ಸಿಬಿಐ ನಿರ್ದೇಶಕ ವರ್ಮಾ ನಿವಾಸದ ಮುಂದೆ ಇಬ್ಬರು ಶಂಕಿತರು: ಬಂಧನ

Team Udayavani, Oct 25, 2018, 11:30 AM IST

ಹೊಸದಿಲ್ಲಿ : ಸಿಬಿಐ ನಿರ್ದೇಶಕ ಆಲೋಕ್‌ ವರ್ಮಾ ಅವರ ನಿವಾಸದ ಮುಂದೆ ಠಳಾಯಿಸುತ್ತಿದ್ದ ಇಬ್ಬರು ಶಂಕಾಸ್ಪದ ವ್ಯಕ್ತಿಗಳನ್ನು ವರ್ಮಾ ಅವರ ಭದ್ರತಾ ಅಧಿಕಾರಿಗಳು ಇಂದು ಗುರುವಾರ ಬೆಳಗ್ಗೆ ವಶಕ್ಕೆ ತೆಗೆದುಕೊಂಡಿರುವುದಾಗಿ ವರದಿಗಳು ತಿಳಿಸಿವೆ.

ಸಿಬಿಐ ಮುಖ್ಯಸ್ಥ ಮತ್ತು ವಿಶೇಷ ನಿರ್ದೇಶಕ ರಾಕೇಶ್‌ ಅಸ್ಥಾನಾ ಅವರನ್ನು ಸರಕಾರ ರಜೆಯ ಮೇಲೆ ಕಳುಹಿಸಿದ ಒಂದು ದಿನದ ತರುವಾಯ ಈ ವಿದ್ಯಮಾನ ನಡೆದಿರುವುದು ಗಮನಾರ್ಹವೆಂದು ತಿಳಿಯಲಾಗಿದೆ.

ವಶಕ್ಕೆ ತೆಗೆದುಕೊಳ್ಳಲಾಗಿರುವ ಇಬ್ಬರು ಶಂಕಾಸ್ಪದ ವ್ಯಕ್ತಿಗಳನ್ನು ಪೊಲೀಸರೀಗ ಪ್ರಶ್ನಿಸುತ್ತಿದ್ದಾರೆ. ಈ ಅಪರಿಚಿತ, ಶಂಕಿತ ವ್ಯಕ್ತಿಗಳ ಬಗ್ಗೆ ಯಾವುದೇ ಮಾಹಿತಿಯನ್ನು ಅಧಿಕಾರಿಗಳು ಈ ವರೆಗೂ ಬಹಿರಂಗಪಡಿಸಿಲ್ಲ.

ಆಲೋಕ್‌ ವರ್ಮಾ ಅವರು ತಮ್ಮನ್ನು ಸರಕಾರ ಬಲವಂತದ ರಜೆಯ ಮೇಲೆ ಕಳುಹಿಸಿರುವುದನ್ನು ಪ್ರಶ್ನಿಸಿ ಸುಪ್ರೀಂ ಕೋರ್ಟ್‌ ಮೆಟ್ಟಲೇರಿದ್ದಾರೆ. ಮಾತ್ರವಲ್ಲದೆ ಸಿಬಿಐನ ಎರಡನೇ ಕ್ರಮಾಂಕದ ಉನ್ನತ ಅಧಿಕಾರಿಯಾಗಿರುವ ಅಸ್ಥಾನಾ ಅವರು ತನಿಖೆಗೆ ಅಡ್ಡಿ ಪಡಿಸುತ್ತಿದ್ದಾರೆ ಎಂದು ದೂರಿದ್ದಾರೆ.