ಸರ್ಜಾ ವಿರುದ್ಧ ದೂರು;5ಪುಟಗಳ ದೂರಿನಲ್ಲಿ ಶ್ರುತಿ ಮದುವೆ ಗುಟ್ಟು ಬಯಲು

Team Udayavani, Oct 27, 2018, 4:41 PM IST

ಬೆಂಗಳೂರು: ಮೀ ಟೂ ಅಭಿಯಾನದಡಿ ನಟಿ ಶ್ರುತಿ ಹರಿಹರನ್ ಅವರು ನಟ ಅರ್ಜುನ್ ಸರ್ಜಾ ವಿರುದ್ಧ ಲೈಂಗಿಕ ಕಿರುಕುಳ ನೀಡಿರುವುದಾಗಿ ಆರೋಪಿಸಿರುವ ಜಟಾಪಟಿ ಇದೀಗ ತಾರಕಕ್ಕೇರಿದೆ. ಶನಿವಾರ ಶ್ರುತಿ ಹರನ್ ಕಬ್ಬನ್ ಪಾರ್ಕ್ ಪೊಲೀಸ್ ಠಾಣೆಯಲ್ಲಿ ಅರ್ಜುನ್ ಸರ್ಜಾ ವಿರುದ್ಧ ದೂರು ದಾಖಲಿಸಿದ್ದಾರೆ.

ಐದು ಪುಟಗಳ ದೂರಿನಲ್ಲಿ ಶ್ರುತಿ ಮದುವೆ ಗುಟ್ಟು ಬಯಲು!

ತನ್ನ ವಕೀಲರ ಜೊತೆ ಕಬ್ಬನ್ ಪಾರ್ಕ್ ಪೊಲೀಸ್ ಠಾಣೆಗೆ ಆಗಮಿಸಿದ್ದ ಶ್ರುತಿ ಹರಿಹರನ್, ನಟ ಅರ್ಜುನ್ ಸರ್ಜಾ ವಿರುದ್ದ ಲೈಂಗಿಕ ಕಿರುಕುಳ ನೀಡಿರುವ ಬಗ್ಗೆ 5 ಪುಟಗಳ ವಿವರವಾದ ದೂರು ನೀಡಿದ್ದರು.

ಈ ಸಂದರ್ಭದಲ್ಲಿ ದೂರಿನ ಪ್ರತಿಯಲ್ಲಿ ಶ್ರೀಮತಿ ಶ್ರುತಿ ಹರಿಹರನ್ ಎಂದು ನಮೂದಿಸಿದ್ದನ್ನು ಗಮನಿಸಿದ ಪೊಲೀಸರು ಗೊಂದಲಕ್ಕೀಡಾಗಿದ್ದರು. ಆಗ ಪೊಲೀಸರು ನಿಮಗೆ ಮದುವೆಯಾಗಿದೆಯಾ ಎಂದು ಪ್ರಶ್ನಿಸಿದ್ದರಂತೆ!

ದೂರಿನ ಪ್ರತಿಯಲ್ಲಿ ತನ್ನ ಹೆಸರು ಮಾತ್ರ ನಮೂದಿಸಿದ್ದ ಶ್ರುತಿಗೆ ಮದುವೆಯಾಗಿದೆಯಾ ಎಂಬ ಪ್ರಶ್ನೆಗೆ ಹೌದು ಸರ್ ಆಗಿದೆ, ಆದರೆ ಇನ್ನೂ ಈ ಬಗ್ಗೆ ಬಹಿರಂಗವಾಗಿ ಹೇಳಿಕೊಂಡಿಲ್ಲ ಎಂದರು. ಬಳಿಕ ದೂರಿನ ಪ್ರತಿಯಲ್ಲಿ ಶ್ರುತಿ ಹೆಸರಿನ ಸಮೀಪ ವೈಫ್ ಆಫ್ ರಾಮ್ ಕುಮಾರ್ ಎಂದು ಸೇರಿಸಿದ್ದರು.

ಈ ಮೂಲಕ ಶ್ರುತಿ ಹರಿಹರನ್ ಇಷ್ಟು ದಿನಗಳ ಕಾಲ ಮುಚ್ಚಿಟ್ಟಿದ್ದ ಮದುವೆ ರಹಸ್ಯ ಬಟಬಯಲಾದಂತಾಗಿದೆ! 2017ರಲ್ಲಿ ಶ್ರುತಿ ಹರಿಹರನ್ ರಹಸ್ಯವಾಗಿ ಮದುವೆಯಾಗಿದ್ದಾರೆಂಬ ಸುದ್ದಿ ಹಬ್ಬಿದಾಗ, ಇದಕ್ಕೆ ಪ್ರತಿಕ್ರಿಯೆ ನೀಡಿದ್ದ ಶ್ರುತಿ, ನಾನು ಎಲ್ಲಿಯೂ ರಹಸ್ಯವಾಗಿ ಮದುವೆ ಆಗಿಲ್ಲ ಎಂದು ಸ್ಪಷ್ಟನೆ ನೀಡಿದ್ದರು.