಚೆ ಕಚೇರಿಗಳಲ್ಲೂ ಸೂಕ್ತವಾಗಿ ಸೇವೆ ಲಭಿಸುತ್ತಿಲ್ಲ. ನಾಡ ಕಚೇರಿಯಲ್ಲಿ ಆಧಾರ್‌ ನೋಂದಣಿಗೆ ಪ್ರತ್ಯೇಕ ಸಿಬಂದಿ ಹಾಗೂ ಕಂಪ್ಯೂಟರ್‌ ಒದಗಿಸಲು ಜಿಲ್ಲಾಡಳಿತ ಮುಂದಾಗಬೇಕು ಎಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.